Španiska koparska wubranka je wčera w Aucklandźe prěni króć finale swětoweho mišterstwa žonow docpěła. W połfinalu poradźi so po turbulentnej kónčnej fazy snadny 2:1 wuspěch přećiwo Šwedskej, tež dźakowano zbožownej ručce ­trenarja Jorge Vildy. Pola Skandinawičankow je so porno tomu połfinalny trawma wospjetował.

Jako wothwizda brazilska sudnica Edina Alves partiju krótko do dźesaćich po třoch pózdnich wrotach, wyskachu Juhoeuropjanki bjez přestaća. Dotal najwjetši wuspěch španiskeje „Selección“ měješe so před 43 217 přihladowarjemi we wupředatym Eden Parku porjadnje woswjećić. Jenož jědnaće měsacow po tym, zo wotwobara španiski koparski zwjazk zběžk 15 narodnych hrajerkow přećiwo trenarjej, steji mustwo krótko před dobyćom titula. Koparski trón je jenož hišće jedne dobyće zdaleny. Njedźelu w dwanaćich měri so Španiska w Sydneyju pak z ko-hosćićelkami z Awstralskeje abo z europskimi mišterkami z Jendźelskeje.