Putin a Obama telefonowałoj
pjatk, 26. junija 2015
spisane wot: dpa/Serbske Nowiny
Washington (dpa/SN). W zwisku z prócowanjemi wo měrniwe rozrisanje konflikta na wuchodźe Ukrainy staj prezidentaj USA Barack Obama a ruski prezident Wladimir Putin telefonowałoj. Ruska dyrbjała wuměnjenja Minšćanskeho měroweho plana spjelnić, žadaše sej Obama w rozmołwje, kaž Běły dom zdźěla. Jednotki a wotpowědnu wojersku techniku dyrbjała Ruska z Ukrainy cofnyć. Politikarjej rěčeštaj tež wo boju přećiwo teroristiskej milicy Islamski stat a wo aktualnym stawje jednanjow wo iranskim atomowym programje.
Tilich so wosobinsce na městnje wobhonił
pjatk, 26. junija 2015
spisane wot: dpa/Serbske Nowiny
Freital (dpa/SN). Po dny trajacych protestach přećiwo zaměstnjenju ćěkancow w Freitalu je so sakski ministerski prezident Stanisław Tilich (CDU) na městno protestow podał, zo by sej wosobinsce přehlad tworił. Při tym wopyta tež dom požadarjow azyla. Hladajo na protesty wón rjekny: „Hroženja, šćuwanja a namóc přećiwo ludźom, kotřiž so za ćěkancow angažuja, su dospołnje njeakceptabelne.“ Tilich skedźbni na to, zo ma Sakska wšědnje 140 nowych požadarjow azyla zaměstnić, a ličba dale přiběra. Hladajo na połoženje w Freitalu ministerski prezident přizna, zo njeje komunikacija mjez krajnymi a komunalnymi zarjadami w kóždym padźe optimalna. Opozicija bě sakskemu statnemu knježerstwu stajnje zaso wumjetowała, zo swoje nadawki w zwisku z ćěkancami zanjecha.
Durje hišće wotewrjene
pjatk, 26. junija 2015
spisane wot: dpa/Cyril Kola
Brüssel (dpa/SN/K). W zwadźe wo pomocne miliardy je wjeršk EU ćišć na grjekskeho premiera Alexisa Tsiprasa chětro přiwótřił. Šefojo statow a knježerstwow krajow zhromadźenstwa su jemu jasnje rjekli, zo njemóže so Athen w jednanjach k zadźěwanju statneho bankrota hižo wuwinyć. Wobdźělnicy sej wot Tsiprasa žadaja, akceptować nowy poskitk pjenjezydawarjow nastupajo reformy a lutowanje, hewak dyrbi so wo planje „B“ rěčeć, z čimž je powšitkownje měnjeny statny bankrot abo wustup Grjekskeje z EU. Šef euroskupiny Jeroen Dijsselbloem wšak praji: „Durje za grjekske knježerstwo su přeco hišće do toho směra wotewrjene, namjety přiwzać.“
Najwjetše wužadanje
pjatk, 26. junija 2015
spisane wot: dpa/Cyril Kola
Brüssel (dpa/SN/K). Němska zwjazkowa kanclerka Angela Merkel (CDU) widźi w njepřestajnej žołmje ćěkancow najwjetše wužadanje za Europsku uniju. W Brüsselu wona rano praji: „W tym nastupanju čakaja na nas hišće hoberske nadawki.“ Wobzamknjenje wjerška, z Italskeje a Grjekskeje 40 000 ćěkancow rozdźělić na dalše staty EU a přiwzać 20 000 ćěkancow z lěhwow zwonka Europy, wona wuraznje wita. „To je dobre poselstwo.“ Zawjazowacu kwotu wo rozdźělenju ćěkancow na jednotliwe kraje EU njezamóchu na wjeršku docpěć. „Němska ma drje lětsa hižo jara wulki podźěl ćěkancow. Njehladajo na to smy my – a to je znate – bóle za rjadowanje z kwotu, hač su to druhe kraje. Tohodla změjemy hišće jara wjele dźěła“, kanclerka rjekny.
To a tamne (26.06.15)
pjatk, 26. junija 2015
spisane wot: dpa/Serbske Nowiny
Na dnje poprjancoweje tyzy je Berlinjan spytał, w Nižozemskej kupjene drogi do Němskeje pašować. 39lětny pak zastojnikam při kontroli busa při němsko-nižozemskej mjezy pola Leera napadny, a tak jeho wosobinske wěcy dokładnje kontrolowachu. Pod poprjancami namakachu 70 gramow heroina a 10 gramow kokaina. Policija muža zaja.
Grawoćiwy napohlad skićeše so sobudźěłaćerjam zwěrjatownje w bayerskim Bad Aiblingenje, jako chcychu 20 wulkich myši wotewzać, dokelž bě jich wobsedźer do chorownje přišoł: Na wšě 300 wulkich myši pak w bydlenju muža žiworješe, w faškach kamorow, pod łožom a za kamorami, „a wšitke běchu hłódne“, zwěrjatownja zdźěli. Muž bě sobudźěłaćerjam rjekł, zo wobsedźi 20 myši.
Łužica (26.06.15)
pjatk, 26. junija 2015
spisane wot: dpa/Monika Dyrlichowa
Ambroziju wutorhali
Wětošow (dpa/SN/ch). Wobydlerjo Wětošowa su dźensa kołowokoło lětnjeje kupjele alergije wuskutkowacu rostlinu ambroziju wutorhali. Strach za strowotu při tym njeknježeše, dokelž rostlina hišće njekćěje, praji zapósłanc města Winfried Böhmer (Zeleni). Přičina akcije bě jutřiši cyłoswětowy dźeń ambrozije. Z nim ma so na přiběrace rozšěrjenje rostliny skedźbnjeć. Kontakt z njej wuwabja swjerbjenje a wuražki kože.
Prěje wotpohlad morjenja
Protestujo přećiwo internetnemu posrědkowarjej priwatnych ...
štwórtk, 25. junija 2015
spisane wot: dpa/Serbske Nowiny
Protestujo přećiwo internetnemu posrědkowarjej priwatnych taksijowych posłužbow Uber su šoferojo taksijow dźensa wažne dróhi Parisa blokowali, mjez druhim zwiski k lětanišću. Při tym kóncowachu awta priwatnych ludźi, kotřiž za Uber dźěłaja, byrnjež to w Francoskej zakazane było. Foto: dpa/Ian Langsdon
NATO namołwja Ukrainu k reformam
štwórtk, 25. junija 2015
spisane wot: dpa/Serbske Nowiny
Brüssel (dpa/SN). NATO žada sej wot Ukrainy jako reakciju na swoju wojersku podpěru widźomne reformy. „Ukraina dyrbi swój podźěl spjelnić. Reformy su při tym njewobeńdźomne“, rjekny generalny sekretar NATO Jens Stoltenberg dźensa w Brüsselu k rozmołwam zakitowanskich ministrow čłonskich statow wojerskeho zwjazka ze zastupnikami z Kijewa. Trěbne su zasadne napinanja, wón potwjerdźi. Knježerstwu w Moskwje Stoltenberg wumjetowaše, zo konflikt na wuchodźe Ukrainy aktiwnje wobwliwuje. „Ruska separatistow dale z wukubłarjemi, brónjemi a wojakami zastaruje.“ NATO podpěruje Ukrainu z wojerskimi poradźowarjemi kaž tež pjenježnje we wobłuku nawjedowanja, komunikaciskich systemow, logistiki a wotwobaranja hackerowych nadpadow.
Cyłe koło zetkanjow
štwórtk, 25. junija 2015
spisane wot: dpa/Cyril Kola
Brüssel (dpa/SN/K). Instancy, dawace Grjekskej pjenjezy, dźens znowa spytaja dojednać so z Athenom wo pakeće reformow a lutowanja. W komisiji EU wuradźuja jeje prezident Jean-Claude Juncker, šefina IWF Christine Lagarde, šef Europskeje centralneje banki Mario Draghi a šef euroskupiny Jeroen Dijsselbloem z grjekskim ministerskim prezidentom Alexisom Tsiprasom wo tym, kak krizu zadołženja rozrisać. Paket reformow je wuměnjenje za to, zo móhli Grjekskej dotal blokowane pomocne srědki 7,2 miliardow eurow wupłaćić a tak statnemu bankrotej zadźěwać. Diplomaća EU wudawaja, zo je donětka snadne přibliženje. Po připołdnju zetkachu so w Brüsselu financni ministrojo eurokrajow. Popołdnju schadźowaše so znowa wjeršk EU.
Ratarjo chcyli wjace zrozumjenja
štwórtk, 25. junija 2015
spisane wot: dpa/Serbske Nowiny
Erfurt (dpa/SN). Na zjězdźe ratarjow Němskeje w Erfurće chcedźa burja wo wjace zrozumjenja ludnosće za swoje dźěło wabić. Stajna kritika ratarjow přiběrajcy dušinje poćežuje a jich boli, rjekny prezident zwjazka Joachim Rukwied. Na druhim dnju zjězda steješe tuž dźensa diskusija ratarjow ze zastupnikami politiki na programje. Na njej chcychu wuradźować, kak móhli zrozumjenje mjez ratarjemi a towaršnosću polěpšić. Nimo toho chcyše zwjazkowy ratarski minister Christian Schmidt (CDU) k 600 delegatam zjězda rěčeć. Ze swojim zjězdom burja dopokazuja, „zo so towaršnostnej debaće njewuwinu“, Schmidt do zjězda rjekny, namołwjejo do wobšěrneho dialoga we wobłuku zežiwjenja a ratarstwa.
