Rom (B/SN). Bamž Franciskus je italskich protestantow wo wodaće prosył. „Ze stron katolskeje cyrkwje prošu was wo wodaće za njekřesćanske, haj samo nječłowjeske zadźerženje, kajkež smy my wam napřećo w zašłosći pokazali“, rjekny wón na njedawnym wopyće waldensenskeje cyrkwje w Turinje. Wón je jara dźakowny, zo su poćahi mjez katolikami a waldensenskimi křesćanami mjeztym z respektom a miłosću wupjelnjene. To wuprudźa nadźiju na „połnu a widźomnu jednotu“ mjez křesćanami.
Starosći so wo wobswět
Vatikan (B/SN). Jako prěni bamž w stawiznach cyrkwje wěnuje Franciskus encykliku „Laudam si“ (Wo starosći zhromadneho domu) wobswětej. Z wótrymi słowami šwika wón na 220 stronach ničace sćěhi kapitalizma a namołwja k wurunanemu žiwjenskemu stilej. Přez „njezamołwitu přetrjebu přirody“ přez čłowjeka maja wosebje chudźi we wuwićowych krajach negatiwne slědy toho njesć. Politikarjam bamž wumjetuje, zo su w prašenjach wobswěta zaprajili. Wón namołwja „kóždeho čłowjeka, kiž na tutym planeće bydli, zo by so wzdał nadměrneho konsuma.“
Nowa frizura sydomlětneho je w Durinskej zasadźenje policije zawinowała. Jako mać hólca minjenu sobotu za nožicami přimny, tón wótře žałosćeše. Susodka zawoła na to policiju. Ta nadeńdźe w bydlenju 41lětnu mać ze synomaj. Młódšemu chcyše wona włosy třihać. „Hólc nochcyše nožicy při hłowje měć“, rěka w rozprawje. Namóc mać tuž njenałožowaše. Wón dyrbi nětko „njehotowu frizuru“ znjesć.
Njewšědny swětowy rekord planujetaj Dennis Groißl (30) a Niklas Jahn (21) ze Schleswigsko-Holsteinskeje. Wobaj chcetaj 80 hodźin tenis hrać a tak wobstejacy rekord 61 hodźin dweju Američanow jasnje přetrjechić. Hra započnje so zajutřišim, štwórtk, w 10 hodź. a ma hač do njedźele we 18 hodź. trać. Z wosebitym zežiwjenjom a krótkosparom chcetaj to zmištrować. Dowolena je jenož pjećmjeńšinska přestawka na hodźinu.
Zwada wo zarunanje so nachila
Choćebuz (dpa/SN/ch). Wobswětowi aktiwisća běchu so před něhdźe dwěmaj lětomaj na kolije přiwjazali a tak dźěło we wuhlowej jamje pola Choćebuza mylili. Vattenfall žada sej za to wotškódnjenje. Zwada wo płaćenje pjenjez móhła so bórze skónčić. Choćebuske krajne sudnistwo chce 25. awgusta wusud wozjewić. Aktiwisća protestowachu tehdy přećiwo planowanemu rozšěrjenju brunicoweje jamy Wjelcej-juh. Šwedski statny koncern žada sej zarunanje, dokelž běchu woni cyły dźeń dźěło w jamje mylili. Škoda wučinja po wuprajenju zastupjerja aktiwistow wjace hač 20000 eurow.
Wažne styki nawjazali
Choćebuz (DSŠ/SN). Pod hesłom „… kaž na zahrodźe Eden“ je so sobotu prěni cyrkwinski dźeń štyrjoch łužiskich wokrjesow Ewangelskeje cyrkwje Berlin-Braniborska-šleska Hornja Łužica (EKBO) w Choćebuzu wuspěšnje wotměł. Byrnjež hesło tukanje na spirituelne wotzběhowanje budźiło, bě dźeń cyle hinaši. Pohonjowani abo tež nućeni z aktualneje debaty wo brunicy běchu sej organizatorojo předewzali, wosebje tymle a dalšim „łužiskim“ temam městno k rozmyslowanju a rozmołwje skićić.
Podstupim (SN/at). Z namjetom knježerstwoweju frakcijow SPD a Lěwicy „Wjacerěčnosć a mnohotnosć rěčow w Braniborskej rozšěrić“ zaběra so Krajny sejm Braniborskeje na swojim posedźenju zajutřišim, srjedu, w Podstupimje.
Po předležacym naćisku wuznawa so parlament tak k zamołwitosći kraja za zachowanje a wožiwjenje delnjoserbšćiny a wobkrući nadawki, zakótwjene w swojim wobzamknjenju z 22. januara 2014. Dale měł krajny sejm braniborskemu knježerstwu nadawk dawać, zdźěłać plan naprawow k skrućenju delnjoserbskeje rěče a jeje nałožowanja w zmysle Serbskeho zakonja. Ze zwjazkami a towarstwami, kotrež šěrja, haja a wožiwjeja w kraju připóznate regionalne a mjeńšinowe rěče, měli so koncepcionelne ćežišća za skutkowanje w zmysle zasadneho dokumenta „Chartowe rěče w Němskej – zhromadna zamołwitosć“ wuwić.
Z namjetom na iniciatiwu Lěwicy chcetej knježerstwowej frakciji předewzaće Rady za serbske naležnosće k skrućenju delnjoserbšćiny kaž tež prócowanja nowozałoženeho towarstwa za regionalnu rěč delnjoněmčinu podpěrać.
Athen (dpa/SN/K). Krótko po tym zo su Grjekojo žadanjam mjezynarodnych pjenjezydawarjow „ně“ prajili, je financny minister Gianis Varoufakis swój wotstup připowědźił. Někotři čłonojo euroskupiny su jemu wědźeć dali, zo jeho přitomnosć na dalšich jednanjach njeje witana. Ministerski prezident Alexis Tsipras ma jeho demisiju za „potencielnje pomocnu“. Varoufakis bě hač do kónca pozicije pjenjezydawarjow kritizował a jich postupowanje „terorizm“ mjenował.
We wčerawšim ludowym woprašowanju je so njenadźicy nahladna wjetšina grjekskich wolerjow přećiwo žadanjam wěrićelow nastupajo reformy a lutowanje wuprajiła. 61,31 procentow wothłosowacych sćěhowaše namołwu premiera Tsiprasa, hłosować „ně“, skrućejo jemu tak rjap. 38,69 procentow rjekny „haj“. Njeposrědnje po swojim „wuspěchu“ Tsipras w telewiziji zwurazni: „Nětko połoži so brěmjo grjekskeho dołha na blido.“ Trěbne su inwesticije a spušćenje dołha. Prioritu ma znowawotewrjenje bankow.