Athen (dpa/SN/K). Dźensa wječor rozsudźi grjekski parlament wo kompromisu z krajemi euroskupiny nastupajo dołh. Jeho schwalenje je wuměnjenje za to, zo wěrićeljo z Athenom wo financnej pomocy jednanja scyła zahaja. Dźe wo dobre 80 miliardow eurow. Dokelž zběha so w lěhwje knježerstwa hač k někotrym ministram mócne spjećowanje, je ministerski prezident Alexis Tsipras na podpěru prawicoweje opozicije pokazany, kotraž wšak móhła jemu wěsta być.
Bjez chłostanja wostanu w Kaliforniskej přichodnje ći, kotrymž je trawnik wuschnył. Guwerner stat USA je zakoń podpisał, kotryž komunam zakazuje tajke chłostanja wuprajić. Dotal běchu w někotrych kónčinach kraja wobydlerjam zanjechanych a njerjanych zahrodow dla pjenježne pokuty napołožili. Guwerner je nětko wukazał, wo 25 procentow mjenje wody přetrjebać. Kaliforniska ćerpi hižo něšto lět wulkeje suchoty dla.
Pozdatny pokład piratow před pobrjohom Madagaskara njeeksistuje. Tole su fachowcy UNESCO zwěsćili. Namakana 50 kilogramow ćežka dula slěbra je we woprawdźitosći wołojowy blok k poćežowanju. Pozdatny wrak piratoweje łódźe je so jako dźěl skóncowaneho dźěla přistawa wukopał. Mustwo ameriskeho slědźerja Barryja Clifforda bě namakanku w juniju wulce prezentowało.
Proces so nachila
Choćebuzu (dpa/SN/ch). Po pašowanju nimale sydom milionow njezacłowjenych cigaretow z Pólskeje do Braniborskeje so Choćebuski proces přećiwo 36lětnemu mužej dawkoweho potajerstwa dla nachila. Dźensa připołdnju přednjesechu pledoajejej, kaž krajne sudnistwo zdźěla. Statne rěčnistwo wobskorženemu wumjetuje, zo je cyłkownu dawkowu škodu něhdźe 1,5 milionow eurow zawinił. Wot lěta 2011 do 2012 je z Pólskeje pochadźacy jako hłowa pašowanskeje cwólby transporty sobu organizował. Wobskorženy wšak wumjetowanja prěje.
Hrajnišćo za krimi