Galway (dpa/SN). Zwjazkowy prezident je na wobydlerjow Europy naležnje apelował, wudobyća europskeje integracije přećiwo prawicarskim a lěwicarskim populistam­ zakitować. Zdobom sej wón žada, hladajo na spochi přiběracu ličbu ćěkancow wobkedźbować, zo so čłowjeske prawa w Europje dodźerža. „Po tym budu nas a Europu sudźić“, rjekny Gauck na uniwersiće w irskim Galwayju.

Lüneburg (dpa/SN). Něhdyšeho SSowca w Auschwitzu Oskara Grüninga je Lüneburgske krajne sudnistwo k štyrjom lětam jastwa zasudźiło. Sudnistwo měješe za dopokazane, zo je Grüning při morjenju 300 000 ludźi sobu pomhał. Hač je chorowaty 94lětny hišće strowotnisce kmany jatbu nastupić, chcedźa pruwować, ručež je wusud płaćiwy. Statne rěčnistwo bě sej třiapołlětne jastwo žadało. Prawiznicy Grüninga sej žadachu jeho pušćić. Gröning bě w procesu moralisku sobuwinu na holocausće přiznał. „Knihownik Auschwitza“ mjenowany bě pjenjezy a drohoćinki zawlečenych ličił a Berlinskej SS posrědkował. Wospjet měješe tež słužbu na „rampje“, hdźež běchu nowych jatych rozrjadowali: do dźěłakmanych a do tych, kotrychž su hnydom do płunowych komorow słali.

Bjez chłostanja wostanu w Kaliforniskej přichodnje ći, kotrymž je trawnik wuschnył. Guwerner stat USA je zakoń podpisał, kotryž komunam zakazuje tajke chłostanja wuprajić. Dotal běchu w někotrych kónčinach kraja wobydlerjam zanjechanych a njerjanych zahrodow dla pjenježne pokuty napołožili. Guwerner je nětko wukazał, wo 25 procentow mjenje wody přetrjebać. Kaliforniska ćerpi hižo něšto lět wulkeje suchoty dla.

Pozdatny pokład piratow před pobrjohom Madagaskara njeeksistuje. Tole su fachowcy UNESCO zwěsćili. Namakana 50 kilogramow ćežka dula slěbra je we woprawdźitosći wołojowy blok k poćežowanju. Pozdatny wrak piratoweje łódźe je so jako dźěl skóncowaneho dźěla přistawa wukopał. Mustwo ameriskeho slědźerja Barryja Clifforda bě namakanku w juniju wulce prezentowało.

Proces so nachila

Choćebuzu (dpa/SN/ch). Po pašowanju nimale sydom milionow njezacłowjenych cigaretow z Pólskeje do Braniborskeje so Choćebuski proces přećiwo 36lětnemu mužej dawkoweho potajerstwa dla nachila. Dźensa připołdnju přednjesechu pledoajejej, kaž krajne sudnistwo­ zdźěla. Statne rěčnistwo wobskorženemu wumjetuje, zo je cyłkownu dawkowu škodu něhdźe 1,5 milionow eurow zawinił. Wot lěta 2011 do 2012 je z Pólskeje pochadźacy jako hłowa pašowanskeje cwólby transporty sobu organizował. Wobskorženy wšak wumje­towanja prěje.

Hrajnišćo za krimi