Mnohostronske rozsudy
Worklecy (SN/MG). Chětro wobšěrny bě dnjowy porjad Worklečanskeje gmejnskeje rady minjeny tydźeń. Radźićelki a radźićeljo mějachu wo najwšelakorišich temach rozsudźić. Tak přizwolichu přitomni na přikład wutworjenju „Přemysłoweho parka při jězoru“ w Smječkecach. Dale bě wobstaranje noweje drasty za wohnjowych wobornikow gmejny wobstatk wuradźowanja.
Drje najwjetša tema bě nowowuhotowanje na Worklečanskej kupje. Za to su nadawki rozdawali. Nastać matej tam multifunkcionalny pawiljon za zarjadowanja kaž tež wučbna sćežka. Hižo wčera zahaji předewzaće ze Zejic prěnje dźěła. Tak započachu štomy pušćeć, zo by městna dosć za twar był. Tež klětuše wólby běchu tema. Tak postajichu wólbny wuběrk za komunalne wólby, kotrež budu klětu 9. junija. Za to maja gmejny Zarjadniskeho zwjazka Při Klóšterskej wodźe zhromadny wuběrk.
Adwentne woknješko
Policija (06.12.23)
Rentnarce móšnju kradnył
Biskopicy. Hižo před dwěmaj tydźenjomaj su 69lětnej žonje w Biskopicach z toboły móšnju pokradnyli. Kaž policija hakle nětko rozprawja, bě rentnarka 23. nowembra w kupnicy na Hasy Carla Marije von Weber. Po wšěm zdaću je skućićel tobołu žony rozrězał a sej móšnju wzał. Hišće samsny dźeń wón štyricyfrowu sumu pjenjez z konta wuměnkarki wotzběhny. Kriminalna słužba Budyskeho policajskeho rewěra so z tymle padom zaběra. Nětko pytaja swědkow, kotřiž su mjenowany dźeń něšto podhladneho wobkedźbowali. Pokiwy přijimuja pod telefonowym čisłom 03591 3560.
Pjenjezy ze słónčneje energije
Slepjanska gmejna fotowoltaikowej připrawje na nasypje přihłosowała
Slepo (AK/SN). Njedaloko Slepoho ma fotowoltaikowa připrawa „Solarny park Wochožanski nasyp“ nastać. Gmejnscy radźićeljo su wčera wotpowědne zrěčenje a wustawki wobzamknyli. Nošer projekta je Mnichowska firma Kronos Solar. Wona gmejnje zakonsce zapisany solarny wotedawk přilubi a chce tohorunja wo dalšich financielnych podpěrach rozmyslować. Gmejna dóstanje dwaj centaj na kilowattowu hodźinu. Při wunošku 52 megawattow by to na 30 lět něhdźe tři miliony eurow było, wuliči jednaćel firmy Frank Bohne.
Kronos Solar chce wobydlerjow při zwoprawdźenju projekta sobu zapřijeć. Tuchwilu nastawa internetna platforma. „W januaru 2024 chcemy předstajić, kak móža so wobydlerjo na solarnej připrawje wobdźělić“, rozłoži zamołwity za projekt Niklas Lischka. „Wot decembra 2024 ma solarna připrawa milinu produkować.“
Žiwa protyka w nowym měsće
Tak mjenowane žiwe adwentne protyki mjeztym w mnohich městach a wsach přewjedu. We Wojerecach maja samo dwaj. Tón w starym měsće ma hižo dołhu tradiciju. W nowym měsće porno tomu je tale forma adwentneje zhromadnosće chětro nowa.
Wojerecy (SiR/SN). Hižo dlěje hač 20 lět maja we Wojerowskim starym měsće žiwu adwentnu protyku. „Tajku chcychmy rady tež w našim nowoměšćanskim dźělu měć“, powěda Christian Völker-Kieschnick. Wojerowčan znaje tradiciju ze stareho města z časa dźěćatstwa a wobdźiwuje kóždolětneho organizatora Torstena Vogela. Zo móhli w nowym měsće podobne poskićić, někotři akterojo před lětami tajku akciju do žiwjenja zwołachu. Zwoprawdźenju pak je tehdy korona zadźěwała. Hakle loni tak daloko bě, zo móžachu swoju žiwu adwentnu protyku přewjesć. Tele dny so wona nětko druhi raz wotměwa.
Zapósłanc Sakskeho krajneho sejma Alojs Mikławšk (CDU) je dźensa ...
Krótkopowěsće (06.12.23)
Burja dóstanu zarunanje
Drježdźany. Hladajo na pozdźišo wupłaćene pjenjezy EU, kotrež so wot decembra na februar přesunu, dóstanu ratarjo w Sakskej pjenježne wurunanje. Na to dojednachu so wčera zapósłancy kabineta. Wurunanje je jónkrótne a pawšalne a dyrbi kóšty na přikład danje kreditow zarunać. Kelko ratarskich zawodow je w nuzy a budźe próstwu zapodać, dotal jasne njeje.
Wjesne kónčiny spěchować
Drježdźany. Sakska wobdźěli so z wosom regionami na zwjazkowym programje „Aller.Land“, z kotrymž so wjesne kónčiny w kulturnym wobłuku spěchuja. Nimo Budyskich wjesnych kónčinow je tež sewjerny Zhorjelski wokrjes zapřijaty. W cyłku je 93 wjesnych regionow po cyłej Němskej wobdźělene, zdźěli zwjazkowe ministerstwo za kulturu a turizm.
Při ponowjenju pomhać
Ćerpjeć na dušaty dych 1. dźěl
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (33).
