Nowa załožbowa rada swoje nadawki zaměrnje zwoprawdźa
Budyšin (SN/JaW). Nowa rada Załožby za serbski lud z předsydu Janom Budarjom swoje njedawno hakle stajene nadawki chutnje bjerje a zaměrnje zwoprawdźa. Tak su so jeje serbscy zastupnicy předwčerawšim w Budyšinje prěni króć na wuradźowanju zastupjerjow serbskich institucijow wobdźělili. „Smy wo přihoće 3. koła serbskich institucijow zhonili a so na Domowinje naprašowali, hač njemóhli so wobdźělić, wšako by njezmysł był dalše rozmołwne koło k spjelnjenju našich nadawkow załožić“, rjekny předsyda załožboweje rady Jan Budar na naprašowanje SN. Tak nawjazuja lěpši zwisk a poměr k institucijam, kaž bě to Budar po swojim wuzwolenju 28. apryla na nowinarskej konferency w Budyšinje zjawnosći připowědźił. Zdobom chce załožbowa rada tež mjezsobnu komunikaciju a informaciju mjez institucijemi, zarjadom a radu załožby polěpšić, na čimž je po słowach Budarja w zašłosći tola chětro klacało.