Runje na tymle městnje by hrajna rozprawa wolejbuloweho derbyja mjez prěnimaj mustwomaj MSV Budyšina a Viktorije Worklecy stać dyrbjała. Ale stupaceje ličby na koronu schorjenych dla knježi wot póndźele, 22. nowembra, měr w sakskich sportownjach.
Na zakładźe postajenjow knježerstwa je so Sakski wolejbulowy zwjazk (SSVB) rozsudźił, sezonu najprjedy raz hač do kónca lěta přetorhnyć. Tak dyrbješe tež horjeka mjenowany wokrjesny derby w Budyšinje wupadnyć. Worklečanscy wolejbulisća běchu so jara na hru wjeselili a chcychu so za poražku w zašłym lěće rewanšować. Loni přěhrachu mjenujcy přećiwo Budyšanam po sadźbach jasnje z 0:3, ale po dypkach jara snadnje. Lětsa chcychu na kóždy pad dypkować. Škoda. A hač klětu w januarje z hrajnej dobu dale póńdźe, je wjac hač dwělomne.