To a tamne (28.01.19)
Krótka jězba z awtom změje za 18lětneho w delnjej Frankskej chutne sćěhi: Wón bě sej w Bad Neustadće nad Solawu cuzy wóz hrabnył, zo by – kaž sam rjekny – spěšnišo domoj a na nuziku był. Awto 34lětneje steješe ze zapinjenym motorom při puću. Žona informowaše policiju, po tym zo bě awto preč. Młodźenc krótko na to z nim zaso wróćo přijědźe a powědaše policiji, zo dyrbješe nuznje na pjaty róžk. Přiwšěm dyrbi so nětko zamołwić, dokelž bě awto wzał a połdra kilometra hač domoj bjez jězbneje dowolnosće jěł.
Z klěšćemi dyrbješe zwjazkowa policija muža z ćahoweho wotdźěla wuswobodźić. 48lětny bě na jězbje z Züricha do Hamburga wotdźěl za šěsć ludźi z kolesowym zamkom wotnutřka zamknył, dokelž so paduchow boješe, a lehny so spać. W Hamburgu pak zamk hižo njefungowaše. Tak dyrbjachu zastojnicy pomhać.
Maduro chce z opoziciju rěčeć
Caracas (dpa/SN). Na iniciatiwu Mexika a Uruguayja za nowy politiski dialog we Venezueli je prezident Nicolás Maduro zwólniwy z opoziciju rěčeć. „Podpěruju namjet noweje mjezynarodneje iniciatiwy za dialog mjez politiskimi mocami“, piše Maduro w interneće. Zawčerawšim, srjedu, bě so šef parlamenta Juan Guaidó sam za noweho přechodneho prezidenta deklarował a tak Madura wužadał. USA, EU a dalše łaćonskoameriske staty su Guaida mjeztym jako noweho prezidenta připóznali.
Wo raketowe zrěčenje šło
Brüssel (dpa/SN). W zwadźe wo zrěčenje INF, kotrež zakazuje twar raketow srjedźneje distancy, su so zastupnicy Ruskeje dźensa hišće raz ze 29 krajemi NATO zetkali. Při tym dźěše wo wumjetowanje, zo Ruska ze swojimi nowymi raketami zrěčenje z USA rani. Z teje přičiny běchu jej USA loni kónc lěta ultimatum stajili. Njedyrbjała-li Ruska hač do kónca januara swoje rakety zničić, chcyli USA před wjace hač 30 lětami wotzamknjene zrěčenje spočatk februara wupowědźić. Ruska wumjetowanja wotpokazuje.
Bamž jatych wopytał
Z prózdnymi talerjemi w ruce su přistajeni stata a druzy ...
Wo politikarjow AfD wopomnišćo njerodźi
Dźěłarnistwo policije za tempolimit
Woidke za wjetšu sprawnosć ludźom napřećo
Drježdźany (dpa/SN). W zwisku ze skónčenjom zmilinjenja brunicy chcedźa we Łužicy znajmjeńša jednu zwjazkowu instituciju zaměstnić. W pozadkowych rozmołwach mjez potrjechenymaj wuhlowymaj krajomaj Sakskej a Braniborskej a ze zwjazkowym knježerstwom je rěč wo tysac dźěłowych městnach, zo bychu strukturnu změnu podpěrali. To rozprawja nowina Lausitzer Rundschau, powołaca so na informacije wobdźělnikow.
Sakski ministerski prezident Michael Kretschmer (CDU) je wobkrućił, zo wo mjenowanych naležnosćach jednaja. „Rěčimy při tym wo zarjadniskich dźěłowych městnach kaž tež wo Zwjazkowej woborje. Jedyn bataljon abo dwaj byštej hospodarske rozrisanje za města kaž Běłu Wodu a Grodk byłoj“, rjekny Kretschmer, kiž so zdobom za to wupraji slědźenske institucije Zwjazka we Łužicy zaměstnić. Sakski knježerstwowy šef žada sej w padźe skónčenja wudobywanja brunicy kóždolětnje 1,5 miliardow eurow na časowu dobu 40 lět.
To a tamne (25.01.19)
Spaleny lěs pola Treuenbrietzena w Braniborskej je hudźbnej skupinje runje prawa kulisa za nowy hudźbny widejo. Band Subway je tam tele dny widejo za nowy spěw „Imperator Rex Graecorum“ nahrawała. Loni w awgusće bě so 400 hektarow lěsa wotpaliło, 550 ludźi dyrbješe swoje domy nachwilnje wopušćić. „Trjebachmy za song kulisu z atmosferu kónca swěta“, měnješe gitarist skupiny. W spěwje zaběraja so hudźbnicy z wobswětom a globalnym woćoplenjom zemje.
Podnurjene awto z Teltowskeho kanala w Berlinje je wohnjowa wobora wućahnyła. Jězdźidło bě srjedu do kanala padnyło. Do toho bě so z nim 29lětna šoferka w měšćanskim dźělu Neukölln zabłudźiła. Dokelž bě jej špatnje, wona z awta wulěze. Na to wóz sam dale jědźeše a skónčnje do kanala. Po dołhim pytanju su jón wobornicy a policija skónčnje našli.
Jónu los rozsudźić měł
Choćebuz (SN/at). Ličba serbskich čłonow rady Załožby za serbski lud za wólbnu dobu 2019–2023 je dospołna. Rada za naležnosće Serbow w Braniborskej je wčera w Choćebuskim měšćanskim domje Marcusa Końcarja a Franka Kosyka za rjadneju radźićelow kaž tež Dianu Šejcowu a Babettu Zenkerowu za jeju zastupjerce woliła. Dokelž je čłon serbskeje rady Marcus Końcaŕ za załožbowu radu kandidował, bě wón zajaty a njeje sobu wolił. Tak mějachu štyrjo serbscy radźićeljo rozsudźić, štó Delnich Serbow w přichodnej załožbowej radźe zastupuje.
Trump narěč přestorčił
Washington (dpa/SN). Prezident USA Donald Trump je swoju za 29. januar planowanu narěč k połoženju naroda přestorčił. Wón chcył hakle k wobydlerjam rěčeć, hdyž budźe blokada etata zaso zběhnjena, kaž wčera twitterowaše. Poprawom chcyše Trump swoju tradicionalnu narěč w Domje reprezentantow dźeržeć. Prezidentka domu, demokratka Nancy Pelosi, pak to jemu blokady etata dla dowoliła njeje.
Ruska Turkowsku namołwja
Moskwa (dpa/SN). Hladajo na planowane cofnjenje wojakow USA ze Syriskeje je Ruska Turkowsku namołwjała, raznišo přećiwo teroristiskim skupinam w zběžkarskej kónčinje Idlib postupować. Najebać wuspěchi dyrbi Turkowska dale aktiwna wostać, rjekny ruski prezident Wladimir Putin turkowskemu prezidentej Recepej Tayyipej Erdoğanej w Moskwje. Wujednane njemilitarizowane pasmo njesměła přičina być popušćić.
Čěska zaruča prawa Britow
