Alexander PólkH 7
1Prěni Serbski sejm je wosebje wažny, dokelž změje nadawk prawidła wujednać, po kotrychž móže w přichodźe skutkować, takrjec „Serbsku wustawu“. Tutón proces chcu ze swojej stawizniskej a politisko-teoretiskej ekspertizu přewodźeć a zaručić, zo so wustawa na historisce pruwowanych směrnicach liberalizma orientuje.
2Dołhodobny zaměr ideje sejma je organizować serbsku towaršnosć w formje korporacije zjawneho prawa. Tajka skići serbskemu ludej mjez druhim lěpši juristiski „grat“ samopostajowanje zwoprawdźić. Dale zaruča princip demokratiskich wólbow wjetšu zamołwitosć kóždeho zapósłanca napřećo ludej: Chceš-li dale zapósłanc wostać, dyrbiš so wo „dobru politiku“ starać, hewak će ludźo njewola.
3Zdźěłanje wustawy je prěnjotny nadawk prěnjeho sejma. K tomu je njewobeńdźomne so tež z etablěrowanymi akterami wujednać – wosebje z Domowinu. Chcu so wo spěšne a za wšitkich serbskich akterow spokojace dojednanje prócować.
Tomaš ČornakH 8
1Chcu přewzać zamołwitosć za wšitko, štož činimy. Žro skutkowanja měri so na wnučkokmanosć našeje towaršnosće. Serbja dyrbja so wo swoje naležnosće sami starać směć a swój přichod zaručić. Štož so w našim małym ludźe započina, móže so runje tak we wulkim wuwić a wjetšim ludam z přikładom być. Tak je so to tež w Njebjelčanskej gmejnje započało.
2Jako wjesnjanosta, wokrjesny radźićel a bywši čłon serbskeje rady wšudźe dožiwich, zo smy stajnje prošerjo w swójskich naležnosćach. Tučasnje nimamy žane prawa, struktury a móžnosće, zajimy Serbow a jich naležnosće skutkownje přesadźić. To zamóže jenož demokratisce woleny sejm, wujednawacy z němskim knježerstwom statne zrěčenje, na kotrehož zakładźe hodźeli so naležnosće Serbow na jich dobro rjadować.
3Prěni krok budźe so wo připóznaće wólbow starać. Dale chcu so zasadźić za paritetiske wujednanje nadawkow mjez Hornjej a Delnjej Łužicu.
Dr. Tomaš WornarH 9
1Widźu w kandidaturje předewšěm składnosć, přewzać zamołwitosć a so wo to starać, zo bychmy sebi jako narod te trajace prawa a móžnosće zawěsćili, kotrež za dalši wobstatk naroda trjebamy. Nadźijam so, zo by Serbski sejm narodne wědomje wozrodźił a zo by so tak přiběracej politiskej pasiwiće wjetšiny Serbow zadźěwało. Je najwjetši čas, zo wozmjemy starosć wo přichod našeho ludu tež na politiskej runinje do našich rukow.
2Najwjetšu lěpšinu widźu w demokratiskej legitimaciji Serbskeho sejma, jako woleny organ wšěch Serbow a kotryž je njewotwisny wot politiskich stronow a towarstwow. Trjebamy w času politiskich njewěstosćow cyłk na krutej prawniskej, organizatoriskej a politiskej bazy.
3Najwažniši nadawk budźe, bazu Serbskeho sejma rozšěrjeć, wobmyslenja wottwarjeć a wšitke demokratiske mocy zjednoćeć. Dalše šćěpjenje a roztřěskanje našich snadnych narodnych resursow sebi dowolić njemóžemy.
Christine Maria RubyH 10
1Je mi naležnosć wutroby, zo ludźo we Łužicy a w susodnym sakskim rumje wuknu so lěpje zrozumić. Mamy telko zhromadneho, ale tež wšelakorosće su přewšo powabne. Dwurěčna kónčina je wulki dar stawiznow!
2Parlament ma wo wjele wjetši wuznam hač kóžde zhromadźenstwo zajimow. Njeje přičiny, čehodla njeměł porno swojim susodam tak wotewrjeny serbski lud žane parlamentariske zastupnistwo měć. Njeńdźe jenož wo zajimy, ale wo runostajenje, sprawnosć a wo zachowanje kultury. Mamy w Europje mnohe přikłady, hdźež to wuspěšnje praktikuja. Wot nich móžemy tola wuknyć.
3Chcu so zasadźić za přichod Swjedźenja serbskeje poezije we wobłuku staroměšćanskeho swjedźenja. Za to, zo wuměłstwo serbskeho kraja skutkownje na němskorěčnu wokolinu wuprudźi. Hłownje pak dźe wo to, zhromadnje ze serbskimi sobuwojowarjemi strukturnu změnu we Łužicy sobu wuhotować, tak derje kaž jenož móžno.
Sven Scheidemantel H 11
1Štóž so z přeswědčenja wobdźěli, móže druhich Serbowkow a Serbow zahorić. Ze swojim konstruktiwnym a pragmatiskim sobudźěłom w Serbskim sejmje chcu najprjedy mosty twarić a předsudki wotstronić.
2Serbski sejm je na legitimaciju serbskeho ludu złožowacy so woprawdźity parlamentariski gremij. Skónčnje budźe móžnosć, za Serbow organowu wobskóržbu na Europskim sudnistwje a na Mjezynarodnym sudnistwje za čłowjeske prawa wjesć. Sejm budźe legitimowany partner w jednanjach wo pjenjezy za Załožbu za serbski lud a wo kulturnym a kubłanskim planje w serbskim rěčnym rumje.
3Wažne su mi nowe jednanja wo wustawkach a financach z pjenjezydawarjemi Załožby za serbski lud, ale tež financne jednanja z knježerstwomaj Sakskeje a Braniborskeje nastupajo ewaluaciju, zawěsćenje a rozšěrjenje rěčspěchowacych poskitkow na wšěch zakładnych a dalewjeducych šulach/gymnazijach w serbskim sydlenskim rumje.
Dr. Stefan Nawka H 12
1Podpěruju iniciatiwu wo wjetšu samostatnosć Serbow, předewšěm na kulturnym, kubłanskim a wosebje rěčnym polu.
2Tuta nowa struktura je přez wólby legitimowane zastupnistwo Serbow, kotrež podpěruje wěstu samostatnosć a njewotwisnosć. Wobsteji tuž wulka šansa, wažne prašenja awtonomije rozsudźić.
3Za wažne wobłuki mam rěčne wukubłanje našeje młodeje inteligency, polěpšić šulsku strukturu a atraktiwnosć serbskeho sydlenskeho ruma.
Gerat ŠramH 13
1Kandiduju, dokelž chcu aktiwnje přinošować k zachowanju serbskich tradicijow a rěče. Mi na wutrobje leži, zo so w kubłanju serbski lud a jeho kultura bóle wobkedźbujetej.
2Serbski parlament změje wjace wliwa na politiku a towaršnosć, hač je to tuchwilu móžno. Sejm budźe samopostajowanje serbskeho ludu pohonjeć.
3W padźe wuzwolenja budu so za to zasadźeć, zo so wo wšitkich wobydlerjow njewotwisnje wot rěče a pochada, kotřiž w serbskim sydlenskim rumje bydla, staramy. Chcemy docpěć, zo so starši z rěčnje widźanych měšanych mandźelstwow nastupajo kubłanje za to rozsudźa, zo jich dźěći serbske kubłanišćo wopytaja a tak hižo w pěstowarni serbsku rěč nawuknu. Přetož dźěći su přichod, wone rěč a kulturu dale zachowaja.
Jadwiga PjacecH 14
1Přeju sej, zo naši potomnicy bohatstwo serbskeje rěče a kultury zeznaja. Runje małe ludy měli so wuraznje přez wosebite prawa škitać. Naše prawa pak so njemóža w dosahacej měrje wuwojować. Mamy tójšto němskorěčnych Serbow, kotřiž njemóžachu serbsku šulu wopytać. Kelko serbskich šulow so w zašłosći zawrěchu kaž w Chrósćicach atd.? To je jedna přičina, čehodla kandiduju. Serbski sejm je šansa přežiwjenje Serbstwa zaručić.
2Swoje móžnosće jako lud njewučerpamy, wšako na politiskej runinje předwidźane njejsu. Serbski sejm pak je ludowe zastupnistwo: Lud ma móžnosć swojich zastupjerjow wolić a tak swójske žiwjenje sobu postajować.
3Spočatnje zasadźuju so za wutworjenje Zhromadźenstwa Serbow jako korporacije zjawneho prawa. Je zakład za wujednanje prawow z knježerstwom. Polěpšić maja so kubłanske struktury a marketing serbskeho luda, štož je nowy hospodarski potencial. Při tym kładu wažnosć na transparencu, mosćik mjez ludom a Serbskim sejmom.
Dr. Andreas KlugeH 15
1Chcu kulturnopolitiske ideje za wožiwjenje serbskeje rěče a wšědneje kultury zwoprawdźić, kaž su te za Němcow w Belgiskej, za Retoromanow w Šwicarskej mjeztym samozrozumliwe.
2Statne žadanje, zo měli Serbja zhromadnu poziciju wuwić, kak chcedźa sebi skutkowniše zastupnistwo rjadować, hodźi so po principach wustawy Němskeje jeno z parlamentom zwoprawdźić. Demokratisce njelegitimowane formy zastupjenja wosłabjeja móžnosće serbskeho ludu, swójske kulturne trěbnoty, kotrež wot potrjebow wjetšiny wotchileja, skutkownje přesadźić.
3Bytostne je skrućenje serbskeho sebjewědomja jako woprawdźe runohódny, konstitutiwny dźělny statny lud w Němskej a posrědkowanje zrozumjenja za to, zo je přičina chroniskeho podfinancowanja serbskeho kulturneho systema na wšěch runinach eklatantny njepoměr mjez dawkami, płaćenymi wot Serbow do cyłostatneho němskeho systema, a srědkami, kotrež jako jałmožny přez Załožbu za serbski lud dóstanu.
Dr. Měrćin KrawcH 16
1Do Serbskeho sejma přinjesu perspektiwu němsce rěčacych Serbow, nazhonjenja w politiskich a w (ludo-) prawniskich prašenjach, kotrež sym sej za čas skutkowanja w iniciatiwje za serbski parlament přiswojił, kaž tež na wurunanje zajimow wusměrjene wodźenje jednanjow.
2Serbski sejm jako ludowe zastupnistwo dźěru w demokratiji wupjelni a je trěbne, zo bychmy naš lud na runinu zjawnostno-prawniskeje skutkownosće pozběhnyli.
3Serbskemu ludej ma so prawniska wosoba spožčić jako korporacija zjawneho prawa ze sejmom jako legislatiwu na zakładźe statneho zrěčenja mjez Sakskej a Braniborskej. Prawa a winowatosće nastupajo nutřkowne samopostajowanje w kulturnych a zdźěla kubłanskich prašenjach (2. statne zrěčenje) wujednać. Dźe wo to, Witaj, 2plus a rěčne kubłanje za dorosćenych kwantitatiwnje a kwalitatiwnje polěpšeć. Chcu so zasadźić za połne programy w hornjo- a delnjoserbskej rěči w rozhłosu a telewiziji.
