To a tamne (25.06.18)
Titul „najwohidniši pos“ nosy wotnětka jendźelska buldoga „Zsa Zsa“. Dźewjeć lět stare zwěrjo je wubědźowanje „World’s Ugliest Dog“ w kaliforniskim Petaluma dobyło, kaž sćelak ABC7 zdźěli. Wobsedźerka Megan Brainard dósta myto 1 500 dolarow. Cyłkownje 15 psow bě za lětuše wubědźowanje, kotrež mjeztym nimale 30 lět přewjeduja, přizjewjenych. Tam njehódnoća jenož wonkownosće, ale tež charakter štyrinohačow.
Wulka myš je w Indiskej papjerjane pjenjezy w hódnoće 15 000 eurow zežrała, a to w pjenježnym awtomaće. Jako nastroj wjace njefungowaše, jón sobudźěłaćerjo banki wočinichu a namakachu w nim mortwu myš, wobdatu wot lutych roztorhanych pjenjez. Prawdźepodobnje bě so wona přez dźěrku za kable do awtomata zadobyła.
Libanonej pomoc poskićiła
Beirut (dpa/SN). Zwjazkowa kanclerka Angela Merkel (CDU) je na wopyće w Beiruće Libanonej dalšu podpěru Němskeje přilubiła. Zetkanje kanclerki Merkel z ministerskim prezidentom Saadom Haririjom wčera wječor bě „bjezporočne“, rěkaše z kruhow knježerstwa. Wjacenabožinski kraj ćerpi wobydlerskeje wójny w susodnej Syriskej dla. Mjeztym su w Libanonje, kotryž ma runje šěsć milionow wobydlerjow, nimale milion syriskich ćěkancow zaměstnili.
Cła EU nětko płaćiwe
Brüssel (dpa/SN). We wikowanskej zwadźe z USA je Europska unija zhromadnu wotmołwu našła. Wot minjeneje nocy płaća cłostanske cła za ameriske wudźěłki kaž whisky, jeansy, motorske a zemskoworješkowu butru. EU reaguje tak na wot prezidenta USA Donalda Trumpa wukazane cła na europski wocl a aluminij. Mjeztym je tež Indiska produktam z USA chłostanske cła napołožiła.
Bombu dyrbja rozbuchnyć
Njepojěduna wjeršk
Budapest (dpa/SN). Wurjadny wjeršk Europskeje unije wo azylowej politice kónc tydźenja w Brüsselu wotměje so bjez krajow Visegrádskeje štyrki Madźarskeje, Pólskeje, Čěskeje a Słowakskeje. „Njepojědźemy“, rjekny madźarski ministerski prezident Viktor Orbán wčera po wjerškowym zetkanju srjedźoeuropskeje skupiny statow z awstriskim zwjazkowym kanclerom Sebastianom Kurzom. Na informelnym zetkanju w Brüsselu, štyri dny do přichodneho prawidłowneho wjerška EU, wočakuja dotal jědnaće krajow, mjez druhim Awstrisku.
Pólski ministerski prezident Mateusz Morawiecki je prezidenta komisije EU Jeana-Claudea Junckera kritizował. Jeho namjety nastupajo ćěkancow su „njezrozumliwe a njeakceptabelne“.
Wuchowanje Grjekskeje so nachila
Luxemburg (dpa/SN). Akcija k wuchowanju Grjekskeje so po wosom lětach nachila. Wulce zadołženy kraj dóstanje k zakónčenju hišće raz nowe kredity wjacorych miliardow eurow a ma wot awgusta na swójskimaj nohomaj stać. Na to su so financni ministrojo europasma minjenu nóc z grjekskim knježerstwom w Luxemburgu dojednali.
Wobdźěleni maja poslednje wulke napinanje na dobro Grjekskeje za historiski wuspěch. „Grjekska kriza je dźensa wječor nimo“, rjekny financny komisar EU Pierre Moscovici. Grjekski financny minister Euklid Tsakalotos potwjerdźi, zo je grjekske knježerstwo z kompromisom spokojom. „Přiwšěm nihdy njezabudźemy, što je grjekski lud minjene wosom lět přetrać dyrbjał.“
Grjekska dóstanje hišće raz 15 miliardow eurow z třećeho wuchowanskeho paketa, kotryž běchu lěta 2015 załožili.
To a tamne (22.06.18)
Pokradnjeny hoberski awtokran su nětko w Egyptowskej wuhladali. 55 km/h spěšne jězdźidło bě so před tydźenjemi w Stuttgarće bjez kóždeho slěda zhubiło, štož mjez ludźimi wulke zadźiwanje zbudźi. Swědk je 48 tonow ćežki a 200 000 eurow drohi kran w přistawje Alexandrije wuhladał. Prawdźepodobnje běchu paduši kran z łódźu do Egyptowskeje dowjezli.
Płuwajo před policiju ćěkał je 48lětny w bayerskim Pettstadće. Do toho bě wobchadne njezbožo zawinił a ćeknył. Jako zastojnicy dojědźechu, skoči wón do rěki. Policist wědźeše sej pomhać, požči sej koleso pěška a muža na brjoze „přewodźeše“, doniž so tón po dobrym kilometru njepoda. Pola njeho zwěsćichu 1,5 promilow alkohola.
Dróhotwar jasnje předołho traje
Berlin/Malešecy (SN/JaW). Za dozhotowjenje wobjězdki zwjazkoweje dróhi B 156 wokoło Delnjeje Hórki njemóže zwjazkowe knježerstwo hišće žane terminy mjenować. Wo tym informuje łužiski zapósłanc FDP w zwjazkowym sejmje Torsten Herbst. Kaž w nowinskej zdźělence rěka, bě zwjazkowe ministerstwo za wobchad a digitalnu infrastrukturu na naprašowanje Herbsta zdźěliło, zo „njedowola dotalny staw jednanjow žane zawjazowace wuprajenja wo dozhotowjenju čary“.
Zapósłanc Herbst, kiž je zdobom dowěrnik (Obmann) FDP we wobchadnym wuběrku, bě po wopyće Malešanskeje gmejny zwjazkowemu knježerstwu oficialne naprašowanje stajił. „Wobchadne twarske předewzaća w Němskej zwoprawdźić jasnje předołho traje“, rjekny k tomu Torsten Herbst. „Najebać woprawnjeny zajim přirodoškita a soburěčenja wobydlerjow pak njeje móžno, zo relatiwne přewidne twarske projekty kaž w Malešanskej gmejnje, ani w běhu lětdźesatka zwoprawdźene njejsu. Wšako běchu wobjězdku wokoło Delnjeje Hórki hižo lěta 2003 w planje zwjazkowych dróhow jako nuznje trěbnu zastopnjowali.“
Nitrata dla zasudźena
Luxemburg (dpa/SN). Europske sudnistwo w Luxemburgu je Němsku dźensa ranjenja europskeho prawa dla zasudźiło, dokelž njeje knježerstwo wjele lět ničo činiło, zo by koncentraciju nitrata w dnownej wodźe pomjeńšiło. Nitraty pochadźeja zwjetša z hnojiwow w ratarstwje. Kotre konsekwency wusud změje, njeje jasne. Zwjazkowe knježerstwo bě minjeny čas zasady za hnojenje přiwótřiło. Hač to dosaha, dnownu wodu čisćišu dźeržeć, njewědźa.
Němska wjele wuzbytkowała
Berlin (dpa/SN). Němska je w zwisku z pomocnymi paketami za Grjeksku we wobjimje wjacorych miliardow eurow wot lěta 2010 cyłkownje něhdźe 2,9 miliardow eurow dobytka z danje wuzbytkowała. To wuchadźa z wotmołwy zwjazkoweho knježerstwa na naprašowanje Zelenych, kotraž powěsćerni dpa předleži. Fachowc Zelenych za etat Sven-Christian Kindler žada sej hladajo na dobytk zniženje dawkow w Grjekskej. „Hinak hač stajnje twjerdźene je Němska z krizy masiwnje profitowała. Njemóže być, zo knježerstwo z dobytkami z Grjekskeje zwjazkowy etat saněruje.“
Starši a dźěći zaso hromadźe
