Po zahubnych lěsnych wohenjach minjeneju dnjow pokazuje so w ...
Ratarjo: Płaćizny wudźěłkow zwyšić
Berlin (dpa/SN). Trajaceje horcoty a suchoty w mnohich kónčinach Němskeje dla žada sej Dźěłowe zjednoćenstwo burske ratarstwo (AbL) wyše płaćizny za ratarske wudźěłki a wjerškowe zetkanje ze zastupnikami žiwidłoweje branše a wikowanja. Wšitcy wobdźěleni dyrbjeli zhromadnje spěšne njeběrokratiske pomocne naprawy tež zwonka ryzy pjenježneje pomocy diskutować a wobzamknyć, rěka w zdźělence ekologisce orientowaneho zwjazka. „Eksistencu wohrožowacu krizu móžemy jenož ze spěšnym zwyšenjom płaćiznow ratarskich wudźěłkow zmištrować.“ Partnerojo ratarjow, kaž mlokarnje a rězarnje, tola tež burja sami, dyrbjeli nětko zamołwitosć přewzać.
W druhich wobłukach je z wašnjom, straty a přidatne wudawki přez płaćiznu přetrjebarjam napołožić, zdźěli rěčnik zwjazka medijam. Předewšěm prodrustwowi wikowarjo dyrbjeli swojim kupcam połoženje ratarjow rozjasnić a na wyšich płaćiznach wobstawać. Statne pomocy kaž nachwilne spušćenje dawkow abo dočasne wupłaćenje premijow su jenož „kapka na horcy kamjeń“.
Trump: Wšitke cła wotstronić
Washington (dpa/SN). Do swojeho zetkanja z wodźacymi zastupnikami EU wikowanskeje zwady dla je prezident USA Donald Trump deal namjetował, do kotrehož zwoprawdźenja wón drje sam njewěri: USA kaž tež Europska unija móhli wšitke cła, wikowanske zadźěwki a subwencije wotstronić, Trump wčera na Twitter pisaše. „Potom bychmy to měli, štož so swobodne wiki a fairne wikowanje mjenuje. Nadźijam so, zo su woni k tomu zwólniwi – woni pak to njebudu.“
Prezident komisije EU Jean-Claude Juncker chcyše so dźensa w Běłym domje we Washingtonje z Trumpom zetkać, zo by dalšej eskalaciji wikowanskeje zwady zadźěwał. Trump bě hrozył, wudźěłkam z Europy dalše cła napołožić, njedyrbjała-li EU ke kompromisam zwólniwa być. „Cła su to najwjetše“, Trump na samsnym městnje piše. Jenož „fairne wikowanske zrěčenja“ su woprawdźita alternatiwa. Što wón z tym měni, je dale njewěste. Juncker chce tomu zadźěwać, zo sej USA přichodnje tež wyše cła za europske awta žadaja.
Boja so komplikacijow
Zwjazkowe knježerstwo přećiwo serbskim kóncowkam w dokumentach
Berlin (SN/MkWj). Na njedawnej „Rozmołwje ze Saksami“ ministerskeho prezidenta Michaela Kretschmera (CDU) w Budyšinje je so runje tak wo tym rěčało kaž na zjawnym posedźenju sakskeho wuběrka za wědomosć, wysoke šule a kulturu Sakskeho krajneho sejma srjedź junija: Móžnosć, zo móža Serbowki swoju serbsku kóncowku swójbneho mjena do wupokaza zapisać dać. Dokelž dyrbjało zwjazkowe knježerstwo za to wobstejacy zakoń wo změnje mjena za přisłušnikow narodneje mjeńšiny (Minderheitennamensänderungsgesetz) z lěta 1997 wotpowědnje změnić, je so zapósłanča Lěwicy w zwjazkowym sejmje Caren Lay z pisomnym naprašowanjom na zwjazkowe ministerstwo za justicu a škit přetrjebarjow wobroćiła. Wona chcyše wědźeć, ke kajkemu wuslědkej je knježerstwo w Berlinje při pruwowanju wotpowědneje próstwy přišło a hač ma zasadnje za trjeba, zo směli Serbowki specifisku žónsku kóncowku w dokumentach wužiwać.
„-owa“ abo „-aua“?
10. rockowy koncert na Wótšowskej dožiwili
Lubnjow (PB/SN). Něšto stow ludźi je minjeny kónc tydźenja mjeztym 10. rockowy koncert na błótowskej kupje Wótšowska dožiwiło. Tójšto z nich bě z čołmikami k wotležanemu hosćencej přijěło, tak zo ležeše na kóncu wjace hač sto čołmikow w přistawje.
Jedna z nowostkow lětušeho koncerta bě wustup dweju skupin na kóždym wječoru. Nowy wotnajer Wótšowski, Torsten Teichert, bě nimo toho wšelake twarske změny zwoprawdźił. Tak da mjeztym chětro zestarjenej budce wotstronić, zo by wjace městna za jewišćo měł. Tež zastaranje ludźi je přeorganizował a polěpšił. „Sym sej mustwo Kalawskeho měšćanskeho swjedźenja jako podpěru skazał“, hosćencar rjekny. Hižo do zahajenja koncerta dźakowaše so wón wohnjowej woborje a sobudźěłaćerjam wuchowanskeje słužby za zasadźenje. Wosebity dźak pak je sej po jeho słowach přirodoškitny hamt krajnoradneho zarjada zasłužił. Bjez jeho dowolnosće njeby tajki koncert wosrjedź Błótow móžny był.
To a tamne (25.07.18)
Wulke mnóstwo mjasa su njeznaći kónc tydźenja z předawanskeje budki w hornjopfalcowskim Weidenje pokradnyli. Nětko policija slědźi, hdźe su so runočasnje wjetše grilowanske partyje wotměli. Wobsedźer budki dyrbješe póndźelu zwěsćić, zo pobrachuja tři kašćiki piwa, 60 steakow, 40 hamburgerow a płunowa bleša. „Z tym móžeš cyłu kompaniju zastarać“, rěčnik policije rjekny. Nětko nadźijeja so pokiwow swědkow.
Woblubowane lubosćinske zamki na Kölnskim Hohenzollernskim mosće tam najprjedy raz wostanu. Po rozprawach wo móžnej demontaži železnica zdźěla, zo nima planowane, turistisku atrakciju wotstronić. Rěčnik železnicy bě póndźelu připowědźił, zo dyrbja zamki poněčim wotstronić, zo móhli móst znowa wobarbić a tak přećiwo zerzawcej škitać. Tole pak je nětko wotstorčene.
Sudnik dyrbi přihłosować
Karlsruhe (dpa/SN). Pacientow psychiatrije smědźa jenož potom dlěši čas k łožu přiwjazać, je-li sudnik tomu přihłosował. Tole je Zwjazkowe wustawowe sudnistwo w Karlsruhe dźensa rozsudźiło. Potrjechenaj z Bayerskeje a Badensko-Württembergskeje běštaj skoržiłoj. Traje-li přiwjazanje dlěje hač poł hodźiny, lěkarski wukaz hižo njedosaha. Přiwjazaja-li pacienta w nocy, dyrbja sej přichodne rano sudniski rozsud wobstarać. Přiwjazanje rani zakładne prawo na wosobinsku swobodu, sudnicy měnjachu.
Kwalita so pohubjeńšiła
Berlin (dpa/SN). Po wospjetnym žadanju rjemjesła jewja so nětko tež w politice hłosy, žadajo sej znowapostajenje mišterskeje winowatosće we wšelakich rjemjeslniskich powołanjach. Městopředsyda frakcije CDU/CSU w zwjazkowym sejmje Carsten Linnemann rjekny nowinarjam: „Wotstronjenje mišterskeje winowatosće bě zmylk. Kwalita dźěła je so w tutych powołanjach zdźěla jasnje pohubjeńšiła. Nimo toho wukubłuja mjenje dorosta.“ Knježerstwo SPD a Zelenych bě 2004 mištersku winowatosć za cyły rjad powołanjow zběhnyło.
Wotewru přechod do Gazy
