To a tamne (10.11.17)
We wosebitym, z tryskowym ćěrjenjom wuhotowanym wobleku je Richard Browning z 41,53 kilometrami na hodźinu po jězorje wuchodnje Londona smalił. Tak je wón najspěšniši čłowjek swěta, kiž je spěšnosć z wosebitym woblekom docpěł. Browning bě z wuslědkom přewšo spokojom, je pak hnydom připowědźił, zo chce spěšnosć hišće raz přetrjechić.
80lětny Sewjerorynsko-Westfalčan je so wjac hač 30 króć do chorownje zadobył a tam w stwach pacientow drohoćinki kradnył. Wuměnkar je za swoju starobu chětro sportowski. Wšako je prawidłownje přez wonkownu fasadu na balkony zalězł. Wottam bě jemu lochko so do jstwow dóstać. Nětko je jeho policija tola lepiła. Poslednje zadobywanje wšak dyrbješe 80lětny přiznać, k tamnym wón mjelči.
Tajna papjera ze 125 dypkami
Berlin (dpa/SN). Wuslědki sonděrowanskich rozmołwow potencielneje jamaiskeje koalicije su dale a konkretniše. Tole wuchadźa z poprawom tajneje papjery, kotraž powěsćerni dpa předleži. Zjimane su tam dypki jednotliwych partnerow, kotrež njejsu hišće doskónčnje wobjednawane. Cyłkownje wopřijima dźěłowy katalog 125 dypkow w dwanaće temowych wobłukach. Dale su jednotliwe aspekty štyrjoch partnerow CDU, CSU, FDP a Zelenych ke kóždemu dypkej zjimane.
Dawkowu prognozu předstajił
Berlin (dpa/SN). Amtěrowacy zwjazkowy financny minister Peter Altmaier (CDU) chcyše dźensa popołdnju wuslědki dawkoweje prognozy předstajić. Po třidnjowskich wuradźowanjach fachowcow Zwjazka a krajow, Zwjazkoweje banki, komunalnych zarjadow, wědomostnych institucijow a statistiskeho zarjada zamołwići knježerstwa dawkowe trochowanja z napjatosću wočakuja. Wuslědki su směrodajne za financne planowanje politiskich zaměrow.
Opel nikomu njewupowědźi
Komisar nižozemskeje prowincy Drenthe Jozias Johannes van Aartsen ...
Wopominaja spad murje
To a tamne (09.11.17)
Zasłuženy dowol porjadnje skazyła je mać swojemu synej w Kölnje. Wona bě policiju zawołała a zdźěliła, zo je 22lětny syn po wšěm zdaću sympatizant teroristiskeje milicy IS a zo poda so nětko do Egyptowskeje. Hišće na lětanišću zastojnicy młodeho muža zadźeržachu. Ale kaž so wukopa, chcyše wón woprawdźe jeno swój dowol w Egyptowskej přežiwić. Skónčnje policija jeho zaso pušći. Lětadło pak bě mjeztym bjez njeho wotlećało.
Rěčna asistentka Alexa předewzaća Amazon je w Pinnebergu pola Hamburga zasadźenje policije zawiniła. Asistentka bě w nocy wótře hudźbu zapinyła. Jako zastojnicy durje bydlenja wočinichu, pak zwěsćichu, zo bě Alexa sama doma. Kak a po kotrym puću je swój přikaz wuwjedła, njeje jasne. Wobsedźer bydlenja „smě“ zasadźenje nětko zapłaćić.
Sewjernu Koreju warnował
Seoul (dpa/SN). Prezident USA Donald Trump je Sewjernu Koreju jasnje warnował. W konflikće mjez Sewjernej a Južnej Koreju pak njeje dale škarał. W swojej narěči před narodnej zhromadźiznu w južnokorejskej stolicy Seoulu rjekny Trump: „Nadźijam so, zo rěču za wšitke swobodne narody a nic jeno za USA, hdyž praju, njepodhódnoćće nas – njewužadujće nas.“ Njedaloko schadźowanišća demonstrowachu mnozy ludźo za a přećiwo ameriskemu prezidentej, při čimž dóńdźe k jednotliwym namócnym rozestajenjam.
Financna branša podhladna
Berlin (dpa/SN). Wotkryća „Paradise Papers“ wo dubioznych financnych praktikach su nětko tež němsku financnu branšu dosćahnyli. Wjacore němske banki, tak rozprawjeja medije, su podhladne wikowanja z ilegalnymi internetnymi Casino-inwesticijemi a tak zdobom systematiskeho ranjenja němskich zakonjow. Někotre, kaž DZ-banka, Postbank a Hypovereinsbank, drje bjeru pjenjezy za njedowolene poskitki hrow wo zbožo.
Namjet za šulski předmjet
Zwjazkowy prezident Frank-Walter Steinmeier a jeho mandźelska Elke ...
Z Orbánom so zetkał
Drježdźany (dpa/SN). Sakski ministerski prezident Stanisław Tilich (CDU) je so wčera w Drježdźanach z madźarskim premierom Viktorom Orbánom zetkał. K jako priwatny termin wozjewjenemu zhromadnemu wobjedej bě po informacijach knježerstwoweho rěčnika Ralpha Schreibera na přeće hosća dóšło. Lěwica w Sakskim krajnym sejmje bě Tilicha napominała, so jasnje a zjawnje wot politiki Orbána distancować, kiž bě wuchodnu a srjedźnu Europu njedawno „conu bjez migrantow“ mjenował.
Byrnjež wobjed na hrodźe Eckberg priwatny charakter měł, wobdźělištej so na nim delegaciji wobeju stron. Nimo hospodarskich poćahow dźěše wo kulturu a Europu. Detaile žane njemjenowachu.
Tež Syriska za škit klimy
Nowe sonděrowanske koło
Wšelake signale, zo so CDU, CSU, FDP a Zeleni dojednaja
Berlin (dpa/SN). Jednanske teamy CDU, CSU, FDP a Zelenych su so wčera popołdnju k dalšemu kołu sonděrowanja w Berlinje zešli. Tam wobjednawachu mjez druhim temy Europa, wonkowna a zakitowanska politika kaž tež kubłanje a digitalizacija.
Sonděrowarjo su nětko w chwatku. Hinak hač spočatnje planowane su so na to dojednali, w małych ekspertowych kruhach hač do pjatka prěnje konkretne namjety rozsudow nastupajo centralne temy zdźěłać chcyć, rjekny parlamentariski jednaćel frakcije Unije Michael Grosse-Brömer (CDU) wčera po prěnich wuradźowanjach druheho koła sonděrowanja w Berlinje. Tomu přizamknychu so stronscy managerojo CSU, FDP a Zelenych. Tónle pjatk maja so mjezywuslědki wulkeho koła hódnoćić. Kaž zwjazkowy jednaćel Zelenych Michael Kellner rjekny, płaći zasadnje: „Ničo njeje dojednane, doniž njeje wšitko dojednane.“
