Žada sej wosebity tribunal
Genf (B/SN). Šwicarska diplomatka Carla Del Ponte ćehnje so wróćo z přepytowanskeje komisije UNO w Syriskej. Gremij za wuswětlenje złóstnistwow za čas syriskeje wobydlerskeje wójny njeje poprawom scyła ničo docpěł. Dołhož wěstotna rada UNO žadyn wosebity tribunal za wójnske złóstnistwa w Syriskej njezasadźuje, su rozprawy dospołnje bjez zmysła. Chinska a Ruska wšitko blokujetej. Po Del Ponte je Syriska kraj bjez přichoda. „Woni wšitko niča, štož je jim někak čłowjeske. To je njemóžne! A wěrće mi: Tajke hrozne złóstnistwa, kajkež je Syriskej skućeja, njejsym ani w Ruandźe ani w Juhosłowjanskej widźała.“ wona dale praji.
Venecuela: Apel cyrkwje
Merkel so z woporami zetkała
Berlin (dpa/SN). Lěto po terorowym nadpadźe na Berlinske hodowne wiki je zwjazkowa kanclerka Angela Merkel (CDU) dźensa popołdnju wopory a přiwuznych přijała. Kritikarjo měnja, zo je to chětro pozdźe. Před tydźenjomaj dósta kanclerski zarjad wosebity list. „Knjeni zwjazkowa kanclerka, nadpad na Breitscheidowym naměsće je tež tragiski sćěh politiskeje lěnjoty Wašeho zwjazkoweho knježerstwa“, tam mjez druhim rěka. Jutře, na poprawnej róčnicy nadpada, su dalše wopominanja planowane.
Kurz kancler Awstriskeje
Wien (dpa/SN). Ze spřisahanjom zwjazkarstwa konserwatiwneje ÖVP a prawicarskich populistow FPÖ změje Awstriska nowe knježerstwo. Zwjazkowy prezident Alexander Van der Bellen pomjenowa dźensa šefa ÖVP Sebastiana Kurza za najmłódšeho knježerstwoweho šefa Europy. Wicekancler je prawicarski populist Heinz-Christian Strache (FPÖ). W srjedźišću koaliciskeho zrěčenja steja krućiši kurs přećiwo migraciji, dawkowe wolóženja a wottwar běrokratije.
Piñera znowa chilski prezident
Zwjazk a krajej měli płaćić
Njebjelčicy (SN/at). Z wotpokazanjom Załožby za serbski lud, prawólby demokratisce woleneho serbskeho parlamenta njepodpěrać, njeje za próstwu zapodawace towarstwo Smy z.t. naležnosć wotbyta.
Z listom z 12. decembra zwjazkowej kanclerce Angeli Merkel (CDU) a ministerskimaj prezidentomaj Braniborskeje a Sakskeje njeporokuja podpisarjo jenož rozsud załožboweje rady, ale wobroćeja so nětko na Zwjazk a krajej, zo bychu wone „wotpowědnje swojej wustawowej zamołwitosći za dźělny statny lud Serbow trěbne srědki za powšitkowne a swobodne wólby demokratisce legitimowaneho zastupnistwa našeho ludu we wobjimje hač do 350 000 eurow přewostajili“.
Zdobom zwospjetowachu próstwu z 1. nowembra nutřkownymaj ministromaj Braniborskeje a Sakskeje, zo komunalne přizjewjernje při identifikaciji wolerjow pomhaja, při čimž „hodźała so potrjeba srědkow hižo wo nimale 200 000 eurow pomjeńšić“. Braniborske nutřkowne ministerstwo bě ze spisom ze 17. nowembra tajku podpěru wotpokazało, dokelž njeje trěbneho prawniskeho zakłada. To Smy z.t. w swojim lisće kritizuje.
Kabinet ze štyrjomi nowačkami
Drježdźany (dpa/SN). Knježerstwowej frakciji CDU a SPD stej dźensa jako prěnjej zestawu noweho sakskeho knježerstwa zhoniłoj. Ministerski prezident Michael Kretschmer předstaji jimaj swój kabinet, kotremuž přisłušeja jako nowi w zastojnstwje Matthias Haß – minister financow, Oliver Schenk – šef statneje kenclije, Christian Piwarz – minister za kultus. Do kabineta wróći so Roland Wöller (wšitcy CDU) jako minister nutřkowneho. Wöller bě 2012 zastojnstwo kultusoweho ministra złožił, dokelž njebě trěbnu podpěru dóstał, rozrisać problem hižo tehdy pobrachowacych wučerjow.
Nimo dotalneho financneho minisra Georga Unlanda, kiž bě tydźenja swój wotstup připowědźił, maja Markus Ulbig (nutřkowne), Fritz Jaeckel (šef statneje kenclije, wšitcy CDU) a hakle njedawno pomjenowany kultusowy minister Frank Haubitz (njestronjan) swoje městno rumować. Wšitcy tamni ministrojo w zastojnstwje wostanu.
Socialne strachi chutnje brać
Sakski krajny sejm wuslědki Sakskeho monitora rozjimał
Drježdźany (SN/at). Wuslědki druheho Sakskeho monitora běchu frakcijam přiležnosć, so na minjenym posedźenju Sakskeho krajneho sejma z tematiku zaběrać. Statna kenclija bě institutej dimap lětsa po 2016 druhi raz nadawk dała, zwěsćić, što ludnosć wo sakskej towaršnosći mysli a kotre nastajenja ma.
Sebastian Fischer je za frakciju CDU wuběrane wuslědki interpretował, mjez druhim powšitkownu frustraciju zwěsćił a sej skónčnje dialog „přeco zaso z tymi, kotřiž hinak mysla“, žadał, wšako ma za nadawk zapósłanca, „so z ludźimi do diskusije dać, tež w interneće“.
Pozicija koaliciskeho partnera SPD saha hłubšo: Ludźo w Sakskej „paruja swój sprawny podźěl na towaršnostnym derjeměću“, zwěsći Henning Hohmann. Dokelž je Sakska kraj z najmjeńšim podźělom na tarif wjazanych firmow a z politiku, kotraž je předołho nisku mzdu faworizowała, „dyrbi skrućenje socialneho partnerstwa bytostny zaměr sakskeje politiki być. Trěbna je debata wo sprawnosći, zo bychmy pačenje towaršnosće přewinyli“, Hohmann wuwjedźe.
Ličby a koncepty
Sym podpisała, dokelž ...
... dyrbi rěčna a kulturna mnohotnosć narodnych mjeńšin připóznata a spěchowana być. A to nic jenož w jednotliwych němskich zwjazkowych krajach a w Zwjazkowej republice Němskej, ale po cyłej Europje. Za tule njesměrnje wulku mnohotnosć a pisanosć so jako zapósłanča Zwjazkoweho sejma Němskeje tež jara rady angažuju. Přetož: Što by była Łužica bjez Serbow? Podpěruju tuž wobydlersku iniciatiwu Federalistiskeje unije europskich narodnych mjeńšin Minority SafePack.
Podpěrujće tež wy skrućenje prawow narodnych mjeńšin w Europje a podpisajće Minority SafePack!
Podpisajće tež Wy na internetnej platformje pod www.minority-safepack.eu, pósćelće nam wobraz wo was a přidajće cyle skrótka w dwěmaj sadomaj, što je was pohnuło, wobydlersku iniciatiwu Federalistiskeje unije europskich narodnych mjeńšin FUEN Minority SafePack za škit narodnych mjeńšin w Europje podpěrać. Waš wobraz a tekst pósćelće k wozjewjenju redakciji Serbskich Nowin najlěpje na e-mailowu adresu: redaktion@serbske-nowiny.de.
To a tamne (18.12.17)
Zasadźenje policije zawinili su šulerjo w badensko-württembergskim Lörrachu. Chcychu we wučbje sudniske jednanje přewšo originalnje napodobnić. Za to su rjadowniskemu towaršej ruce sputali. Za naručne puta, kotrež bě sobušulerka minjeny pjatk bjez wědy staršeju wot doma sobu přinjesła, pak pobrachowaše wotpowědny klučik. Dokelž tež policija žadyn tajki njeměješe, wona puta zniči.
32 razow je so motorski w Ludwigsburgu wotpohladnje błyskać dał – doniž jeho njelepichu. Po informacijach města bě 17lětny hač do 43 km/h přespěšny. Tři měsacy je přeco zaso nimo samsneho błyskača jěł, myslo sej, zo motorskeho lepić njemóža. Pječa měješe wjeselo při tym. Město a policija pak stej jeho popadnyłoj. Dyrbi nětko pokutu 7 000 eurow płaćić, změje 36 dypkow w Flensburgu a 15 měsacow zakaz jězdźenja.
Trjebamy prawniski zakład za wšitke mjeńšiny
Wot 1990 je Domowina čłon Federalistiskeje unije europskich narodnych mjeńšin FUEN. Wot wšeho spoačatka pódla je bywši jednaćel Domowiny Bjarnat Cyž. Tuchwilu angažuje so wón čestnohamtsce w zwjazku jako wiceprezident. Tež jemu zaleži jara wjele na tym, zo ma wobydlerska iniciatiwa FUEN Minority SafePack, na kotrejž wšak je sam aktiwnje sobu skutkował, tež wuspěch. Serbske Nowiny su so z Bjarnatom Cyžom wo iniciatiwje FUEN rozmołwjeli.
Sće iniciatiwu hižo podpisał?
Bj. Cyž: Haj, hižo na kongresu Federalistiskeje unije europskich narodnych mjeńšin w meji w rumunskim Cluju-Napoce sym iniciatiwu podpisał.
Serbja w Němskej maja přirunujo z druhimi mjeńšinami w Europje hižo dosć dobry mjeńšinowy škit. Čehodla měli woni wobydlersku iniciatiwu FUEN podpěrać?
Bj. Cyž: Mamy wšu přičinu wobydlersku iniciatiwu Minority SafePack sobu podpěrać, dokelž trjebamy za wšitke awtochtone mjeńšiny w Europje zhromadny prawniski zakład, kotryž zaruča zachowanje rěče a kultury jako najwažniši fundament narodneje identity kóždeho přisłušnika jedneje mjeńšiny.
