Zjězd katolikow w Erfurće
Erfurt (dpa/SN). W durinskej krajnej stolicy Erfurće zahaja dźensa 103. zjězd katolikow Němskeje. Na oficialne wotewrjenje wočakuja dźensa wječor zwjazkoweho prezidenta Franka-Waltera Steinmeiera. Zarjadowanje steji pod hesłom „Přichod słuša čłowjekej měra“. Centralny komitej katolikow Němskeje planuje politiski program ze zwjazkowym kanclerom Olafom Scholzom (SPD), hospodarskim ministrom Robertom Habeckom (Zeleni) a dalšimi politikarjemi.
Macron za nadpady na Rusku
Meseberg (dpa/SN). Francoski prezident Emmanuel Macron chce Ukrainje dowolić, wojerske zepěranišća na teritoriju Ruskeje ze zapadnymi brónjemi nadběhować. „Měli Ukrainje dowolić, wojerske zepěranišća neutralizować, wot kotrychž rakety do směra na Ukrainu třěleja“, rjekny Macron po rozmołwje ze zwjazkowym kanclerom Olafom Scholzom (SPD) w Mesebergu. Scholz njebě tak direktny kaž Macron, bě sej pak zasadnje z francoskim prezidentom přezjedny.
Ruska zwyši dawki za dochody
W dołhich rynkach stejachu ludźo w Južnej Africe dźensa rano před ...
Wuhibki rentoweje reformy stajene
Berlin (dpa/SN). Zwjazkowe knježerstwo je dźensa wuhibki za zawěsćenje rentow w přichodnych lětdźesatkach stajiło. Za to je koło ministrow rentowy paket ministra za dźěło Hubertusa Heila (SPD) a financneho ministra Christiana Lindnera (FDP) schwaliło. Z reformu chcedźa nowow renty znajmjeńša hač do lěta 2039 na niwowje 48 procentow zachować. Zaměr je, zo njewuwiwaja so renty přichodnje słabšo hač mzdy w Němskej.
Runočasnje chcedźa kapitalny zakład wjacorych miliardow eurow na kapitalnych wikach natwarić. Wunoški danje maja wočakowany rozrost popłatkow ludźi do rentoweje kasy wobmjezować. Rentowy paket ma po słowach Hubertusa Heila zaručić, zo renty tež přichodnje dale přiběraja.
Rezolucija žada sej kónc ofensiwy
New York (dpa/SN). Po zahubnym nadpadźe wojerskich lětadłow na lěhwo palestinskich ćěkancow w Gazaskim pasmje z dźesatkami smjertnych woporow žada sej naćisk rezolucije Bjezstrašnostneje rady UNO hnydomny kónc israelskeje wojerskeje ofensiwy. Nimo toho dyrbjał so hnydomny a wot wšěch stron respektowany přiměr wujednać, rěka w naćisku wobzamknjenja, kotrež bě Algeriska zapodała. Islamistisku Hamas namołwjeja, wšitkich zastajencow hnydom pušćić. Tekst rezolucije dopomina tež na Mjezynarodne sudnistwo, kiž bě Israelej před dnjemi kazało, ofensiwu w Rafah na juhu Gazaskeho pasma nablaku skónčić.
Wjacori diplomaća běchu po zetkanju najmócnišeho gremija UNO za zawrjenymi durjemi wčera rjekli, zo chcedźa někotři čłonojo Bjezstrašnostneje rady UNO dokument hišće dźensa wobzamknyć. Při tym wočakowachu, zo USA přećiwo wobzamknjenju swój weto zapołoža. Washington Israel najebać wulku ličbu ciwilnych woporow dale podpěruje. Druzy čłonojo drje rezoluciji přihłosuja.
Wolerjo rozsudźa
Karan wjercha zaso w Rogeńcu
To a tamne (29.05.24)
Paducha kolesa lepili, přesćěhowali a skónčnje policiji přepodali su čłonojo skupiny seniorow w Hannoveru. Rentnarjo běchu paducha wobkedźbowali, jako tón zamk kolesa z elektriskej piłu přerěza, zo škrě lětachu. Seniorojo tomu zadźěwachu, zo paduch wotjědźe. Tež ćělnje njeměješe 49lětny šansu: Mužojo jeho kruće dźeržachu, žona alarmowaše policiju. Zastojnicy paducha zajachu. Wobsedźerka móžeše sej 2 500 eurow drohe koleso pola policije wotewzać.
Policista kusnyła je 36lětna žona w Drježdźanach. Tež kolegowka bu zranjena. Zastojnikow běchu wčera k zwadźe w měšćanskim dźělu Löbtauwje wołali. Jako chcychu policisća naležnosć wujasnić, so žona do 36lětneho policista da a jeho kusny. 21lětnu policistku wona kopny. Rabiatnu žonu po zwěsćenju personalijow pušćichu. Wona dyrbi z chłostanjom ličić.
„Dyrbimy so hibać! Hdyž ničo nječinimy, potom budźe přepozdźe
Hnydom dwaj čěskaj staćanaj kandidujetaj za Serbske wolerske zjednoćenstwo (SWZ) k lětušim wólbam do Budyskeho wokrjesneho sejmika 9. junija.
Budyšin (SN/MiP). Jedyn z njeju je Pavel Šlechta. Studowany slawist a pedagoga je wučer na Swobodnej wyšej šuli w Hamorje. W Němskej bydli dohromady hižo 25 lět, do Łužicy přišoł běše před 16 lětami. „Ja chcu přeco Serbam pomhać“, wotmołwi wón na naprašowanje SN, čehodla za Serbske wolerske zjednoćenstwo kandiduje. „Dyrbimy so hibać! Hdyž ničo nječinimy, potom budźe přepozdźe – runje w tutych časach“, praji 48lětny nan třoch dźěći. Wólbny bój wšak je snadnych financielnych srědkow dla lědma móžny. „Za plakaty njeje pjenjez, smy dotal přeco přez lokalne syće wabili a wězo tež ertnje w našich ‚wosobinskich‘ syćach“.
„Akcija zdobom kampanja“
Budyšin (SN/bn). „Wotewrjenosć a inkluzija“ běštej hesle wčera sedmy raz wuhotowaneje akcije „Happy monday – Wjesoła póndźela“. Na Budyskim Póstowym naměsće powita předsyda Domowiny Dawid Statnik něhdźe 200 zajimcow wuzběhnywši, zo je „akcija zdobom imageowa kampanja za tolerantne a hižo sta lět dwurěčne město“. Program wuhotowachu poetryslammerka Kaddi Cutz a hosćo kaž tež band Zukunftsmusik dešća dla w foyeru Serbskeho domu.
Wyše popłatki za hladanje
Berlin (dpa/SN). Ludźo dyrbja so spočatk lěta 2025 na dalše zwyšenje přinoškow za hladanske zawěsćenje nastajić. Runje tak kaž chorobna kasa DAK liči tež zwjazk narunanskich kasow ze stupacymi přinoškami. Hłowna přičina je snadna pjenježna rezerwa hladanskich kasow, kotraž njedosaha wjace dlěje hač měsac. W tymle padźe smě zwjazkowe knježerstwo popłatk zwyšić. W Němskej ličba hladanja potrěbnych raznje přiběra.
Raketa po starće rozbuchnyła
