Drježdźany (dpa/SN). Hač do kónca septembra ma Caroliny móst w Drježdźanach dospołnje zwottorhany być. Wottorhanske dźěła spěšnišo pokročuja hač bě wočakowane. Tuchwilu su samo dwaj měsacaj spěšniše hač po časowym planje, Drježdźanske měšćanske zarjadnistwo zdźěla. Po tym chcedźa Terasowy brjóh zrumować a nastate škody wuporjedźeć. Tole ma hač do kónca oktobra trać. Po informacijach města planowane kóšty 18 milionow euro njepřekroča. „Před dźěłom twarskich dźěłaćerjow ­móžu jenož kłobuk zejmować. Kak spěšnje su njewšědne dźěła pod wobćežnymi wuměnjenjemi zmištrowali, žada sej najwjetši respekt“, rjekny wyši měšćanosta Dirk Hilbert (FDP) hladajo na horcotu minjenych dnjow. Tysacy tonow betona su dotal wotwozyli.

Najwažniše nětko je, zo jězbnu čaru za łódźe we Łobju zrumuja. Hač do dźesać bagrow za tute dźěła zasadźeja, zo móhli łódźe tam bórze zaso jězdźić. Dźěła traja drje hišće hač do kónca přichodneho ­tydźenja. Srjedź awgusta budźe Łobjo za łódźe zaso wužiwajomne. Do toho dyrbja čaru hišće dokładnje přepytować.

Přistajeni a wučomnicy Mediciniskeje uniwersity Łužica – Carl Thiem su wčera w Choćebuzu za wyše mzdy stawkowali. Dźěłarnistwo ver.di bě jich namołwjało, we wobłuku tuchwilnych tarifowych jednanjow ćišć na zamołwitych chorownje zwyšić. Wjace hač 500 přistajenych je namołwu sćěhowało. Dźěłarnistwo kritizuje, zo přistajeni uniwersitneje chorownje přeco hišće mjenje zasłužeja, hač sobudźěłaćerjo druhich chorownjow, hdźež płaća tarify zjawneje słužby. Tuchwilny poskitk dźěłodawarjow žadanjam ver.di zdawna njewotpowěduje. Uniwersitna chorownja w Choćebuzu ma nimo lěkarjow 2 350 přistajenych a 570 wučomnikow. Foto: Michael Helbig

Bonn/Drježdźany (dpa/SN). Ličba tak mjenowanych balkonowych milinarjow w Sakskej je prěnje połlěto wo nimale štwórćinu (22,5 procentow) rozrostła. Kónc junija bě pola zwjazkoweje syćoweje agentury 55 842 tutych nastrojow přizjewjenych, to je 10 253 wjace hač kónc 2024. Woprawdźita ličba je drje wo něšto wyša, dokelž někotři swoje připrawy ­njepřizjewja, byrnjež to dyrbjeli. Po cyłej Němskej dźěła mjeztym wjac hač milion balkonowych milinarnjow. Kónc junija bě 1 009 390 tutych nastrojow přizje­wjenych. Potajkim su solarne připrawy, kotrež móžeš z tykačkom domjacnosći přizamknyć, dale jara woblubowane. To znajmjeńša měni nawoda Carsten König wot cyłoněmskeho zwjazka solarneho hospodarstwa. Pozitiwnje wuskutkuja so wšelake prawniske wolóženja, kotrež bě stare zwjazkowe knježerstwo hišće wobzamknyło, a nadal spadowace płaćizny za solarne milinarnje. Nimo toho mjeztym dale a wjace wikowanskich předewzaćow tajke małe milinarnje poskićuja. Najhorliwišo wužiwaja milinarnje w Delnjej Sakskej: Tam zličichu na tysac domjacnosćow 34 nastrojow, w Sakskej je jich 26,5.

Kable nabiwanskeje stacije za elektroawta pokradnyli a tak tójšto škody načinili su skućićeljo w sewjerorynsko-westfalskim Langenfeldźe. Kaž policija zdźěla, su njeznaći w nocy na štwórtk na parkowanišću zahrodoweho centera dźesać ­kablow stacije wotrězali a pjeć z nich sobu wzali. Po dotalnym trochowanju wobliča škodu padustwa a porjedźenja na znajmjeńša 50 000 eurow. Policija prosy swědkow, so přizjewić.

Třilětny hólc je policiji w bayerskim Bergenje pomhał, wobchadne njezbožo wujasnić. Hólčec bě wčera wobkedźbował, kak šofer awta z nižozemskim čisłom we wsy do parkowaceho awta zrazy a so zminy. Dźěćo scenu nanej z pomocu swojich hrajkowych awtkow předstaji, na čož nan policiju zawoła. Pachoł njezbožo tak na­drobnje wopisowaše, zo móžeše policija 18lětneho zawinowarja namakać.