Žana nowa wójna w Syriskej
Tusk: Rěčeć wo Ukrainje
Woidke znowa wuzwoleny
Podstupim (dpa/SN). Braniborski krajny sejm je politikarja SPD Dietmara Woidkeho znowa za ministersko prezidenta kraja wuzwolił. 63lětny, kiž steji na čole po wšej Němskej prěnjeje koalicije SPD a BSW, dósta w druhim wólbnym přeběhu absolutnu wjetšinu hłosow.
Krajny přesyda SPD Woidke trjebaše druhe wólbne koło, štož w braniborskim krajnym sejmje dotal hišće njemějachu. W prěnim kole njeje Woidke trěbnu wjetšinu 45 hłosow dóstał. Za njeho hłosowaše jenož 43 zapósłancow. W druhim přeběhu měješe wón 50 hłosow.
Woidke je wot lěta 2013 ministerski prezident Braniborskeje. Jeho SPD chce přichodnych pjeć lět zhromadnje ze Zwjazkom Sahry Wagenknecht knježić. Nowa koalicija ma w krajnym sejmje 46 hłosow, štož njeje runjewon komfortabelne. Woidke bě kóždežkuli zhromadne dźěło z druhej najsylnišej politiskej mocu AfD wuzamknył.
Koaliciske jednanja wjerćachu so stajnje zaso wo prašenje skónčenja wójny w Ukrainje a wo nastajenje nowych raketow USA w Němskej. BSW žadaše sej w tym prašenju jasne stejišćo.
Jara měšany poskitk
Hoberski wosušk w srjedźišću stał
Poskitki přećiwo hodownej samoće
Lipsk (dpa/SN). Hodowny čas je mnohim ludźom čas wjesołeje zhromadnosće – někotrym pak tež wosebje struchłeje samotnosće. Štóž je hody w tutej nuzy, móže so w Drježdźanach a Lipsku na wjacore kontaktne adresy wobroćić. Tež internetnje poskićuja móžnosće zetkawanja mjez ludźimi. Tak je Lipšćanska dwórnišćowa misija za čas hodownych swjatych dnjow wšědnje wot 9 hač do 13 hodź. přistupna. Tak přeprošuja tam k přebywanju z čajom a poprjancami. Poskitk měri so wosebje na bjezdomnych sobuwobydlerjow.
W Drježdźanach zarjaduje Johannstadtski kwartěr jutře, 12. decembra, zetkanje potrjechenych, zo bychu styki nawjazali. Tute nahromadźene kontakty móhli hody za zetkawanja wužić. Dale budu wjacore cyrkwje patoržicu swoje durje za potrěbnych wotewrěć.
To a tamne (11.12.24)
Telefonaty z wulkim hłosom, harowaca hudźba a čuwy rubjace wideja z wótřerěčaka šmóratka – přećiwo tomu Berlinske wobchadne zawody nětko postupuja. Z wosebitymi wozjewjenjemi w busach wo to proša, so telefonatow wzdać a wideja njewothrawać. Hižo wot nalěća w busach za to wabja, na sobujěducych wjace kedźbnosće brać, so kruće dźeržeć a hladać, hač snadź něchtó druhi městno za sedźenje nuznišo njetrjeba.
Hrózbna namakanka we Wienje policiju a zjawnosć zaběra: Při twarskich dźěłach běchu w plastowym měše zapakowane ćěło něhdźe 30lětneho muža namakali, kotrež hižo 25 lět w pincy domu ležeše. Slědy na to pokazuja, zo jedna so wo mordarstwo. Kriminalisća nadźijeja so pomocy zjawnosće: Muž w joggingowym wobleku bě 1,70 metrow wulki a strowy.
Nětk móže 1 300 ludźi radu wolić
Dešno (SN/mb). Wjace hač 1 300 ludźi w Braniborskej je so do lisćiny wolerjow za 7. Radu za naležnosće Serbow zapisać dało. To je nam dźensa rano předsydka wólbneho wuběrka Margit Neugebauer na naprašowanje zdźěliła. Kaž z oficielneho wozjewjenja gremija wuchadźa, je so doba za zapisanje zašłu njedźelu skónčiła. Nětko móža so registrowani wolerjo hač do 15. decembra, 12 hodź., na wólbach wobdźělić. Štóž chce hač do poslednjeje minuty dočakać, dyrbi sam swoje wólbne podłožki do póštoweho kašćika tyknyć, w Dešnje na „wohnjowym dworje Tylcyc“, Hłowna dróha 44.
„Wužijće šansu, tych wolić, kotřiž budu w přichodźe naše zajimy w Podstupimje zastupować“, piše Neugebauer w zdźělence. Zdobom skedźbnja na zjawne wuličenje hłosow 16. decembra wot 10 hodź. w rumnosćach wólbneho wuběrka w Dešnje. Samsny dźeń chce wólbny wuběrk wuslědk oficielnje wozjewić.
Wo pjeć městnach w serbskej radźe je so dźesać kandidatow požadało. W Braniborskej móža Serbja zastupjerjow swojich zajimow při krajnym sejmje sami z listowymi wólbami wolić. W Sakskej ma tónle nadawk dotal zwjazkowe předsydstwo Domowiny na starosći.
Zelenskyj: Z Merzom budźe lěpje
Kijew (dpa/SN). Ukrainski prezident Wolodymyr Zelenskyj nadźija so kónca zdźeržliwosće Němskeje nastupajo rakety Taurus z móžnym zwjazkowym kanclerom Friedrichom Merzom. „Móžemy hišće wo wjele wjace činić“, rjekny Zelenskyj w swojim widejowym poselstwje po wopyće nawody opozicije a kanclerskeho kandidata unije Friedricha Merza w Kijewje. Z nim je Zelensky pječa tež wo tym rěčał, Ukrainu do NATO přeprosyć.
Söder ma program přewróta
Mnichow (dpa/SN). Unija CDU/CSU chce Němsku po słowach předsydy CSU Markusa Söder z „programom změnjeneho směra“ zaso k starej hospodarske mocy wjesć. „To budźe program přewróta“, rjekny Söder po posedźenju předsydstwa CSU w Mnichowje hladajo na nowy zhromadny wólbny program CDU/CSU, kiž chcedźa přichodny tydźeń předstajić. Söder so hišće raz jasnje wot Zelenych wotmjezowaše, z kotrymiž nochce dźěłać.
Scholz pola awtotwarcow Ford
Jednanja pola VW bjez wuslědka
Wolfsburg (dpa/SN). W tarifowym rozestajenju pola w krizy tčaceho awtotwarca Volkswagen njeje tež štwórte koło jednanjow žadyn wuslědk wunjesło. Wobě stronje rěčitej wo konstruktiwnej atmosferje. Na wuslědki pak njemóžachu so wobdźělnicy po šěsć hodźinach dojednać. Z tarifowymi jednanjemi chcedźa přichodny tydźeń pokročować.
Přewodźane wot warnowanskich stawkow běchu so zastupnicy dźěłarnistwa IG metal a awtotwarca zetkali. VW žada sej hladajo na wobćežne połoženje koncerna wot swojich sobudźěłaćerjow skrótšenje mzdy wo dźesać procentow. Tež zawrjenja twornjow su dale móžne. Dźěłarnistwo žada sej wobchowanje wšěch zawodow a dalepłaćenje mzdow.
