Koaliciske zrěčenje, kotrež su SPD, CDU a Zwjazk 90/Zeleni jako zakład noweho braniborskeho krajneho knježerstwa wujednali (SN rozprawjachu), wobsa­huje prócowanje wo delnjoserbšćinu w kubłanju. Konkretniše je wuprajenje nastupajo wyše přiražki k financowanju Załožby za serbski lud.

Podstupim/Choćebuz/Wjelcej (SN/at). Wotrězk pak njewěnuje so eksplicitnje serbskej rěči, ale wjacerěčnosći. Konkretnje tam rěka: „Kraj Braniborska prócuje so wo to, wjacerěčnosć rozšěrić, wose­bje pólšćina steji při tym w srjedźišću. Za pólsku a delnjoserbsku rěč ma so koncepcija wjacerěčnosće wot dźěćaceje dnjoweje přebywarnje hač k abiturje zdźěłać. Serbske šulske postajenje koalicija bórze schwali. Wuspěšny Witaj-program dale wjedźemy. Tež delnjoněmčinu w pěstowarnjach a šulach dale spěchujemy.“

London (dpa/SN). Premierminister Wulkeje Britaniskeje Boris Johnson chcyše Delnjej komorje britiskeho parlamenta hišće dźensa naćisk zakonja předpołožić, kotryž nowowólby 12. decembra wukazuje. Z nim chcył wón za nowowólby trěbnu wjetšinu dweju třećinow zapósłancow w parlamenće wobeńć. Na tym zadźěwku bě wčera zwrěšćił. Johnson nawjeduje mjeńšinowe knježerstwo a dyrbi tuž w zwadźe brexita dla w parlamenće wo kóždy přidatny hłós wojować.

Přihotuja wotsadźenje Trumpa

Washington (dpa/SN). Demokraća w Domje reprezentantow USA swoje próco­wanje pospěšeja, přihotować jednanje k wotsadźenju prezidenta Donalda Trumpa. Hišće tutón tydźeń měł plenum prěni króć wothłosować, kaž rěčnica demokratow Nancy Pelosi připowědźi. Potom njemóhł Běły dom přepytowanja k wotsadźenju dlěje z wurěču haćić, zo njepředleži žane wobzamknjenje parlamenta. „Je dźeń a wjace dopokazow, zo Trump swoje zastojnstwo znjewužiwa a na­rodnu wěstotu wohroža“, Pelosi zdźěli.

Přiměr skónčeny

Berlin (dpa/SN). Historisce špatne wólbne wuslědki CDU a SPD při wólbach Krajneho sejma Durinskeje su po posudku bywšeho předsydy frakcije CDU/CSU w zwjazkowym sejmje Friedricha Merza „wulki wotum njedowěry“ napřećo wulkej koaliciji w Berlinje. Merz sam je na tójšto zarjadowanjach dožiwił, kak hněwni ludźo na CDU a SPD su, rjekny wón wčera wječor w telewiziji ZDF. W srjedźišću kritiki steji zwjazkowa kanclerka ­Angela Merkel (CDU), dokelž njeje zwólniwa „politisce nawjedować a so jasnje wuprajić“. Přikład toho je jemu měsacy trajaca debata wo zakładnej renće, kotraž njeje dotal žane wuslědki wunjesła. „Lěnjosć a słaby nawod Angele Merkel stej so hižo lěta dołho kaž mła nad krajom rozpřestrěwałoj. To je hłowna kritika, kotruž nazhonjam a kotrejž so přizamkuju. Tak njemóže dale hić. Njemóžu sej předstajić, zo so tajke wašnje knježenja hišće dwě lěće ćehnje“, Friedrich Merz zwu­razni. To njemóže sej ani Němska ani Europa­ dowolić. Cyłkowny wobraz, kotrež zwjazkowe knježerstwo tuchwilu skići, je prosće „grawoćiwy“.

Erfurt (dpa/SN). Po wčerawšim tam-a-sem nastupajo nowu knježerstwowu koaliciju w Durinskej je šef tamnišeje CDU Mike Mohring koaliciju z Lěwicu ministerskeho prezidenta Boda Ramelowa wuzamknył. To zdźěli Mohring po posedźenju krajneho předsydstwa me­dijam. Přiwšěm je wón zwólniwy přeprošenje na wosobinsku rozmołwu z Ramelowom sćěhować.

Předsydstwo durinskeje CDU bě wólbny wuslědk analyzowało a zdźěliło: „Za durinsku CDU płaći po wólbach to samsne kaž do wólbow: žana koalicija z Lěwicu a AfD wotpowědnje płaćiwemu wobzamknjenju CDU Němskeje a Durinskeje.“ Po wólbach njebě Mike Mohring rozmołwy z Lěwicu wuzamknył.

Na rozmołwu z Bodom Ramelowom chce so Mohring „ze statnopolitiskeje zamołwitosće podać“, kaž wón rjekny. „Nic wjace a nic mjenje. Njeje nadawk CDU, so wo legitimaciju wotwoleneho knježerstwa starać.“ Ramelow dyrbjał nětko rjec, kak sej přichod Durinskeje předstaja. Lěwica­ bě wólby z 31 procentami dobyła.