Berlin (dpa/SN). Po njewočakowanym wotstupje Andreje Nahles ze zastojnstwa předsydki SPD a frakciskeje předsydki pytaja socialdemokraća za nowym nawodnistwom. Dźensa dopołdnja je so předsydstwo SPD w Berlinje zešło. Hižo wčera wječor wotmě najwuše nawodnistwo strony krizowe posedźenje, kotrež pak so bjez wuslědka skónči. Nahles bě wčera dopołdnja swój wotstup připowědźiła, dokelž nima w stronje pječa wjace podpěry dosć, po tym zo bě strona při wólbach Europskeho parlamenta wulke straty poćerpjeć dyrbjała. 48lětna chce tež swój mandat jako zapósłanča zwjazkoweho sejma złožić a so kompletnje z politiki wróćo sćahnyć.

Tuchwilu je dospołnje njejasne, štó budźe nowy předsyda SPD. Tak je zwjazkowy financny minister Olaf Scholz hižo wuzamknył, zo nimo ministerskeho zastojnstwa tež předsydstwo SPD přewozmje. Tež delnjosakski ministerski prezident Stephan Weil je signalizował, zo jako předsyda SPD k dispoziciji njesteji.

Washington/London (dpa/SN). Prezident USA Donald Trump je po puću na tři dny trajacy statny wopyt Wulkeje Britaniskeje. W běhu dnja wočakowaše jeho kralowna Elizabeth II. w Buckingham palasće­. Tam bě wulka wojerska ceremonija planowana. K politiskim rozmołwam chce so Trump z britiskej premierministerku Theresu May zetkać.

Wo wopyće Trumpa we Wulkej Britaniskej wjele diskutuja. Dźěle wobydlerstwa njejsu Trumpej přichilene. Tón bě so njedawno do nutřkownych naležnosćow kraja tykał a Britam radźił, kak maja z brexitom wobchadźeć, njewšědna to kročel wukrajneho statnika. Nimo toho bě so Trump jasnje na stronu přiwisnikow brexita stupił a bě radikalneho zastupnika brexita Borisa Johnsona nastupajo naslědnistwo premierministerki Theresy May podpěrał. Za jutře su demonstracije w Londonje přećiwo Trumpej připowědźene. Organizatorojo wo­čakuja hač do 250 000 wobdźělnikow. Trump chce so tež z francoskim prezidentom Emmanuelom Macronom zetkać.

Hłuboka kriza SPD budźe analystam a komentatoram dobra składnosć, so prašeć: Kak je k tomu dóńć móhło? Čehodla lědma štó hišće SPD woli? Hdźe su přičiny tohole­ wuwića? Ja sym sej wěsty: Zakład za poněčimne, ale wěste spadowanje strony je bywši zwjazkowy kancler Gerhard Schröder (SPD) lěta 2004 zhromadnje ze Zelenymi połožił, jako swoju „Agendu 2010“ přesadźi. Z njej zwjazane běchu socialnopolitiske­ surowosće kaž Hartz IV, dźěłać za jedyn euro na hodźinu a mjenje renty, kotraž powjedźe mnohich z nas do wěsteje chudoby w starobje. Schröder je tehdy wšitke socialne zasady SPD, zało­ženeje za to, zo by za prawa dźěłaćerjow wojowała, prosće spušćił. Přilubjenje nětko wotstupjeneje předsydki Andreje Nahles, zo chcyła Hartz IV přewinyć, drje derje klinčachu, wostachu pak hołe słowa. Tute ćežke herbstwo přewozmje nowy předsyda abo nowa předsydka SPD, wšojedne, kak budźe rěkać. Marko Wjeńka

Jenož spódnje cholowy woblečeny je policist w Londonje štyrjoch paduchow wućěrił, kotřiž běchu so do wobchoda złotnikarja zadobyli. 29lětny bě w nocy na pjatk wotućił, jako paduši wokno wobchoda blisko bydlenja rozbichu. Jako snadnje zdrasćeny policist k městnu njeskutka doběža, ćisnychu skućićeljo na njeho motyku. Z njej w ruce da so wón do nich, tak zo bjez rubizny z mopedami ćeknychu.

Z tři kilometry dołhim blidom z jědźu a napojemi k wječornemu skónčenju posćenja w ramadanje chce Egyptowska nowy rekord za Guinnessowu knihu rekordow nastajić. Něhdźe 7 000 ludźi wšitkich socialnych worštow je sobotu po informacijach organizatorow přišło, zo bychu so na hosćinje wobdźělili. Zastupnik Guinnessoweje knihi chcyše blido dokładnje wuměrić. W póstnym měsacu ramadanje maja so muslimojo wot schadźenja słónca hač do chowanja posćić.