Dźělny lockdown koronawirusa dla tež w Choćebuzu: Kołowokoło Starych wikow w Choćebuzu su wot minjeneje póndźele wšitke hosćency zawrjene. Tež w Brani­borskej ličby nowych infekcijow najebać zawrjenja dale přiběraja. Wčera běchu 229 nowonatyknjenych zličili, póndźelu 162. Mjeztym zastopnjuja wšitke 14 wo­krjesow a štyri bjezwokrjesne města kraja jako rizikowe kónčiny. W braniborskich chorownjach lěkuja 258 pacientow, 34 wjace hač póndźelu. Foto: Michael Helbig

Waršawa (dpa/SN). Po rozsudźe wustawoweho sudnistwa nastupajo přiwótřenje prawa na wotehnaće je pólska knježaca narodnokonserwatiwna strona Prawo a sprawnosć (PiS) tójšto nahladnosće mjez wobydlerjemi přisadźiła. Tuchwilu by PiS zhromadnje z koaliciskimaj partneromaj jenož hišće 28 procentow hłosow dóstała, wčera wozjewjene wuslědki woprašowanja instituta Ibris w nadawku nowiny Rzeczpospolita wujewjeja. W sep­tembru měješe PiS hišće 39 procentow. Druhe woprašowanja maja podobny wuslědk. W oktobru bě pólske wustawowe sudnistwo rozsudźiło, zo njesmědźa žony dźěći hižo wotehnać, byrnjež dźěćo w maćernym žiwoće ćežko zbrašene było. To je faktiski zakaz wotehnaća. Wot toho časa po wšěm kraju masiwnje protestuja. Dokelž je sudnistwo z přiwisnikami PiS wobsadźene, maja rozsud za politisce motiwowany. Woprašowanja pak tež wujewjeja, zo njemóže opozicija z tuchwilneho połoženja wjele wuzbytkować. Najwjetši opoziciski zwjazk KO móžeše so runje wo dwaj na 25,3 procenty polěpšić. Porno tomu by 15 procentow nowe křesćanskodemokratiske hibanje woliło.

Wustróžane wołanje papagaja je Awstralčanej žiwjenje wuchowało. Ptak bě wosrjedź nocy, jako muž kruće spaše, toho mjeno wołać započał. Muž wotući a zwě­sći, zo so kuri. Zadni dźěl domu so hižo paleše. Krótko na to přijědźe wohnjowa wobora. Wona móžeše tomu zadźěwać, zo płomjenja na dalše twarjenja přeskoča. Přiwšěm so drjewjana chata Awstralčana dospołnje wotpali.

Z runje sydom kwadratnymi metrami płoniny najmjeńša chěža Bremena je na předań. Kaž z nawěška wikowarja imobilijow wuchadźa, žadaja sej za njón 77 777 eurow a prowiziju šěsć procentow. Jednoposchodowy domčk z terasu na třěše je něhdźe sto lět stary a steji w měšćanskej štwórći Schnoor. Tam je tójšto małych pisanych chěžow we wuskich haskach. Dom ma WC, dušu, kuchnju a róžk za spanje. Kachlicy kuchnje su pozłoćane.

Izmir (dpa/SN). Pomocnicy w Turkowskej su 91 hodźin po ćežkim zemjerženju dźěćo z rozwalinow wjaceposchodoweho domu wuchowali. Tole zdźěla ministerstwo za katastrofowy škit. Po prěnich informacijach jedna so wo třilětnu holčku. Hižo wčera běchu 65 hodźin po katastrofje třilětne dźěćo wućahnyli. Při zemje­rženju ze sylnosću 6,6 na wuchodźe Turkowskeje a w Grjekskej minjeny pjatk je ně­hdźe sto ludźi žiwjenje přisadźiło.

Wobmjezowanja w Awstriskej

Wien (dpa/SN). W Awstriskej płaća wot dźensnišeho, podobnje kaž w Němskej, dalše razne naprawy přećiwo rozšěrjenju koronawirusa. Tak su nimale wšitke hosćen­cy kaž tež kulturne a wólnočasne institucije zawrjene. Mjez 20 a 6 hodź. smědźa ludźo bydlenja a domy jenož hišće­ wopušćić, hdyž maja za to dobru přičinu. K tomu słuša tež přechodźo­wanje. Hinak hač při prěnim lockdownje w nalěću wostanu pak wobchody a najwjace šulow wotewrjene. Naprawy płaća najprjedy raz hač do kónc nowembra.

Žada sej pomoc za kulturu