Hosćencarjo naprawy šwikaja
Dalše raznje wobmjezowanja koronawirusa dla wukazane
Berlin (dpa/SN). Razne naprawy přećiwo koronawirusej, kotrež bě konferenca ministerskich prezidentow Němskeje zhromadnje ze zwjazkowej kanclerku Angelu Merkel (CDU) wobzamknyła, su mjez hotelownikami a hosćencarjemi wulke njezrozumjenje zbudźili. „Předewzaćeljo hotelownistwa a gastronomije chabłaja mjez hněwom a zadwělowanosću“, rjekny hłowny jednaćel zwjazka Swójbnych předewzaćow Albrecht von Hagen powěsćerni dpa. Zwjazk němskich hotelownikow a hosćencarjow warnowaše, zo hrozy tysacam předewzaćam bjez wobšěrneje pjenježneje pomocy insolwenca. Hłowna jednaćelka zwjazka Ingrid Hartges so starosća, zo dyrbi wulki dźěl zawodow zawrěć. Wona je sej wěsta, zo třećina wšěch 245 000 zawodow přichodnu zymu njepřetraje. Mnozy su rozsudźeni, přećiwo wukazanemu zawrjenju hosćencow a hotelow sudnisce skoržić. Wiceprezident zwjazkoweho sejma Wolfgang Kubicki (FDP) jich podpěruje: „Namołwjam wšěch potrjechenych, prawniske srědki přećiwo tutym naprawam nałožować.“
Spodźiwna terapija
Wčera wukazane naprawy Zwjazka a zwjazkowych krajow dopokazuja, zo njewědźa sej zamołwići politikarjo w boju přećiwo koronawirusej poprawom žaneje žiweje rady wjace. Nětko chłostaja runje tych, kotřiž mějachu raznych zakazow dla hižo wot nalěća najbóle ćerpjeć: hotelownikow a hosćencarjow. Smy so nimale hižo na to zwučili, zo nas z nahubnikom posłužuja, zo steja blida z wulkim wotstawkom a zo dyrbimy swoje daty zawostajić. Mjeztym su tež fachowcy zwěsćili, zo njejsu hosćency wuchadźišćo nowych infekcijow. Kina a dźiwadła su tak a tak lědma hišće dźěłać móhli.
Kak by było, by-li knježerstwo sprawnje přiznało, zo přičiny nowych natyknjenjow z koronawirusom prosće njeznaje. Město toho nam napowědaja, zo budźe po měsac trajacej „terapiji“ wšitko zaso w porjadku. A politikar SPD Lauterbach chce nam policiju do domu pósłać, hdyž so k swójbnemu swjedźenju zetkamy. Hórje wjace njeńdźe. Marko Wjeńka
Najwyši staw
To a tamne (29.10.20)
Na wšě 6,7 kilogramow ćežke a 57 centimetrow wulke dźěćo je so Choćebuskej Carla-Thiemowej chorowni narodźiło, štož je tam dotalny rekord. Šeflěkar žónskeje kliniki rjekny nowinarjam, zo njeje tajke něšto w swojich 25 słužbnych lětach na porodowej staciji hišće dožiwił. Lěkarjo běchu ćěšenka w 37. tydźenju samodruhosće wurězali. Po krótkim zastaranju na intensiwnej staciji je hólc mjeztym pola swojeje maćerje.
Lubosć k tunjakej (Thunfisch) w tyzach je muža w Awstriskej pohnuła, we wobchodach kradnyć. Policija namaka wjace hač sto tyzow tunjaka w awće muža, po tym zo bě detektiwka jeho lepiła. Zastojnikam muž rozłoži, zo tunjaka přewšo lubuje zo měješe strach, zo njemóže konserwy koronakrizy dla wjace kupić. Po zwěsćenju policije bě 50lětny w dźewjeć wobchodach takle „nakupował“.
Rekordne ličby w Čěskej
Praha (dpa/SN). Najebać razne naprawy a nócny zakaz, dom wopušćić, ličba nowych koronainfekcijow w Čěskej dale přiběra. W běhu 24 hodźin su tam 15 663 nowych padow zličili, štož je nowy rekord po wudyrjenju pandemije. Hladajo na ličbu wobydlerjow je Čěska nimo Belgiskeje wot koronapandemije najbóle potrjecheny kraj. Pandemija wobwliwuje tež dźensniši narodny swjatk róčnicy proklamacije njewotwisnosće 28. oktobra 1918. Wšitke zarjadowanja su wotprajene.
Zjězd Lěwicy wotprajeny
Berlin (dpa/SN). Po CDU je nětko tež Lěwica planowany stronski zjězd k wuzwolenju noweho nawodnistwa strony wotprajiła. Předsydstwo je wčera wobzamknyło, zo njemóža zjězd, kotryž běchu hižo raz wot junija na kónc oktobra přestorčili, koronapandemije dla tež tónkróć wotměć. Poprawom chcychu pjatk w Erfurće wo naslědnistwje Katje Kipping a Bernda Riexingera rozsudźić. Wobaj stronu mjeztym wosom lět nawjedujetaj.
Lockdown zaso zběhnjeny
Robert Habeck, zwjazkowy předsyda Zelenych, je so dźensa před ...
Přihotuja nowe drastiske naprawy
Berlin (dpa/SN). Zwjazkowe knježerstwo chce so z drastiskim wobmjezowanjom kontaktow hišće do hód masiwnje přiběracym koronainfekcijam spjećować. Po wšěm kraju chcedźa wólnočasne centrumy a hosćency zawrěć a zarjadowanja zakazać. Kontakty w zjawnosći a swjedźenje pod hołym njebjom a w domjacnosćach chcedźa tak raznje wobmjezować. Tole wuchadźa z interneho naćiska knježerstwa, wo kotrymž chcyše zwjazkowa kanclerka Angela Merkel (CDU) dźensa popołdnju z ministerskimi prezidentami zwjazkowych krajow wuradźować. Dokument powěsćerni dpa předleži.
Rekord infekcijow w Pólskej
Pólske žony planuja stawk
Přesadźuja myta Honeckera
Kirchheim unter Teck (dpa/SN). Po skónčenju prawniskeje zwady ze Zwjazkom smě awkciski dom w badensko-württembergskim Kirchheimje unter Teck wulku ličbu rjadow a statnych darow ze zawostajenstwa Ericha Honeckera přesadźować. Zwjazkowy zarjad za imobilijowe nadawki w Bonnje bě awkciju najprjedy raz z hnydomnym sudniskim rozsudom zakazać dał, awkcionar Andreas Thies zdźěli. Přesadźowanje je nětko spočatk decembra planowane.
Po informacijach rěčnika zwjazkoweho zarjada Thorstena Grütznera bě institucija hakle krótko do planowaneho termina wo přesadźowanju zhoniła. Dokelž njemóžachu wuzamknyć, zo jedna so pola eksponatow wo bywše ludowe swójstwo, su próstwu wo zakaz na sudnistwje zapodali. Po wobšěrnym pruwowanju su próstwu nětko zaso cofnyli.
Něhdźe sto rjadow a statnych darow něhdyšeho šefa statneje rady NDR Ericha Honeckera smědźa nětko přesadźować. Po informacijach medijow bě so hižo w juliju zajimc přizjewił, kiž chcyše kompletnu zběrku za milion eurow kupić, mjez nim ryzy złoty rjad „Rjek NDR“.
