Malešecy (SN/MWj). „Rewolucija manežoweho wuměłstwa“ rěka program, z kotrymž přijědźe cirkus William z Mün­cheberga, městačka wuchodnje Berlina, přichodne dny do Malešec. Na tamni­šim sportnišću při Hućinjanskej dróze natwarja swój wulki cirkusowy stan a w nim­ wot štwórtka hač do njedźele wjacore razy swoje pokazki prezentuja.

Cirkus „William“ zjednoća moderne kaž tež tradicionalne dźěle cirkusoweho wuměłstwa a kombinuje dresury zwě­rjatow z naročnymi artistiskimi poskićenjemi. Tak dožiwja wopytowarjo kumšty dźesać swětłych kamelow runje tak kaž swětłych a ćmowych konjow. Jedyn z wjerškow zwěrjećich pokazkow budźe prezentacija wulkich kóčkow, w kotrejž budu lawy a tigry zhromadnje w maneži widźeć. Ale tež artistisce ma cirkus „William“ někotre wosebitostki w programje, kotrež su samo jónkrótne w Němskej. Tak prezentuje Deniro Wille postoj na rukomaj (Handstand), a to na powjazu. Dale změja w programje smjertne koło, westernsku show a wězo klawna. Mjez wuhotowarjemi programa su tohorunja čěscy artisća.

Delnjoserbski domizniski muzej Grodkowskeho hrodu wěnuje so lětsa tradicionalnemu a aktualnemu módro­ćišćej. Sobudźěłaćerka Anita Gruner wukonja tule­ poslednje přihoty za njedźelne wotewrjenje wustajeńcy. Přehladka, w kotrejž pokazuje 81lětna Wojerowčanka Barbara Zenker swoje najrjeńše eksponaty, budźe hač do 29. meje widźeć. Foto: Martina Arlt

Drježdźany. Młoda serbska literatura steji w srjedźišću přichodneho zetkanja Drježdźanskich Serbow pjatk, 4. měrca, w hosćencu „Braustübel“ na Körnerowym naměsće 3 we Łóškecach (Loschwitz). Wot 20 hodź. čita tam Měrćin Wjenk ze swojeje prěnički „Stary dom“. Přizamknje so bjesada. Towarstwo Stup dale a Ludowe nakładnistwo Domowina wjeselitej so na bohaty wopyt.

Budyšin (SN). Z pućowanjom po stawiznach rejwanja prezentuje balet Serbskeho ludoweho ansambla pod nawodom baletneje mišterki Mije Facchinelli njedźelu, 6. měrca, w 16 hodź. na žurli SLA małym a wulkim přihladowarjam tójšto wo swěće rejow. Woni zhonja, wot hdy čłowjek rejuje a kelko formow a stilow rejwanja ek­sistuje. Napjate su zdobom stawizny jewišćoweje reje. Wot barokneho menueta přez Wiensku klasiku a južnoameriske rytmy hač k rock´n´ rollej, hiphopej a breakdancej móža hosćo rejwansku hodźinu horcych rytmow dožiwić.