Lejno. Byrnjež němska koparska wubranka jutře w połfinalu europskich mišterstwow nastupiła, schadźuja so w 19 hodź. čłonojo Pančičansko-Kukowskeje gmejnskeje rady w Lejnjanskim hosćencu. Na dnjowym porjedźe steja předewšěm twarske naležnosće, mjez druhim wutwar puća Při młónčiku w Pančicach.
Tohorunja jutře, ale w 19.30 hodź. zeńdu so Worklečanscy radźićelo w šuli „Michał Hórnik“. Mjez druhim chcedźa tam šěsć wšelakich nadawkow za wobšěrne saněrowanje wjesneje sportownje rozdawać. Nimo toho wutworja sej stejišćo k zhromadnej přemysłowej přestrjeni serbskich gmejnow pola Miłoćic.
Wobě posedźeni stej zjawnej, zajimcy su tuž přeprošeni.
Budyšin. Rěčny centrum WITAJ zarjaduje lětsa zaso intensiwny kurs čěšćiny za Serbow w Chrósćicach, a to wot 1. do 6. awgusta. Čech Pavel Šlechta budźe wšědnje šěsć hodźin wuwučować. Popołdnju čěscy hóstni referenća w swojej maćeršćinje wo čěskej kulturje, stawiznach a dalšich najwšelakorišich temach přednošuja. Nimo wulěta do Čěskeje su zabawne wječorki z čěšćinu planowane. Zajimcy njech so přizjewja w Rěčnym centrumje WITAJ pod telefonowym čisłom 03591/ 550 400 abo e-mailnje pod .
Na swojej internetnej stronje www.recny-centrum-witaj.de podawa rěčny centrum dokładniše informacije a program.
K lětušim mjeztym 3. koparskim mišterstwam europskich narodnych mjeńšin přewjedu Serbske Nowiny a Serbski rozhłós znowa zhromadnu akciju, při kotrejž móžeće něšto dobyć. Dyrbiće jeničce na dwě prašeni wotmołwić.
Swojej wotmołwje pósćelće pak z póštu na adresu:
Redakcija Serbskich Nowin
Sukelnska 27
02625 Budyšin
pak z e-mailku na: abo wotedajće swój tip w interneće. Pod www.serbske-nowiny.de/europeada namakaće trěbne formulary k tipowanju a wupjelnjenju. A štó wě, snano słušeće bórze k dobyćerjam.
Njezabudźće pak z tipom swoju dospołnu adresu podać. Njedospołne tipy njemóžemy bohužel wobkedźbować.
Tipujće sobu a dobudźće! Ze wšitkich prawych wulosujemy rjane myta z podpismami hrajerkow a hrajerjow koparskeju wubrankow. Na slědowacej prašeni maće wotmołwić:
Kak daloko přińdźe Serbska koparska wubranka muži na lětušej europeadźe w Italskej?
o njepřetraje předkoło
o docpěje štwórćfinale
o nastupi w połfinalu
o docpěje finale
o dobudźe europeadu