Wot wčerawšeho je kniha wo 2. europeadźe – koparskich ...
pjatk, 18. decembera 2015
spisane wot: Serbske Nowiny
Wot wčerawšeho je kniha wo 2. europeadźe – koparskich mišterstwach europskich narodnych mjeńšin –, kotraž wotmě so lěta 2012 we Łužicy, na předań. Referent Domowiny Clemens Škoda (nalěwo) je nowostku do předawanišćow, kaž tule Chróšćanskemu časnikarjej Jürgenej Njekej, rozwozył. Knihu dóstanjeće tež pola Wałdźic we Worklecach, pola Marje Hrjehorjoweje w Róžeńće, w Škodźic frizerskim salonje we Wotrowje, w Budyskej SKI kaž tež w onlineshopje Zapadołužiskeho koparskeho zwjazka. Kupcy publikacije podpěruja zdobom dźěło serbskeju koparskeju wubrankow žonow a muži. Foto: Katharina Jurkowa
Kniharnja wočinjena
pjatk, 18. decembera 2015
spisane wot: Marian Wjeńka
Budyšin. Štóž chce w Budyskej Smolerjec knihami hišće za darom pytać, změje za to přichodne dny přidatne składnosće. Kniharnja budźe jutře, sobotu, wot 10 do 17 hodź. wotewrjena, patoržicu wot 10 do 13 hodź. a silwester wot 10 do 12 hodź. Wot 4. do 6. januara změje inwenturu, wot 7. januara tam kupcow w zwučenym času zaso posłužuja.
Štóž tele dny do Budyskeje Serbskeje kulturneje informacije dźe, ...
pjatk, 11. decembera 2015
spisane wot: Dr. Cordula Ratajczakowa
Štóž tele dny do Budyskeje Serbskeje kulturneje informacije dźe, toho witaja hnydom imponowace drjewjane twórby pólskeho rězbarja, basnika a hudźbnika Ryszarda Zająca. Hač do januara móžeš sej tam 20 rězbarskich kaž tež marmorowych dźěłow Jelenjogórčana hišće wobhladać, potom dyrbiš so do jeho ateljeja w Baršću podać. Foto: SN/Maćij Bulank
Čitaja na finisaži
štwórtk, 10. decembera 2015
spisane wot: Marian Wjeńka
Drježdźany. „Overshadowed – Überschattet“ rěka wustajeńca našočasnych pozicijow ze Syriskeje w Drježdźanskej galeriji Holgera Johna (Rähnitzgasse 17), kotruž sobotu, 12. decembra, zakónča. Wot 19 hodź. wotměja tam finisažu z čitanjom wjacorych awtorow. Nimo syriskich spisowaćelow a basnikow budźe to tohorunja Benedikt Dyrlich. Zwjazk serbskich wuměłcow nimo dalšich wuhotowarjow na tele zarjadowanje sobu přeproša.
„Wumrěć njedawa, ćeta“ rěka nowa wjeselohra lajskich ...
pjatk, 04. decembera 2015
spisane wot: Serbske Nowiny
„Wumrěć njedawa, ćeta“ rěka nowa wjeselohra lajskich dźiwadźelnikow z Konjec a Šunowa. Swoju wuspěšnu premjeru dožiwi kruch w režiji Petry-Marije Bulankec-Wenceloweje spočatk nowembra w Šunowskej Fabrikskej hospodźe. Nětko hotuja so delanscy hrajerjo, mjez nimi tež młoda Šunowčanka Viktoria Žurec, jako studentka skótneje mediciny Rezi (naprawo) na třeće z cyłkownje jědnaće předstajenjow, kotrež budźe njedźelu, 6. decembra, w 16 hodź. w Chrósćicach. Foto: SN/Maćij Bulank
Na swjatoh Mikławša překwapi Serbski ludowy ansambl najmłódšich ...
pjatk, 27. nowembera 2015
spisane wot: Axel Arlt
Na swjatoh Mikławša překwapi Serbski ludowy ansambl najmłódšich přihladowarjow ze stawiznu „Překlepana liška“ z pjera Jěwy-Marje Čornakec w serbskej rěči. Liška bě lochkomyslna a sčini sej ze žorćikom wjelka, mjedwjedźa a dźiwje swinjo za njepřećelow. Nětk ma kopicu dyrdomdejow přetrać. Kak to wuńdźe? Předstajeni budźetej 5. decembra w 16.30 hodź. w Radworskej „Meji“ a 6. decembra w 16 hodź. we Worklečanskim hosćencu „Ke kupowemu hatej“. Foto: SLA/Sandra Stirner
Na adwentne na dohodowne wiki
pjatk, 27. nowembera 2015
spisane wot: Marian Wjeńka
Po tym zo su so hižo dźensa dopołdnja 632. Wjacławske wiki w Budyšinje zahajili, přeprošeja prěni adwentny kónc tydźenja hnydom na wjacore adwentne wiki w blišej a dalše wokolinje. Njedźelu w 14 hodź. wotměja so wone w Njebjelčicach na wjesnym parkowanišću. Po programje pěstowarskich dźěći móža holcy a hólcy rumpodichej swoje přeća přeradźić. Wo ćělne derjeměće postaraja so čłonojo domizniskeho towarstwa.
Hižo jutře, sobotu, wot 10 hodź. budu dohodowne wiki w Njeswačidle. W tym času wotewru wosebitu wustajeńcu historiskich hrajkow w domizniskim muzeju. W rumnosćach zwjazka seniorow móža dźěći poprjančki pjec, w 14 hodź. předstaja zakładni šulerjo swój program na žurli hosćenca. W 15 hodź. chce wjesnjanosta wulki wosušk nakrać. Po wulosowanju hodowneje tombole zaklinči dujerska hudźba.
W susodnym Holešowje přewjedu samsny dźeń wot 9 do 17 hodź. tohorunja małe adwentne wiki, a to w Pěčkec zahrodnistwje. Tam smědźa so wopytowarjo na wosebite poskitki wjeselić. Wawrikec catering změje horce wino, kołbaski a něštožkuli dalše přihotowane.
W měrcu dožiwi publikum w NSLDź serbskorěčnu premjeru krucha ...
pjatk, 20. nowembera 2015
spisane wot: Dr. Cordula Ratajczakowa
W měrcu dožiwi publikum w NSLDź serbskorěčnu premjeru krucha „Mój wuměrjeny kraj“ Jurja Kocha, dźensa wječor pak maja přihladowarjo składnosć, sej klasikarja z lěta 1977 wo wuhlowej problematice w Budyskim dźiwadle w němskej rěči wobhladać. Inscenacija intendanta Lutza Hillmanna bě w nalěću diskusiju wubudźiła. Foto: SN/Maćij Bulank
„Pućowanja – přeměna – identita“ rěka wustajeńca, kotruž ...
pjatk, 13. nowembera 2015
spisane wot: Serbske Nowiny
„Pućowanja – přeměna – identita“ rěka wustajeńca, kotruž su wčera w Choćebuskim Serbskim domje wotewrěli. Moler Wilfried Schulze z Drjenowa předstaja swoje aktualne twórby tež ze serbskimi motiwami. Přehladka je hač do 5. februara přistupna. Foto: Michael Helbig
Korutanski wuměłc Karl Vouk je wčera nawodnicy Budyskeho Serbskeho ...
pjatk, 06. nowembera 2015
spisane wot: Serbske Nowiny
Korutanski wuměłc Karl Vouk je wčera nawodnicy Budyskeho Serbskeho muzeja Christinje Boguszowej w přitomnosći direktora Załožby za serbski lud Marka Sucheho (wotprawa) štyri tafle swojeho wobrazoweho cykla „Satkula abo (s)twor(jen)a krajina“ přepodał. Załožba bě twórby kupiła a přewostaji je muzejej jako stajnu požčonku, kaž Serbski muzej zdźěli. Foto: SN/M. Bulank
