Snadny zajim
Köln (B/SN). Wjetšina Němcow so lědma za wólby noweho bamža zajimuje. Po naprašowanju instituta YouGov mjez 2 048 ludźimi so jeničce 11 procentow „jara“ za wólby zajimuje, 59 proc. „scyła nic“. 16 proc. naprašowanych je sej Europjana jako bamža přała, 10 proc. Afričana a 4 procenty Aziata. Třećina ludźi wočakuje, zo nowy bamž wumocowanja ze stron zastupjerjow cyrkwje wujasni a so sylnišo chudym a słabym wěnuje.
Dalša financielna podpěra
Berlin (B/SN). Nabožno-politiski rěčnik frakcije SPD Lars Castellucci praji ewangelskej powěsćerni, zo płaćenja stata w nowej legislaturnej periodźe nješmórnu. Wšitke 16 krajow bě zastajenje běžnych statnych financielnych přiražkow přez jónkrótne wotnamakanje wotpokazało. W přichodźe su statne dojednanja předstajomne, zo hodźeli so cyrkwinske twary wuchować, měni Castellucci.
Zamołwitosć za přichod
Zniža mjezsobne cła
Genf (dpa/SN). China a USA su so w swojej wikowanskej zwadźe na to dojednali, mjezsobne cła znižić. Kaž ze zhromadneje deklaracije wuchadźa, płaći dojednanje najprjedy raz 90 dnjow. Po tym zniža USA cła na chinske importy na 30 procentow, dotal wučinjachu wone 145 procentow. China zniži cła na importy z USA wot 125 na dźesać procentow. Delegacije wobeju krajow běchu w Genfje wuradźowali. Wotnětka chcedźa zhromadny gremij załožić, w kotrymž wo hospodarstwje a wikowanju wuradźuja.
Zwada rentowych přinoškow dla
Berlin (dpa/SN). Nowa ministerka za dźěło a socialne Bärbel Bas (SPD) dóstawa podpěru swojeje strony za namjet, zo měli tež zastojnicy přinoški do zakonskeho rentoweho zawěsćenja płaćić. To je zasadna pozicija socialnych demokratow, rjekny socialny fachowc Bernd Rützel nowinarjam. Zwjazk zastojnikow Němskeje namjet wotpokazuje, tež koaliciski partner CDU/CSU namjet kritizuje. Lěwica a socialne zwjazki jón witaja.
Trump potuńša lěki
We wopomnišću bywšeho koncentraciskeho lěhwa w Mauthausenje su ...
Saskia Esken hižo njenastupi
Berlin (dpa/SN). Předsydka SPD Saskia Esken chce so swojeho zastojnstwa wzdać. Wona na zjězdźe strony kónc junija hižo k nowowólbam předsydy njenastupi, zdźěli 63lětna wčera wječor w sćelaku ARD.
„Mějach minjenych šěsć lět wulke wjeselo a wulku česć, SPD jako předsydka nawjedować směć“, Esken rjekny. Strona je starosławna a tola žiwa a młoda. „Zastojnstwo předsydki pak nětko złožu, zo bych wobnowjenje strony zmóžniła.“ Wona chcyła wosebje žony do sobudźěła pohnuć. Esken je wot lěta 2019 předsydka SPD. Tehdy běchu ju čłonojo strony direktnje wolili, spočatnje z Norbertom Walterom-Borjansom. Naposledk pak běchu ju přiběrajo kritizowali.
Chorobne kasy z minusom
Bamž sej žada: Nihdy wjace wójna!
Rom (dpa/SN). Nowy bamž Leo XIV. je swoju prěnju zjawnu modlitwu na Pětrowym naměsće w Romje za měrowy apel po wšěm swěće wužił. Z balkona katedrale swjateho Pětra nawoda katolskeje cyrkwje před tysacami přiwisnikow namołwješe: „Nihdy wjace wójna!“. Prěnjeho pontifeksa z USA, dotalneho kardinala Roberta Francisa Prevosta, stajnje zaso ze sylnym přikleskom přetorhnychu.
Swjaty wótc dopominaše na kónc Druheje swětoweje wójny ze 60 milionami smjertnych woporow před 80 lětami. Tohodla chcył so wón runja swojemu předchadnikej Franciskusej „na wodźacych politikarjow swěta z namołwu ‚Nihdy wjace wójna‘ wobroćić“.
Runočasnje žadaše sej bamž „sprawny měr“ za Ukrainu, přiměr w Gazaskim pasmje na dobro ciwilneje ludnosće a pušćenje wšěch israelskich zastajencow. Po trochowanju policije bě so na Pětrowym naměsće w Romje něhdźe 100 000 ludźi zhromadźiło. 69lětneho misionara a nawodu rjada awgustinow běchu minjeny štwórtk za 267. bamža wuzwolili.
Zelenskyj chce Putina zetkać
Direktne měrowe jednanja mjez Ruskej a Ukrainu štwórtk w Turkowskej
Kijew (dpa/SN). Ukrainski prezident Wolodymyr Zelenskyj chce so hišće tutón tydźeń z ruskim prezidentom Wladimirom Putinom k měrowym jednanjam zetkać. „Čakam štwórtk w Turkowskej wosobinsce na Putina“, piše Zelenskyj na swojej internetnej stronje. Putin bě do toho tajke jednanja w Turkowskej poskićił, zo bychu so rozmołwy wo měrje zahajić móhli. Zelenskyj so nadźija, zo „Rusojo za žanym wurěčemi wjace njepytaja“.
Krótko do poselstwa Zelenskeho bě prezident USA Donald Trump ukrainskehe statneho šefa namołwjał, wot Putina namjetowanym rozmołwam přihłosować. Jenož tak móhli Kijew, europscy partnerojo a USA zhonić, kak situacija wupada a što měli woni činić.
Republikan zdobom dwělowaše, zo chce Putin měrowe zrěčenje wotzamknyć. Tón drje so tuchwilu přejara z tym zaběra, „dobyće Druheje swětoweje wójny woswjećić“. Trump poćahowaše so na paradu k wopominanju dobyća nad hitlerskej Němskej w Moskwje.
Zelenskyj podšmórny, zo wočakuje Ukraina hižo wot dźensa „dospołny přiměr“ jako zakład diplomatije.
Klasowa medicina
Po přewróće z ideologiju wyšnosće pokročowali
Budyšin (CS/SN). Kak zhladujemy we wuchodnych zwjazkowych krajach na stawizny NDRskeho časa? Mnoho Budyšanow, kotřiž běchu so minjeny pjatk na „Budysku narěč“ w tachantskej cyrkwi swj. Pětra zešli, so wotmołwow na tute prašenje nadźiješe. Dohromady 400 připosłucharjow – telko, kaž hižo dołho nic – sćěhowaše přednošk historikarja a publicista Ilko-Sascha Kowalczuka pod hesłom „Šok swobody“.
To a tamne (12.05.25)
Muski balet z Finsterwalde je němski mišter 2025 w turněrje wjesołych rejwarjow. Skupina z Braniborskeje je so we wubědźowanju cyłoněmskeho zwjazka muskich baletow we Würzburgu přećiwo 14 dalšim mustwam w kategoriji hač do 35 lět přesadźiła. Mužojo z Finsterwalde wustupowachu z choreografiju „Rybjaceho mandźelstwa“. Za to běchu cyłe lěto zwučowali. Muske balety pochadźeja poprawom z karnewala. Mjeztym pak wustupuja tež zwonka póstnicow.
Na wšěch 50 dnjow na swoje wuchowanje na morju su rybarjo w pacifiskim oceanje čakać dyrbjeli. Ekwadorska mórska straža je pjeć muži z Peruwa a z Kolumbiskeje wuchowała, po tym zo běchu druzy rybarjo skóncowany kuter wuhladali. Jako chcychu jón wotwlec, čołm rozpadny. Tuž dyrbješe mórska straža wupomhać. Motor kutera bě wupadnył.
