Spočatk doby serbskeho hudźbneho wideja?
„Video Killed the Radio Star“, fifoleše britiske duwo The Buggles w lěće 1979 a zahaji z tym dobu hudźbneho widejoweho klipa. Zynki a wobrazy ze sobu zwjazać, bě drje hižo do toho z wašnjom – wobmjezujemy-li so na europske stawizny, saha tale tradicija wróćo hač do antikskeje Grjekskeje –, ale ze spočatkom 1980tych lět nastupichu poněčim dźeń a wjac spartowych telewizijnych sćelakow, posrědkowace raz mjenje, raz bóle radźene krótkofilmčki na wobrazowki po wšěm swěće. Cyle tak, kaž tule dobu zahajacy mjenowany spěw wěšćeše, wšak přiwšěm přišło njeje – tež dźensa hišće słyšimy zwjetša jenož krótki čas relewantne štučki na njeličomnych rozhłosowych žołmach; a sćelaki, kaž MTV, VH1 abo VIVA, su mjeztym (zaso) nišowe formaty, kotrež – jelizo docyła hišće eksistuja – wjetšinu programa ze wšěm móžnym wuhotuja, při čimž hudźbu skerje zlutniwje wobkedźbuja. Přiwšěm je wulka doba hudźbneje telewizije tomu přinošowała, zo sta so zwobraznjenje popowych titulow ze swójskej wuměłskej formu.
Wulět po Hornjej Łužicy
Wo słowjanskim archetypje
W starej póšće wočinja zaso kulturne woknješko
Wojerecy (SiR/SN). Wot decembra lońšeho lěta su twarjenje stareje póšty na Friedrichowej we Wojerowskim starym měsće wobstajnje z kulturnymi zarjadowanjemi wožiwili. Po tym zo bě cityjowa managerka Dorit Baumeister na lońšim staroměšćanskim bulwaru namołwjała, historiske twarjenja zachować, zrodźi Christian Völker-Kieschnick ideju, tule namołwu na staru póštu přenjesć. 31lětny předstaji swoje ideje mějićelej domu dr. Marcusej Meixnerej. Wo tym bě lěkar zahorjeny, a tak dom hdys a hdys za najwšelakoriše małe formy kultury wužiwachu.
Z koronowej pandemiju bě z tym najprjedy raz bohužel kónc. Nětko pak chcedźa kulturne woknješko dźensa za tydźeń, 2. septembra, zaso wočinić, wězo pod płaćacymi hygieniskimi wuměnjenjemi a z konceptom, kiž je ze strowotniskim zarjadom wothłosowany. Tak su wopytowarjo winowaći, w twarjenju škitny nahubnik nosyć, doniž swoje městno njedocpěja. Nimo toho tuchwilu dujerska hudźba, spěwne zarjadowanja a předań napojow móžne njejsu.
Wobaraja so wumjetowanjam
Kamjentny dom so wumjetowanjam sej swoje hosći wuzwoleć spřećiwja.
Budyšin (SN/JaW). Ze zjawnym listom je předsydstwo towarstwa Budyskeho Kamjentneho domu na wumjetowanja AfD w sprjewinym měsće reagowało.
AfD spyta „dźěło Kamjentneho domu ideologizować“, rěka w pismje, kotrež našemu wječornikej předleži. Pozadk wšeho je, zo bě Kamjentny dom planowane konstituowanje młodźinskeho foruma w sprjewinym měsće přestorčił. „Rozsud smy we wothłosowanju z městom Budyšinom a na zakładźe pokazkow wěstotnych zarjadow tworili“, tak čłonojo předsydstwa towarstwa Kamjentny dom.
Festiwal mjezynarodnje wuklinčał
Serbska hudźba do swěta
Premjera nadawkoweje twórby
Kompozicija dospołnje na wosebitosće dweju instrumentow spisana
Budyšin (CRM/SN). „Johannes Biehle (1870-1941) jako cyrkwinski hudźbny direktor njeje za swój čas jenož hudźbne žiwjenje w swojim ródnym měsće Budyšinje formował, ale zdobom cyłeje Hornjeje Łužicy“, rěka w zdźělence měšćanskeho zarjadnistwa. Tohodla su jeho 150. posmjertne narodniny z prapředstajenjom nadawkoweje kompozicije minjenu sobotu w tachantskej cyrkwi swj. Pětra hódnje wopominali. Runje regularne hudźbne nyšpory sobotu w 17.15 hodź. słušeja do jeho iniciatiwow, kotrež so přez lětdźesatki dale wjedu. Kompozitoriski nadawk za twórbu „In memoriam Johannes Biehle“ přewza Drježdźanski komponist a wysokošulski wučer, kiž je zdobom 1. předsyda krajneho zwjazka Sakskeje w Němskim zwjazku komponistow, prof. Matthias Drude.
Z kameru ćišinu zapopadnył
Njeswačidło (CS/SN). Na slědy ćišiny je so minjene lěta Rakečanski zubny lěkar na wuměnku Andreas Weise ze swojej kameru podał. Wuslědki tohole pytanja pokaza wón nětko w swojej wustajeńcy „Ćišina“ w Njeswačanskim hrodźe. Motiwy k tejle temje njeje wón jenož na kěrchowach kaž w Ochranowje, Ralbicach abo na Praskim židowskim kěrchowje namakał, ale tež w zasněženych a słónčnych krajinach kaž tež w rozpadowacych twarjenjach.
We Wodowych Hendrichecach je Andreas Weise powołanje fotografa nawuknył. Jako přistajeny w rjemjeslniskim zawodźe je wjele hodźin w laborje dźěłał. Dokelž to wěčnje činić nochcyše, nachwata wón připódla abituru a studowaše na to zubnu medicinu. Kamera pak je jeho cyłe žiwjenje přewodźała.
Z 63 lětami je jako zubny lěkar dźěłać přestał a so wot toho časa intensiwnje swojemu wulkemu hobbyjej wěnuje. Mjeztym wšak na swojich jězbach stajnje kameru pódla nima, dokelž tež ze smartfonom dźensa nahladne wuslědki docpěješ, wón praji.
