Za wobaranje wuznamjenjena
Spožčenje Myto Ćišinskeho prěni raz bjez wyšeho zastupjerja Sakskeje
Pančicy-Kukow (SN/CoR). Prěni raz w nowej dobje Myta Ćišinskeho po nowych wustawkach 1994 njeje najwyše serbske wuznamjenjenje ministerski prezident abo dalši wysoki zastupjer Sakskeje přepodał. Serbja sami su tuž sobotu na Čerwjenej žurli klóštra Marijineje hwězdy w Pančicach-Kukowje zamołwitosć přewzali. Tak spožči předsydka rady Załožby za serbski lud Susann Šenkec najprjedy Spěchowanske myto Ćišinskeho teamej Radija Satkula a tak młodźinskej redakciji Serbskeho rozhłosa w MDR. Skupinu zastupujo přewzachu wuznamjenjenje nawodaj Handrij Špitank a Andreja Chěžcyna a za młodych redaktorow Katka Pöpelec a Matej Cyž. Hłowne myto přepoda Šenkec na to delnjoserbskej wučerce a žurnalistce Mari Elikowskej-Winklerowej.
Egon Krenz Ericha Honeckera narunać měł
Na prěnim schadźowanju politběrowa po Lipšćanskej wulkodemonstraciji zwurazni Erich Honecker: „Nětko hižo kapitulanća we wobwodnych wjednistwach SED sedźa.“ Wón měnješe z nimi třoch sekretarow Lipšćanskeho wobwodneho wjednistwa, kotřiž běchu zakročenju policije přećiwo demonstrantam sobu zadźěwali. W NDR so w běhu lěta 1989 tójšto změni. Dźěl opozicije bě so do Noweho foruma zjednoćił, swoju namołwu wozjewił a ludźi prosył ju podpisać. Dźesaćitysacy su namołwu Noweho foruma podpisali. 7. oktobra 1989 je horstka opozicionelnych na farje zwonka Berlina socialdemokratisku stronu w NDR załožiła.
Awkcija na dobro wuměłstwa
Na mjeztym 11. awkciju twórbow tudyšich wuměłcow přeproša Załožba za wuměłstwo a kulturu w Hornjej Łužicy 26. oktobra do Biskopičanskeje radnicy kaž tež do tamnišeje galerije Carla Lohsy, w kotrejž móža sej zajimcy 90 poskićenych twórbow do toho wobhladać.
Biskopicy/Zhorjelc (UM/SN). Město Biskopicy nadźija so wjac kedźbnosće za swoju galeriju Carla Lohsy, z kotrejž česća wuměłca, kiž bydleše tu wot 1926 hač do smjerće 1965. Stajna wustajeńca předstaja mnohe twórby z jeho namrěwstwa. „Smy 2020, lěto jeho 125. narodnin a 65. posmjertnin, jako lěto Carla Lohsy wozjewili“, praji Biskopičanski wyši měšćanosta prof. dr. Holm Große (njestronjan). Składnostnje toho chcedźa tež twórby ze zdalenišeje wokoliny zaso „domoj“ do Biskopic přinjesć.
Wulki zajim na čitanju knježił
Wjac ludźi hač wočakowane
Prěni nazymski koncert we Wulkich Ždźarach přewjedli
Wulke Ždźary (GM/SN/JaW). Prěni raz su zajimcy sobotu we Wulkich Ždźarach nazymski koncert dožiwili. Tak pokročowachu tam z rjanej tradiciju nazymskich koncertow w Hornjej Łužicy na nowej městnosći, štož su hosćo zarjadowanja derje přiwzali.
Sydom prapremjerow
Wubědźowanje wo „Lubinu“ a sydom produkcijow ze serbskim ćežišćom
Choćebuz (SN/bn). Choćebuski filmowy festiwal (CFF) wotměje so lětsa mjeztym 29. raz. Wot 5. do 10. nowembra pokazuja w dohromady wosom hrajnišćach cyłkownje 210 filmow z 45 krajow. Sydom produkcijow dožiwja w tym wobłuku swoju swětowu prapremjeru. Po tradiciji steja paski z wuchodneje Europy w srjedźišću festiwala. Loni běštej Georgiska a Ukraina ćežišćowej krajej, lětsa budźetej to Madźarska a Čorna Hora. Prěni raz prezentuja přinoški z Finskeje, Grjekskeje a Turkowskeje. Wosebitu aktualitu nabudźe w tym zwisku wotewrjenski film „Smuggling Hendrix“, powědacy stawiznu hudźbnika na faktisce mjez na kóncu mjenowanymaj krajomaj dźělenej Cypernskej. Patronaj lětušeho festiwala staj zwjazkowy minister financow a wicekancler Olaf Scholz (SPD) kaž tež ministerski prezident Braniborskeje Dietmar Woidke (SPD).
Serbska rěč a digitalizacija
Budyšin (SN/at). Kotre městno měła přichodnje serbska rěč w procesu digitalneho přewróta zabrać? Wotmołwy na tele prašenje pyta Załožba za serbski lud we wobłuku hižo w lěću připowědźeneje zjawneje konferency (SN informowachu). Hromadźe z dalšimi partnerami a předewšěm ze serbskimi institucijemi chce załožba hač do lěta 2020 cyłkownu digitalnu strategiju za našu maćeršćinu wuwiwać. Nadawk je naročny, prawje wjele idejow su trěbne, kotrež móhli we wobłuku tajkeho zarjadowanja rozjimować.
Mjeztym stej termin a městnosć znatej, kaž bě ze załožboweho zarjada zhonić: Sobotu, 30. nowembra, dźeń do prěnjeho adwenta, budźe cyłodnjowska konferenca w hotelu „Residence“ na Wjelečanskej čo. 32 w Budyšinje. Zarjadowarka prosy zajimcow wo bórzomne přizjewjenje hač do 30. oktobra e-mailnje na adresu , a to rumnostnych wobmjezowanjow dla, kaž rěka.
Wotběh konferency, kotraž budźe w serbskej rěči bjez simultaneho přełožka, hišće wozjewja. Planowane je, zo budu ćežišća w přednoškach wobswětlić a na to w dźěłarničkach ideje pytać.
Šulske deficity njenarunaja
Kulturny konwent wčera na 25. róčnicu załoženja zhladował
Zhorjelc (SN/CoR). Na mały jubilej 25. róčnicy załoženja je wčera Kulturny konwent kulturneho ruma Hornja Łužica-Delnja Šleska na swojim dohromady 114. posedźenju w Zhorjelskim Kulturno-historiskim muzeju dopominał. Čłonojo su sej na „dalše dobre zhromadne dźěło“ připili a so nad małym dźaknym darikom za skutkowanje – knihu Jürgena Maćija „Wuměłcy w Hornjej Łužicy 2“ a Połčničanskim poprjancom z napismom jubileja – zwjeselili.
Nowy rjad SLA z wuspěšnej premjeru
Budyšin (SN/bn). Serbski ludowy ansambl je nowy rjad „Zynki a linki“ zahajił. W srjedźišću zarjadowanjow stejitej literatura a hudźba serbskich wuměłcow, předstajenej wot instrumentalistow SLA kaž tež zwonka Łužicy skutkowacych serbskich dźiwadźelnikow. Wčerawšu premjeru na wupředatej žurli Budyskeje Röhrscheidtoweje bašty wuhotowachu znaty hrajer Stanisław Brankačk a dujerski kwintet Marie-Luise Fryčowa na fleće, Ralf Sarodnick na obowje, Tobias Witke na klarineće, Tereza Kratka na fagoće kaž tež Bernd Neffe na róžku.
Intendantka SLA Judith Kubicec wita hosći w bašće a rozłoži skrótka zakładnu mysličku noweho rjadu. „Telko rjanych knihow a tak mało časa za čitanje – z toho je wurostła ideja, literaturu raz na hinaše wašnje sposrědkować. Nastupajo teksty wobrubjacu hudźbu sym sej skerje rědka hrate kompozicije serbskich komponistow za komorne wobsadki wupytała“, intendantka rjekny.
Erich Honecker wotsadźeny
Jutře je tomu 30 lět, zo bu Erich Honecker na 9. zeńdźenju Centralneho komiteja (CK) SED ze swojich funkcijow wotsadźeny. Nowa doba 19. oktobra 1989 wo tym oficialnu powěsć NDRskeje powěsćernje ADN na 1. stronje wozjewi: „Před tym wotpowědowaše CK próstwje Ericha Honeckera, jeho strowotnych přičin dla wuwjazać z funkcije generalneho sekretara CK SED, z hamta předsydy Statneje rady NDR a z funkcije předsydy Narodneje zakitowanskeje rady NDR.“ Bě to poslednja sada ADN-powěsće z nadpismom „Egon Krenz na generalneho sekretara CK SED wuzwoleny“. Na spočatku načolneho přinoška Noweje doby ze samsnym nadpismom běchu zdźělili, zo su čłonojo centralneho komiteja na swojim 9. zeńdźenju popołdnju, 18. oktobra 1989, w Berlinje „čłona politběrowa a sekretara CK Egona Krenza na generalneho sekretara wuzwolili. Centralny komitej namjetuje Ludowej komorje NDR jeho na předsydu statneje rady a předsydu zakitowanskeje rady wuzwolić“.
