Zaso ruski płun kupować?
Berlin (dpa/SN). Sakski ministerski prezident Michael Kretschmer so za to zasadźuje, po skónčenju wójny w Ukrainje zaso energiju w Ruskej kupować. „Ruska dyrbjała perspektiwisce zaso naš wikowanski partner być – bjez toho, zo podamy so do noweje wotwisnosće“, rjekny politikar CDU nowinarjam. Hospodarske poćahi polěpšuja tež wěstotu Němskeje, Kretschmer rjekny.
Kretschmer bě so wospjet za to wuprajił, zo kupuje Němska zaso ruski zemski płun. Za to bě tež w swójskich rjadach kritiku žnjał. Po nadpadźe Ruskeje na susodnu Ukrainu běchu zapadne kraje sankcije přećiwo Ruskej wobzamknyli.
Ruska bě tute sankcije tež jako hospodarsku wójnu zapada kritizowała a na to pokazała, zo sej zapadne kraje same zeškodźa. Ruske hospodarstwo bě z toho tohorunja potrjechene, je pak sej mjeztym nowych partnerow namakało. Kretschmer rjekny: „Dyrbimy sankcije přećiwo Ruskej tež w swójskim hospodarskim zajimje wobhladować.“ Energijowa politika Němskeje wjedźe k deindustrializaciji.
Cwólbam zakład dźěła wzać
Berlinska CDU plan za bój přećiwo organizowanej kriminaliće schwaliła
Berlin (dpa/SN). Bój přećiwo organizowanej kriminaliće słuša dale k ćežišćam Berlinskeje CDU. Krajne předsydstwo strony je na klawsurnym posedźenju w Magdeburgu předwčerawšim, sobotu, z dźesać dypkow wobstejacy program wobzamknyło, rěčnica zdźěli. „Smy rozsudźeni, syć organizowaneje kriminality w našim měsće rozbić“, generalna sekretarka Ottilie Klein powěsćerni dpa po wuradźowanjach rjekny.
Hnydomny program strony złožuje so na předłohu justicneje senatorki Felor Badenberg (CDU). Zaměr je, kriminelnym syćam pjenježny zakład wzać, přepytowanja pospěšić a tomu zadźěwać, zo cwólby wliw na sudniske jednanja a wobdźělenych ludźi wukonjeja.
Při tym njeměrja so jenož na skućićelow, ale tež na struktury a na syće, kiž w pozadku kriminelne njeskutki zmóžnjeja, w dokumenće rěka. „To rěka, zo dyrbimy kriminalitu tam nadběhować, hdźež wona nastawa – w młowojtym pasmje hospodarstwa a w sćinojtym swěće financnych prudow.“
Perfektne potajnstwo
Železnisku čaru nětko wutwarja
Bayreuth/Drježdźany (dpa/SN). Po lětdźesatki trajacej ćahańcy wo moderny železniski zwisk mjez Nürnbergom a Sakskej so w tymle prašenju skónčnje něšto hiba. Etatowy wuběrk zwjazkoweho sejma je puć runał, zo móhli elektrifikowanje wotrězka mjez Nürnbergom a Schnabelwaidom w Bayreuthskim wokrjesu planować. Tole zdźěleja wjacori zapósłancy regiona. Tak móža nětko dalši dźěl tak mjenowaneje magistrale mjez Frankskej a Sakskej elektrifikować.
„To je rozsudna kročel doprědka“, rjekny zapósłanc CSU Jonas Geisler. Wón je etatowemu wuběrkej dźakowny, zo je „gordiski suk“ za jedyn z najwažnišich železniskich projektow Bayerskeje skónčnje rozsukał.
Wo projekt běchu dołho wojowali, dokelž je knježerstwo w Berlinje na tym dwělowało, zo je elektrifikowanje hospodarsce trěbne. Po tym zo su minjeny čas wjacore železniske mosty w tutej kónčinje zawrěć dyrbjeli, je diskusija wo ponowjenju železniskeje čary a z tym wo elektrifikowanju znowa wudyriła. Frankska magistrala zwjazuje Nürnberg a Drježdźany kaž tež Bayersku a Čěsku.
Delnjoserbska schadowanka z nowostkami
To a tamne (17.11.25)
Po tym zo su mać a jeje dźěsći z Hamburga w dowolu w Turkowskej zemrěli, bu nětko w Istanbulu tež pjekar zajaty, kotryž je we wobchodźe njedaloko hotela swójby dźěłał. Z tym je ličba zajatych na wosom stupała. Po informacijach justicneho ministerstwa jedna so wo wikowarjow ze słódkosćemi, z pjelnjenymi zakłapnicami a z jědźemi z črjewa ćelatow. Zamołwići z toho wuchadźeja, zo běchu so turisća z Němskeje z jědźu zajědojćili. Nan swójby je hišće w chorowni.
Smjertnych nadpadow mjedwjedźow dla je Japanska hońtwu na tute rubježne zwěrjata zahajiła. Dokelž dosć nazhonitych hajnikow nimaja, chcedźa bywšich policistow a powołanskich wojakow pohnuć, hońtwjerske pruwowanje złožić. Mjeztym su samo kruty zakoń wo brónjach změnili. Wot apryla su mjedwjedźe znajmjeńša 13 ludźi morili.
Za serbsku kulturu w stolicy wabili
Berlin (SN/MiP). Na wječor ze serbskej literaturu a hudźbu staj wčera społnomócnjeny Swobodneho stata Sakskeje Markus Franke a społnomócnjena sakskeho statneho knježerstwa za naležnosće Serbow Franciska Brechowa do sakskeho zastupnistwa pola Zwjazka w Berlinje přeprosyłoj. Naposledk mjenowana wjedźeše po programje wječora, kotryž wuhotowaštaj dźiwadźelnik a moderator Axel Thielmann a Lipšćanski jazzowy trijo Sotry wjesela.
Naprawy na dobro industrije
Berlin (dpa/SN). Koalicija CDU/CSU a SPD chce z nišimi płaćiznami miliny industriji pomhać. Nimo toho zniža dawki na tikety za lětanje a planuja twar nowych płunowych milinarjow. Na tute naprawy su so wodźacy zastupnicy unije a SPD wčera wječor dojednali. Planowany je tež tak mjenowany fonds Němskeje, kotryž ma wjace priwatnych inwesticijow mobilizować. Bjez wuslědka pak wostachu nastupajo wjele diskutowany zakaz bencinowych a dieselowych awtow.
Pentagon připowědźa operaciju
Washington (dpa/SN). Po tym zo je najwjetša wójnska łódź swěta do kónčiny łaćonskeje Ameriki dojěła, planuja USA tam wojersku operaciju přećiwo cwólbam pašowarjow drogow. Tole je nawoda zakitowanskeho ministerstwa Pete Hegseth připowědźił. Misija zakituje domiznu a škita USA před drogami, piše Hegseth w interneće. Wójsko USA bě minjeny čas wjacore čołmy drogowych kurěrow zničiło a dźesatki ludźi moriło. We Venezueli přihotuja so na móžnu wójnu.
BBC prosy Trumpa wo wodaće
Kretschmer: Ludźi njepřiwzać
Drježdźany (dpa/SN). Sakski ministerski prezident Michael Kretschmer (CDU) chce ličbu nowych ćěkancow z Ukrainy w swobodnym staće wobmjezować. „Ličby su minjene měsacy drastisce stupali“, rjekny Kretschmer nowinarjam. „Tole wuwiwa so na wulki prud. Njeje prosće móžno, zo dale a wjace ludźi přiwzamy.“
Hłowna přičina stupaceje ličby ćěkancow su nowe postajenja w Ukrainje, kiž nětko tež mužam w starobje mjez 18 a 22 lětami dowoleja, swój kraj wopušćić. Wotpowědujo tomu ličby za škitom pytacych z Ukrainy spochi přiběraja: W juliju bě 35 muži do Sakskeje přišło, w awgusće bě jich sto. W septembru přińdźe 1 253 Ukrainjanow do swobodneho stata, to je nowy rekord po awgusće 2022.
