Kreml dalši zajim za zeńdźenje signalizował – Trump je w nocy wotprajił

Moskwa/Washington (dpa/SN). Hinak hač mjezynarodne medije twjerdźa, ruske knježerstwo ze swojimi přihotami za zeńdźenje mjez ruskim prezidentom Wladimirom Putinom a US-ameriskim prezidentom Donaldom Trumpom pokročuje. „Dobre přihoty su wažne, wšako nochce nichtó swój čas brojić, ani Trump ani Putin“, tak cituja ruske powěsćernje nowinskeho rěčnika Krjemla Dmitrija Peskowa. „Zo smy zeńdźenje wotprajili, je prosće njewěrnosć“, wón wuzběhny.

Často rozprawjamy tež w Serbskich Nowinach wo tym, zo je něhdźe něchtó na staršeho čłowjeka zazwonił, so jako wnučk XY w nuzy wudawał, wo pjenjezy prosył a w mnohich padach nic runjewon snadnu sumu dóstał. Před tajkim telefonatom je lědma štó škitany. Wopytowarjo wčerawšeho zarjadowanja Domowinskeje skupiny Pančicy-Kukow pak nětko wědźa, kak móža so derje wobarać, mjenujcy z maćeršćinu. Serbscy dźědojo a serbske wowki dźě ze swojimi wnučkami nadźijomnje serbsce rěča. A hdyž potom nadobo němski „wnučk“ zazwoni, žno dyrbjało to podhladne być a wšitke alarmowe ­zwony zwonić dać. W tym nastupanju bě wčerawši skupinski wječor ze serbskimaj wobydlerskimaj policistomaj runje tak ­zabawny kaž powučny. Tak mjenowany wnučkowy trik znajmjeńša tule hižo fungować njesměł, wšako maja starši ludźo ze swojej maćeršćinu dobry srědk wobaranja přećiwo kriminelnym njedočinkam. Marian Wjeńka

Britiski kral Charles III. a kralowna Camilla přebywataj tuchwilu w Romje, zo byštaj dźensa bamža Leja XIV. we Vati­kanje zetkałoj. Statny wopyt steji w znamjenju zbliženja mjez katolskej a jendźelskej cyrkwju. Bamž chce mjez druhim Charlesej III. titul kralowskeho konfratera spožčić. Konfrater je cyrkwinske zapři­jeće za sobubratra. Spožčenje titula je wuraz spiritualneje zwjazanosće mjez cyrkwjomaj.

Přećiwo Tilmanej Kubanej, zapósłancej CDU w zwjazkowym sejmje, su juristiske přepytowanje zahajili a w tutym zwisku jeho parlamentarisku imunitu zběhnyli. Bywši šef Młodeje unije so sam k tomu wuprajić nochcyše. W internej mejlce běše pisał, zo je so před něšto měsacami ze žonu rozešoł a zo „wumjetuja mi w tutym zwisku wěcy, kotrež wehementnje wot­pokazuju“.

Choćebuz (dpa/SN). Před kulturnym centrumom „Tučelowy kombinat“ w Choćebuzu je so kontejner palił. Policija nětko pruwuje, hač wobsteji zwisk ke Christopher Street Day (CSD), kotryž so kónc tydźenja w měsće wotměje. Tež statny škit pozadki přepytuje. Policija dale wujasni, zo je jej wědome, zo ma so woheń před tutym objektom runje w tydźenju do CSD rozjasnić.

Iniciatiwy w delnjołužiskim měsće rěča wo zapalerskim nadpadźe na zetkawanišćo queernych ludźi. Póndźelu popoł­dnju bě so kontejner palił, při čimž so susodna fasada wobškodźi. Zranił so na zbožo nichtó njeje. Wohnjowa wobora je woheń po něhdźe 15 mjeńšinach zhašała. Fachowcy kriminalneje policije pytachu za slědami a zahajichu přepytowanje za přičinu wohenja.

Njedźelu budźe policija CSD pod hesłom „W měrje a mnohotnosći zjednoćeni“ a dalšej přizjewjenej zhromadźiznje w Choćebuzu wobkedźbować a zawěsćić. Prawicarskoekstremna skupina „Němska młodźina doprědka“ je w socialnych medijach připowědźiła, zo chce so na protestach přećiwo CSD wobdźělić.