„Swoboda kiwa!“ w Podstupimje
Festiwal Łužica zaso kaž prjedy
Budyšin/Chrósćicy/Hochoza (SN/mb). Za 14. mjezynarodny folklorny festiwal Łužica 6. do 9. julija liča z 20 000 přihladowarjemi a cyłkownym etatom 300 000 eurow. Wot 50 skupin z wukraja, kotrež bychu so rady wobdźělili, chcedźa organizatorojo dźesać přeprosyć. Při tym hraje „spektrum temperamentow“ a zakótwjenje w etniskej mjeńšinje rozsudźacu rólu, praješe předsyda přihotowanskeho wuběrka Marko Kowar Serbskim Nowinam. Kaž w času do pandemije budźe znajmjeńša 600 sobuskutkowacych, połojca z wukraja. Woni wočakuja serbske ansamble ze wšěch regionow Łužicy. Program so w Budyšinje a na třoch statokach w Hochozy a na šěsć dworach w Chrósćicach wotměje. Zajimcy móža so běžnje pod informować.
Wo financowanje etata staraja so Załožba za serbski lud, kulturny rum, komuny a wopytowarjo ze zastupnym lisćikom. Lětuši festiwal je wosebite wužadanje: „Dyrbjachmy po pandemiji zaso pola nule započeć“, rozłoži Marko Kowar, a na přikład zwěsćić, hač wšitcy partnerojo z hospodarstwa hišće eksistuja.
Sporjedźeja a wurjedźa cyrkej
Za kulturu nowe koordinowanišćo
Choćebuz (SN/at). Kraj Braniborska wotewrje jutře w Choćebuzu Łužiske kulturne koordinowanišćo. Nowe zarjadnišćo je wotnožka ministerstwa za wědomosć, slědźenje a kulturu. Jako bytostny wobstatk při zwoprawdźenju Kulturneho plana Łužica skutkuje wone jako šarněr mjez zjawnje spěchowanej kulturu a kulturnym a kreatiwnym hospodarstwom. Zdobom ma tworjenju syćow mjez kulturnymi akterami dopomhać.
Wotpohladane zhromadne dźěło je šěroko zapołožene. Wuske maja styki z Łužiskim hospodarskim regionom WRL, z akterami Łužiskeho festiwala, ze za kulturu zamołwitymi w Choćebuzu a wokolnych wokrjesach kaž tež z kulturnym rumom Hornja Łužica-Delnja Šleska w Sakskej być. Nowe koordinowanišćo ma podpěrać, zo Łužicu jako europsku kulturnu krajinu zaznawaja a wuwiwaja.
Braniborska ma kulturu za centralny motor strukturneho wuwića we Łužicy. Wona ma přinošować, regionalnu identitu a atraktiwitu tudyšeje krajiny wuměłstwa a kultury skrućić, nastorki posrědkować mjez druhim za wjace wobydlerskeho angažementa w regionje.
„Paternoster“: Marka a wotskočnišćo za pisacy dorost
Prěnje zarjadowanje Zwjazka serbskich wuměłcow (ZSW) w nowym lěće bě zdobom zakónčenje wjace hač 24 měsacow trajaceje přestawki. We wobłuku mjeztym hižo sedmy raz wuhotowaneje literariskeje rozmołwy rjadu „tracTare“ diskutowachu minjeny pjatk něhdźe dźesać zajimcow w Budyskej Röhrscheidtowej bašće wo antologiji „Paternoster 9“.
Budyšin (SN/bn). Jako zazběh do diskusije poda Dietrich Šołta kompaktnu recensiju, wuzběhnywši wosebje „elegantne wuhotowanje“ knihi, wo kotrež bě so Isa Bryccyna postarała, a chwalo na přikład „žortne limericki w bjezporočnej serbšćinje z pjera Damiana Dyrlicha“, poetiske přinoški Źil-Francis Ketlicojc, Pětra Dźisławka a Maksa Bagańca kaž tež „derje pisanu“ prozu Patricije Kralec. Přitomnymaj awtoromaj Clemensej Bobce a Annamarje Zahonowej wobswědči wón „emocionalnje hnujace ekspresiwne sady“ resp. wurjadne „wopisowanje žiwjenskich wobstejnosćow z optimistiskim widom na woprawdźitosć“.
Ze swingom lěto zahajili
Akustiski portret
Ansambl zaso z rozmachom
Budyšin (SN/bn). Serbski ludowy ansambl je w lěće 2022 cyłkownje něhdźe 37 000 přihladowarjow na 188 předstajenjach powitał, štož je po słowach za zjawnostne dźěło domu zamołwiteho Stefana Cuški „wo tójšto mjenje hač w lětach do korony“. 128 předstajenjow dyrbjachu wotprajić. Potrjechene běchu „na přikład rjadaj ptačokwasnych programow za dźěći a dorosćenych abo rjad nowolětnych koncertow“. Z dohromady 5 000 přihladowarjemi wukopachu so „Błótowske powěsćowe nocy“ jako lětsa najwjetši publikumowy magnet.
Proby za prapremjeru zahajili
Wabjace wustajeńcy a dźěłarnički
Budyšin (SN/bn). Serbski muzej w Budyšinje zhladuje na „dosć wuspěšne lěto 2022“. Na dohromady 172 zarjadowanjach inkluziwnje wernisažow a finisažow zličichu cyłkownje wjace hač 12 000 wopytowarjow, z čimž su po słowach kuratorki Andreje Pawlikoweje „jara spokojom“, byrnjež přerěznu ličbu do pandemije cyle njedocpěli. Mjez wjerškami běchu tři wosebite wustajeńcy. Wot oktobra 2021 do lońšeho apryla pokazachu zhromadnje z Goethowym institutom přehladku „5 x Němska po wšěm swěće – W špihelu migracije“ wo němskich wupućowarjach na pjeć kontinentach. Wot meje do septembra bě Budyšin z hosćićelom mjezynarodneje wustajeńcy „Party w 21. lětstotku“, prezentowaceje narodnu drastu Słowakow něhdy a dźensa. Hišće hač do kónca lětušeho februara pokazaja ekspoziciju „Wšo je krajina – Alles ist Landschaft – Wšykno jo krajina – Wszystko jest pejzażem – Serbski moler Jan Buk“ pod zhromadnym patronatstwom Sakskeje a Braniborskeje kaž tež pólskeju wojewódstwow Delnja Šleska a Lubuš.
