Budyšin (SN/bn). Swjedźenski ćah po měsće kaž tež sep dźěłarničkow, klankodźiwadłowych předstajenjow a artistiskich prezentacijow – tak zakónčištej Jeleniogórski Centrum kultury a tamniše dźiwadło Teatr Odnaleziony swoju 15. turneju „Skoki w miasto“ (Skoki po měsće) minjeny kónc tydźenja w Budyšinje. Kooperaciskej partneraj na městnje běštej towarstwo Kamjentny dom a bara Sundowner.
Choćebuz (MH/SN). Zběrka Carla Blechena města Choćebuz je wotnětka w restawrowanych wjerchowskich stwach Rogeńskeho hrodu widźeć. Nowoprezentaciju je wyši měšćanosta Holger Kelch (CDU) swjatočnje wotewrěł. W třoch rumnosćach, w kotrychž měješe wjerch Pückler wokoło 1850 swoje prěnje bydlenje, prezentuja błyšćate mólby a dźěła na papjerje ze sławneje zběrki města Choćebuz. Z tym zběrku swojemu woznamej wotpowědnje prominentnje wustaja. Prezentacija Blechenowych twórbow w Rogeńskim hrodźe je najwjetša po wšěm swěće.
Nowa prezentacija znazornja kopicu zběrki w nowym swětle a wopřijima twórby, kotrež zdźěla hišće ženje pokazane njebuchu, na př. wójnska strata Johana Christiana Clausena Dahla, kotraž bu njedawno wot Hamburgskeje wuměłstwoweje hale restituowana. Prěni raz znazornjena je tež zběrkowa koncepcija 1927: Tak stupja twórby Adolpha von Menzela a impresionistow Maxa Liebermanna a Lovisa Corintha z tymi Blechena do napjateho dialoga.
Salzburg (klb/SN). Na swjedźenskich hrach w Salzburgu, kotrež su 26. julija w tamnišej „Felsenreitschule“ zahajili, skutkuje lětsa młody serbski hudźbny talent sobu – Valentin Bjedrich, kotryž pochadźa z Wěteńcy a studuje tuchwilu na Salzburgskim Mozarteumje. Wón spěwa w tamnišim Bachowym chórje na swjedźenskich hrach sobu.
Na zahajenskim zarjadowanju minjenu wutoru pokazachu w prěnim dźělu operu „Herzog Blaubarts Burg“ znateho komponista Bély Bartóka. W druhim dźělu dožiwi publikum operu „De temporum fine comoedia“ Carla Orffa. Na młodeho serbskeho baritona čaka nětko hišće pjeć předstajenjow Orffoweje opery w Bachowym chórje. Wosebita česć bě Bjedrichej sobu skutkować na zahajenju Salzburgskich swjedźenskich hrow a na nich europsku hymnu „Ode an die Freude“ ze synfonije čo. 9 Ludwiga van Beethovena sobu spěwać. Awstriski zwjazkowy prezident Alexander van der Bellen namołwješe w swojej swjedźenskej narěči k jednoće Europy, zo bychmy tuchwilnu krizu derje zmištrować móhli.
Budyšin (SN/bn). Swjedźenske lěto Kocora a Zejlerja bě Ludowemu nakładnistwu Domowina přičina wudać knižku „Čas ma křidła“. Kaž jednaćel LND Syman Pětr Cyž we wobłuku premjerneje prezentacije publikacije wčera w Budyskej Smolerjec kniharni wuzběhny, jedna so wo „darowansku knihu, přewšo wysokohódnotnje wuhotowanu, kotraž ma tomu słužić, tworjenje Handrija Zejlerja předewšěm młodźinje spřistupnić a jeho słowa dale dawać“. Wudawaćelce Marce Maćijowej bě „knihu zestajeć nadawk, za kotryž so LND dźakuju. Mějach składnosć, so znowa z tworjenjom Zejlerja rozestajić. Jeho teksty dźě su dosć znate, to pak skerje w spěwanej dyžli čitanej formje. Z nimi so wospjet zaběrać bě mi wulke wjeselo.“ Wuraznje dźakowaše so Maćijowa lektorce Weronice Žurowej „za kritiske přewodźenje“, Isy Bryccynej za „wulkotne wuhotowanje“ a Fabianej Kaulfürstej za „wobrubjenje a sobuwuhotowanje knižneje premjery“.
Budyšin (SN/CoR). Wo swojich nazhonjenjach jako wučer za čěšćinu w Serbach je Jan Breindl wčera wječor wobdźělnikam mjezynarodneho Lětnjeho kursa za serbsku rěč a kulturu Serbskeho instituta w internaće Budyskeho Serbskeho gymnazija powědał. Pjeć lět bě wón na serbskich zakładnych šulach w Radworju, Budyšinje, Ralbicach, Pančicach-Kukowje a Worklecach wuwučował, nětko jeho zrěčenje wuběži – prawy wokomik to za bilancu.
Lětni serial SN
2. dźěl
Załožba za serbski lud je loni idejowe wubědźowanje „Rěč wjaza. Rěc zwězujo. Sorbisch verbindet.“ přewjedła. 27 projektow su z pjenježnym dobyćom w pjeć kategorijach 500 do 10 000 eurow mytowali. W našej lětnjej seriji předstajamy wubrane dobyćerske projekty, dźensa „Zadźěwanje podjeća serbsce“:
Drje najnjewšědniši wuznamjenjeny wubědźowanski přinošk pochadźa z Błótow. Swobodnje skutkowaca grafikarka Karen Ascher z Lubina njebě „sprawnje prajene z tym ličiła, zo mi za tónle projekt spěchowanje přizwola“. Podjećuzadźěwanske srědki dźě su nic jenož we Łužicy nadal trochu łoskoćiwa tema, kotruž mnozy skerje priwatnemu dyžli zjawnemu wobłukej přirjaduja, a kotraž so na prěni napohlad tak docyła hłownemu zaměrej wurisanja, mjenujcy šěrić serbšćinu, njehodźi. Hladajo na konkretny plan iniciatorki projekta wšak wěcka cyle hinak wupada. Što, hdyž nic seksualita, je z bytostnym nahonom za komunikaciju?
Mjeztym hižo šěsć wudaćow podcasta Radworčanow Jakuba Wowčerja a Daniela Nuka je na streamingowych platformach kaž Spotify, Deezer, PlayerFM a dalšich zjawnosći přistupnych. Tydźensce wozjewjataj wonaj tam swoje rozmołwy pod mjenom „Serbski Buschfunk“. Jakub a Daniel znajetaj so hižo z časa dźěćatstwa, staj maturu na Budyskim Serbskim gymnaziju złožiłoj a wěsty čas runočasnje w Lipsku studowałoj. Daniel Nuk dźěła tučasnje jako projektowy manager w Drježdźanach, Jakub Wowčer jako swobodny žurnalist pola Serbskeho rozhłosa. Što so dokładnje za jeju podcastom chowa, wo tym je so Jan Bogusz z nimaj rozmołwjał.
Kak mamy sej scyła prěni krok za ideju waju podcasta předstajić?