Budyšin (SN/at). Z rozsudom, we wobłuku změny strukturow w Budyskim ­a Zhorjelskim wokrjesu Němski centrum astrofyziki (NCA) wutworić, wurosće tež za Serbski institut wužadanje. Jeho wědomostne dopóznaća su za zdźěłanje cyłkowneho koncepta NCA požadane.

Kaž serbske slědźenišćo krótko do hód zdźěli, budźe wone na wudźěłanju koncepta za slědźenje wo transformacijach jako wobstatk cyłkowneho koncepta NCA wobdźělene. Drježdźanska Techniska uniwersita budźe za natwarnu fazu třoch lět zamołwitosć jako projektowy nošer přewzać. Pod jeje nawodom wšelake wědomostne zarjadnišća dźěłaja. Tak stara so Serbski institut předewšěm z nowym wotrjadom regionalne wuwiće a škit mjeńšin sobu wo fachowu koordinaciju inowaciskich wobłukow. Na tele wašnje móža institutnicy na jednej stronje na powšitkowne serbske potrěbnosće w zwisku z nastaćom slědźerskeho wulkoprojekta pokazać, na tamnej pak swójsku specifisku serbsku ekspertizu kaž tež swoje kompetency w slědźenju wo transformacijach a w transformatiwnej wědomosći do natwara NCA přinošować.

Zejlerjowe wuprajenje „Nowe lěto, nowe časy“ hodźi so derje k nowemu lětnikej Rozhlada, kotryž wuńdźe wotnětka přezcyłnje barbny. Tak skutkuje wuhotowanje nětko bóle čerstwe, wosebje pak profituja z toho nastawki k wuměłskim temam, dokelž móža čitarjo wukładowanjam awtorow lěpje sćěhować. W aktualnym wudaću nastupa tole recensiji Marije Suchec wo wustajeńcy „Wšo je krajina. Serbski moler Jan Buk“ w Budyskim Serbskim muzeju a Wernera Měškanka wo wustajeńcy „Hella Stoletzki | měki / soft“, kotraž so tuchwilu w Choćebuskej Wuměłstwowej hali Łužica pokazuje. Dale wobsahuje januarske čisło komentar Pětra Šołty „Nudlowa poliwka na holanskej krajinje“, hdźež rozestaja so na žortne wašnje z akcijemi wobswětoškitarjow, kotřiž wobškodźa po wšěm kraju wuměłske twórby w muzejach. Denise Schallenkammer je přinošk wo wuznamje „serbskeho filma“ napisała. W nim wopisuje ćežke stejišćo filmoweho tworjenja w zašłosći.

Budyšin (SN). Lipšćanska rěčespytnica dr. Inge Bily je w Ludowym nakładnistwje Domowina (LND) njeparujomnu přiručku „Slawische Personennamen in Ortsnamen zwischen Saale und Bober/Queis“ předpołožiła. Kniha wjedźe wuslědki slědźenjow wo serbskich/słowjanskich wosobowych a městnych mjenach w staroserbskim rumje mjez Solawu na zapadźe a Bobrom/Kwisu na wuchodźe hromadźe a je spušćomny zakład za dalše mjenowědne slědźenja. Z pomocu podatych słowotwórbnych srědkow, historiskich dokładow a pokazkow literatury hodźa so wšitke mjena spušćomnje přepruwować.

Nuknica (SN/bn). Towarstwo barakka je po dwulětnej přestawce znatych přičin dla wčera mjeztym hižo 9. raz koncert pod hesłom „Hody nimo – Punkrock ­fever“ wuhotowało. W kopatej połnej Nukničanskej barace zahraštej skupinje JeDi z Berlina a GT z Wulkich Rědorjec (Großröhrsdorf). „Znate přičiny“ běchu planowanemu wustupej duwa Circolo Viciozo, tohorunja ze stolicy Němskeje, krótkodobnje zadźěwali. Je takrjec za­stupujo zaspěwa a zahudźi spontanje Choćebuski spěwytwórc resp. „akustisce agěrowacy punk“ Yuppiescheuche.

JeDi zahajichu wječor z hesłu koncertoweho rjadu wotpowědowacej melanžu punka a „garažoweho“ rocka. Serbsce so z „my smy skupina GT“ předstajaca band doda sylnje na groove wusměrjenu wariantu alternatiwneho rocka ze zaměškami metala a dooma. Yuppiescheuche ­na gitarje da koncertej ze swójskimi, ­towaršnostnokritiskimi štučkami kaž tež z adapcijemi znatych spěwow najwšelakorišich žanrow wuklinčeć. Zarejowacy sej publikum dźakowaše so wšitkim skupinam dołho aplawdujo a zasłuži sej tak wot kóždeje kapały přidawk.