Klasiske wjerše a eksperimentelne formy
Zły Komorow (kap/SN/bn). „Zahrodowe město“, zetkawanišćo a galerija Marga w Złokomorowskim měšćanskim dźělu Brězk (Brieske) běchu wospjet z atmosferisce hodźacym so hosćićelom mjeztym hižo 10. łužiskeho festiwala lyriki. Składnostnje jubileja bě sej zarjadowar, towarstwo Dorostowy literarny centrum „Pisam“, dohromady něhdźe 40 poetow a poetkow, spěwytwórcow, hudźbnikow a tworjacych wuměłcow z cyłeje Němskeje přeprosył, zo bychu wot minjeneho štwórtka hač do předwčerawšeho narodniny swjedźensce wuhotowali. Serbski podźěl bě tež lětsa po zwučenym wašnju dosć prezentny.
Štwórtk zahaji „zažrany čitar“ Raz festiwal z klankodźiwadłowym předstajenjom „Lyrika njeje ničo ke chłóšćenju“. Pjatk slědowachu čitanja čłonkow a čłonow Złokomorowskeho kružka awtorow „Kostrjanc“. Sobotu čakachu wjacore dźěłarnički, kaž na přikład „Knihićišć po wašnju Gutenberga“ a „Poezija a kaligrafija“ na zajimcow; na cyłkownje štyrjoch jewišćach prezentowachu so najwšelakoriši awtorojo ze swojimi basnjemi, kotrež sahachu wot přewšo „klasiskich“ wjeršow hač k najeksperimentelnišim formam.
Filmiski dohlad na łužiske fasety
„Zhromadnje we wuskim zwisku“ rěka nowy rjad Budyskeho towarstwa Kamjentny dom, we kotrehož wobłuku pokazaja měsačnje wubrane filmy, wobswětlace „regionalne, towaršnostnje relewantne a/abo biografiske wosebitosće a temy“. Zahajili su jón minjeny pjatk z „Łužiskimi dohladami“.
Budyšin (SN/bn). Premjera bě kooperatiwne zarjadowanje Kamjentneho domu, Nysoweho filmoweho festiwala, Serbskeho ludoweho ansambla, Domowiny, Załožby za serbski lud, Serbsko-Němskeje syće Łužycafilm a Choćebuskeho filmoweho festiwala (CFF). Něhdźe 20 zajimcow je sej dohromady šěsć paskow wobhladało, kotrež buchu zdźěla hižo we wobłuku rjadu CFF „Heimat – Domownja – Domizna“ předstajene.
Přichadźeja z cyłeho swěta
Znowa wotewrjena synagoga w Zhorjelcu zhladuje na lětnu bilancu
Zhorjelc (AK/SN). Zhorjelska synagoga słuša k najbóle wopytowanym zajimawostkam města. Lěto po znowawotewrjenju je rezimej jara pozitiwny. Tole podšmórny předsyda Spěchowanskeho kruha Zhorjelska synagoga Markus Bauer w aktualnym newsletteru. Naličichmy „wjace hač 15 000 wopytowarjow. Koncipowany multimedia-guide a wučbnej filmaj stej so w praksy wupruwowałoj.“ Wjace hač 140 wodźenjow je towarstwo organizowało, mjez nimi mnohe poskitki za młodostnych a šulske rjadownje. Spěchowanski kruh a kulturny serwis města, kotryž synagogu w nadawku komuny wudźeržuje, dowěrliwje hromadźe dźěłatej. Najebać wobmjezowanja koronapandemije dla so wot znowawotewrjenja něhdźe 30 zarjadowanjow w synagoze wotmě. K tomu słušeja koncerty, přednoški a čitanja.
Sta na jewišću a za nim
Premjera za wosebity klawěr
Łaz (AK/SN). Składnostnje 25. posmjertnin komponista Jana Pawoła Nagela (1934–1997) je Spěchowanske towarstwo Zetkawanišćo Dom Zejlerja a Smolerja Łaz wčera z komornym koncertom wosebity Nagelowy klawěr přepodało. „Klawěr je něhdźe 100 lět stary. Jan Pawoł Nagel hraješe jako dźěćo pola swojeje susodki knjeni Soratoweje na nim. Wona jemu instrument testamentarisce zdźědźi“, předsyda towarstwa Reinhardt Schneider koncert zahaji. Klawěr słušeše pozdźišo synej komponista dr. Matej Nagelej, kiž da jón naročnje restawrować a jón naposledk spěchowanskemu towarstwu dari.
Koncert tónle skutk hódnoćeše a klawěr swjatočnje poswjeći. Zdobom bě to spominanje na komponista a dźak dołholětnym spěchowarjam, darićelam a sponsoram towarstwa.
Hrajerki a hrajerjo kaž tež čłonki a čłonojo orchestra a baleta ...
Improwizacije, ale tež serbske ludowe pěsnje, někotražkuli ...
Jan Wawer
Z nowej app delnjoserbšćinu wuknyć
Nětko steji runje tak app za šmóratko k dispoziciji, z kotrejž móža zajimowani delnjoserbsku rěč wuknyć. Institut za sorabistiku Lipšćanskeje uniwersity je hromadźe z Rěčnym centrumom WITAJ na aplikaciji dźěłał.
Lipsk (SN/at). Wo nowym wudobyću za wužiwarki a wužiwarjow šmóratka je Till Wojto z Instituta za sorabistiku w Lipsku informował. Kaž wón zdźěli, je app komercielny wudźěłk předewzaća Simya Solutions z Thailanda. App hodźi so wot webstrony instalować, runje tak namakaš ju w App Store za Apple-nastroje abo w Google Play Store za androidne smartfony.
Zakładny kamjeń połoženy
Kónc žnjenca 1947 woswjeći po zakazu nacijow 1937 wožiwjena Maćica Serbska swoje 100. narodniny. Wjeršk jubileja bě swjatočne połoženje zakładneho kamjenja 24. awgusta za nowy Serbski dom při Póstowym naměsće, kotryž měješe na městnje kónc wójny zničeneje Lessingoweje šule nastać. Dźěłowe brigady Serbskeje młodźiny – prěnja bě Serbskopazličanska – běchu w dobrowólnym njepłaćenym dźěle za to rozpadanki bywšeje Lessingoweje šule zrumowali a wotwjezli.
24. žnjenca 1947 zhromadźichu so Serbja na nowym twarnišću. Tehdyši předsyda Maćicy Serbskeje, 62lětny slawist a wědomostny bibliotekar dr. Jan Wjacsławk, porěča runje tak kaž prěni předsyda Domowiny, jeje sobuzałožer 1912 Arnošt Bart-Brězynčanski a tehdyši předsyda Serbskeje młodźiny Jurij Brězan. Prof. dr. Ota Wićaz rysowaše stawizny stareho Serbskeho domu na Lawskich hrjebjach. Wšitcy rěčnicy dźakowachu so Čerwjenej armeji za wuswobodźenje wot nacistiskeho nadknjejstwa. W nadawku Sowjetskeje wojerskeje administracije wupraji podpołkownik Fermatowič dobre přeća za natwar a wužiwanje noweho Serbskeho domu.
