Přehladka debjenych jejkow w mnohotnosći jónkrótna
Slepo (JoS/SN). Jutrownu wosebitu wustajeńcu „Jejka swěta – Swět jejkow“ su minjeny pjatk w Slepjanskim Serbskim kulturnym centrumje (SKC) wotewrěli. Widźeć je něhdźe 600 jejow z 45 krajow. Znosył a zestajił bě přehladku 68lětny Erhard Schwerin z Lipska. Wón bě wjele lět konserwator w Lipšćanskim Grassijowym muzeju, hdźež je zběrka debjenych jejkow jeho zahoritosć zbudźiła. Dźensa je něhdźe 3 000 jejkow z 50 krajow w jeho wobsydstwje.
Taktika přez socialne medije?
Budyšin (SN/bš). Aktualne powěsće njeposrědkuja jenož „tradicionalne“ kanale kaž nowiny, radijo abo telewizija, ale dźensniši čas tež socialne medije. Wosebje wójnu na Ukrainje nastupajo hodźa so informacije wo podawkach we woprawdźitym času sćěhować. Jednu móžnosć wozjewjenja skići swětoznata internetna platforma Twitter.
Ukrainski prezident Wolodymyr Zelenskyj bě sej w aprylu 2019 na Twitteru oficialny přistup zarjadował, někotre měsacy do swojeho wólbneho dobyća jako prezident. Jeho sćěhuja hač do dźensnišeho něhdźe 4,4 miliony wužiwarjow. Wot spočatka wójny pisa Zelenskyj wo aktualnym połoženju runje tak wo rozmołwach ze statnymi nawodami. To čini wón w ukrainšćinje a jendźelšćinje. Tak tematizowaše na přikład 1. měrca w telefonaće z němskim kanclerom Olafom Scholzom wobtřělenje ukrainskich bydlenskich štwórćow přez ruske wójsko – w samsnym času měrowych jednanjow mjez Ukrainu a Ruskej. Mjez druhim skedźbni tež na nuznosć přistupa Ukrainy k Europskej uniji. Kancler Scholz na to w syći reagowaše, wuprajejo Ukrainjanam sobučuće a solidaritu Němskeje.
Jan Wjacsławk
Kraj Pruska jako jadro militarizma rozpušćeny
Před 75 lětami bu Swobodny stat Pruska přez zakoń čisło 46 Aliěrowaneje kontrolneje rady rozpušćeny. Zastupnicy štyrjoch dobyćerskich wulkomocow Druheje swětoweje wójny podpisachu zakoń, z kotrymž skónči so wažna etapa powójnskich stawiznow Němskeje po kapitulaciji 8. meje 1945.
Jako wopodstatnjenje zakonja rěkaše w preambli: „Pruski stat bě wot dawna stajnje hižo nošer militarizma a reakcije w Němskej. Wotpowědnje zajimam za zachowanje měra a wěstoty mjez ludami a přeću, noworjadowane politiske zakłady zawěsćić, so pruski stat jako knježerstwo, kaž tež wšitke jemu podrjadowane zarjady a institucije rozpušća.“
Solidarizuja so z Ukrainu
Znamjo solidarity z Ukrainu chce Złokomorowske Nowe jewišćo nimo hižo wozjewjenych stejišćow sobudźěłaćerjow přichodny kónc tydźenja tež na jewišću sadźić, a to z předstajenjomaj, kotrejž stej we wobłuku mjezynarodneho projekta „Borderlands“ nastałoj.
Zły Komorow/Lwiw (SN/CoR). Loni předstaji Złokomorowske Nowe jewišćo hromadźe z Lwiwskim dźiwadłom Teatr Lesi a Kölnskim dźiwadłowym kolektiwom Futur3 inscenaciju „Als der Krieg nach Rondo kam“, kotruž chcedźa sobotu popołdnju znowa pokazać. Zakład krucha za přihladowarjow wot staroby wosom lět je ukrainska dźěćaca kniha, kotraž nasta 2015 jako reakcija na wójnu w Donbasu. Awtoraj staj Romana Romanyšyn a Andrij Lesiw.
