Budyšin (SN/JBo). Serbska hip-hopowa trójka Nowa Doba z Pětrom Dźisławkom, Florianom Kießlichom a Symanom Hejdušku je w zašłych měsacach štyri nowe spěwy produkowała. Titul projekta rěka „Budyski Bounce“. „Tuta EP (Extended Play) je naša prěnja twórba wjetšeho razu – potajkim kaž małki album. Zaběramy so tu z Budyšinom, ale wězo tež z mnohimi dalšimi temami. Florian přisłuša Budyskej katolskej wosadźe a ja sam běch w Budyšinje wotrostł – tohodla so tež trochu jako Budyskaj hólcaj widźimoj. Nahrawali smy wšitko – titulej wotpowědujo – w Budyskim Serbskim domje, w něhdyšim studiju MDR. Jedyn spěw tuteje EP rěka ,Serbska lyrika‘ a je hižo online přistupny“, Pětr Dźisławk rozłožuje.

Bórkowy (SN/bn). Serbski ludowy ansambl je swój kóždolětny wjeršk pod hołym njebjom w Delnjej Łužicy wuspěšnje zakónčił. Minjeny kónc tydźenja je sej na cyłkownje třoch předstajenjach dohromady něhdźe 5 200 wopytowarjow inscenaciju rjadu Błótowske powěsćowe nocy „Nawrót“ wobhladało. Produkcija bu znowa w kooperaciji z Turistiskej informaciju Bórkowy na jewišću pod tamnišej Bismarckowej wěžu zwoprawdźena a wo­spjet wot ministerstwa za wědomosć, slědźenje a kulturu Braniborskeje kaž tež wot Załožby za serbski lud spěchowana.

Čiłe rozmołwy – kaž tu mjez wuměłču Hellu Stoletzki (srjedźa), jeje nanom a dr. Jürgenom Wenglerom (naprawo) – wuwiwachu so minjeny pjatk na wotewrjenju wustajeńcy „Serbscy wuměłcy a Serbja we wuměłstwje“ we Łužiskej wuměłstwowej hali w Choćebuzu. Widźeć su serbscy molerjo 20. lětstotka kaž Fryco Latk, Alfred Janigk, Conrad Felixmüller a Jurij Hajna/Georg Heine kaž tež wuměłče a wuměłcy našeho časa Iris Brankačkowa, Hella Stoletzki a Jan Buk. Ale tež wid němskich na serbski žiwjenski swět posrědkuje wosebita wustajeńca hač do 3. septembra.

Foto: SN/Hanka Šěnec