„Herbstwo Serbow a Němcow“
Zastupjerjo mjeńšin wo kulturnym namrěwstwje rěčeli
Zhorjelc (SN/bn). We wobłuku wotewrjenja wosebiteje wustajeńcy Šleskeho muzeja Zhorjelc pod hesłom „Narod a mjeńšina w Europje 19. a 20. lětstotka“ je towarstwo Centruma za kulturu a stawizny minjeny štwórtk diskusijny forum „Mjeńšiny Europu wobohaćeja“ wuhotowało. Přeprošeni běchu zastupjerjej w Němskej připóznatych ludow resp. ludowych skupin kaž tež reprezentanća Němcow w Madźarskej resp. Pólskej. Nadrjadowana tema, kotruž přitomni rozjimachu, bě prašenje, hač, a jeli, kak hodźało so kulturne herbstwo narodnych mjeńšin dale dawać a tak rólu mostytwarca sylnišo zabrać.
Kaleidoskop kulturow ze serbskimaj dypkomaj
Wrócław (SN/bn). „Kalejdoskop kultur“ rěka dwudnjowski festiwal, z kotrymž chce jón zarjadowaca załožba samsneho mjena swojim wustawkam wotpowědnje interkulturny dialog šěrić. Wosebite ćežišćo swjedźenja twori kultura narodnych mjeńšin kaž tež migrantow. Wčera a předwčerawšim wotměchu festiwal mjeztym 12. raz we Wrócławju. Znowa wužiwachu tysacy zajimcow składnosć, hudźbne koncerty, sceniske předstajenja a čitanja po cyłym měsće wopytać, kulinariske speciality woptać a na dźěłarničkach so wobdźělić. Programy wuhotowało je wjace hač dwaceći skupinow resp. solistow, pochadźacych mjez druhim z Běłoruskeje, Grjekskeje, Indiskeje, Armenskeje a Ukrainy.
Lětuša molerska dźěłarnička Spěchowanskeho kruha za serbsku ...
Wo knihach a kniharni (21.06.19)
Znajeće Astrid Lindgren a jeje powědančko „Pippi Langstrumpf“ abo Selmu Lagerlöf? Wona je awtorka stawiznički wo małym Nilsu Holgerssonu a jeho dyrdomdeju z dźiwimi husami. Su wam „Wicki a sylni mužojo“ – wikingojo z pjera Runera Jonssona – znaći?
Wuwučowanska dokumentacija
Budyšin (SN/bn). Maćica Serbska a Towarstwo za staru serbsku ludowu kulturu stej na zhromadnje zarjadowanym informaciskim wječoru dokumentaciju wo awtentiskich serbskich rejach předstajiłoj. Wčera w Budyskim Serbskim domje prezentowany, tuchwilu hišće njetitulowany film je wuslědk wjelelětneho slědźenskeho kaž tež kreatiwneho dźěła předsydy Maćičneje sekcije hudźba Měrka Šołty, bywšeho rejwarja a choreografa Serbskeho ludoweho ansambla Jana Domaški a filmowca Rajnera Nagela. Dohromady dźewjeć zajimcow tworješe fachowy publikum.
Zaměr wšeho: Zajimc sej outfity kupi a je tež nosy
Budyšin (SN/MiR). Jan Lorenc dawa symbolam starych Słowjanow rum na košlach, kotrež je za muži wuwił. Z projektom „mój serbski puć“ doby wón 3. myto wubědźowanja SORBIAN STREET STYLE. Łužiska krajina zdawa so na kolekciji Christiany Dögel a Alexandera Gaertnera špihelować. 2. městno je myto za jeju prezentaciju „KATJA“. Lea Kelm přeswědči z nowymi aspektami při wužiwanju hižo trjebanych materialijow, kotrež je do wulkeje palety drasty zapletła. Projekt „choćebuska“, z kotrymž je wubědźowanje dobyła, dopomina wona na něhdyšu šwalču delnjoserbskeje metropole. Wčera dopołdnja su młodźi designerojo wo myće zhonili. „Šiju tuchwilu wšědnje hač do 18 hodźin na swojich naćiskach. Wšako su wone tema mojeho bachelorskeho dźěła“, praji Jan Lorenc, student na Wysokej šuli za wuměłstwo Burg Giebichenstein w Halle. „Nas je projekt wot wšeho spočatka zahorił“, rjekny wotrjadnik za komunikaciju z předewzaćemi z Ludoweje banki Drježdźany-Budyšin Andreas Wanitzek.
Wćipni na kartu
Wochozy (AP/SN). Park błudźenkow we Wochozach bě cil lětušeho zeńdźenja dźěłoweho kruha Łužiske muzeje a muzealne zarjadnišća sekcije ludowěda/muzejownistwo Maćicy Serbskeje.
Nowa wustajeńca we wopytowarskim centrumje wo serbskich stawiznach Wochožanskeje kónčiny njebě jenička přičina póndźelneho zetkanja. Muzejownicy běchu tež wćipni na nowy projekt towarstwa Serbski kulturny turizm. Wone wuwiwa mjenujcy kartu „Ducy po serbskej Łužicy“, z kotrejž chce „tež za serbske muzeje, rjemjesło a tradicije wabić“, Ines Kunzendorf rozłoži a připowědźi, zo ma karta hišće lětsa wuńć. Přitomni skedźbnichu na wažnosć runohódneho nałožowanja serbšćiny – tež hladajo na słowjanskich susodow, kiž so přiběrajcy za łužisku jězorinu zajimuja –, a zdobom na šansy, kiž z ideje zhromadneho wabjenja wurostuja.
Dołha nóc wědomosćow putała
Drježdźany (mla/SN). 17. króć swjećachu w sakskej stolicy a přisłušnych měšćanskich dźělach minjeny pjatk Dołhu nóc wědomosćow. Wjace hač 650 zarjadowanjow na 17 wědomostnych stacijach je sej tež tójšto Serbow z města a zajimcow z Hornjeje Łužicy wobhladało. Wšako chcychu so wo aktualnych slědźenskich wuslědkach, projektach a kubłanskich poskitkach popularnych wědomosćow Drježdźanskeje Science Community wobhonić.
Wšelake fakulty Techniskeje uniwersity Drježdźany předstajichu na přikład najnowše inowatiwne twarske maćizny, alternatiwne móžnosće zmilinjenja a chemijowu fabriku přichoda. Wosebje dźěćom so při najwšelakorišich pospytach w laborje woči błyšćachu a jich starši so njemało dźiwachu, kak móža sej ze sadu a zeleniny sami bateriju twarić. Fachowcy Fraunhoferskeho instituta rozłožichu eksperiment, zo móžeš tež z wopłóčkow milinu wudobywać.
Chcedźa Łužiski festiwal rozšěrić
Wojerecy (SN/bn). We wobłuku zhromadneho kabinetneho posedźenja Sakskeje a Braniborskeje stej so wobě knježerstwje dźens tydźenja we Wojerecach za to wuprajiłoj, kónc měrca prěni raz wuhotowany Łužiski festiwal (Serbske Nowiny rozprawjachu) jako mjezy a sparty přesahowacy wjeršk etablěrować. Festiwal hodźał so zhromadnje z akterami regiona, kotřiž měli zdobom jeho nošerjo być, dale wuwiwać, rěka w minjeny pjatk wozjewjenej nowinskej zdźělence braniborskeho ministerstwa za wědomosć, slědźenje a kulturu (MWFK) a sakskeho statneho ministerstwa za wědomosć a wuměłstwo (SMWK).
Dobra nalada we wuměłstwowym busu knježiła
Korzym (CS/SN/bn). Budyšin, Koporcy, Lubij, Nowe Jěžercy (Neugersdorf), Nowosólc-Hródk (Neusalza-Spremberg) a Korzym běchu stacije lětušeje čary wuměłstwoweho busa KunstBus.
Hižo šesty raz zwjazachu busy městnosće Hornjeje Łužicy, hdźež móžachu wopytowarjo minjeny kónc tydźenja hudźbu, dźiwadło a tworjace wuměłstwo na zdźěla njewšědnych městnach dožiwić. Tak koncertowaštaj na přikład spěwarka Jasmin Hoppe z Rostocka a Drježdźanski pianist Sebastian Paul na Koporskim hrodźe. Mjez druhim přednjeseštaj wonaj ariju z twórby Wolfganga Amadeusa Mozarta „Mitridate re di Ponto“ a wujimk z operety Freda Raymonda „Módra maska“. Nimo toho poskićeše etablissement wobsedźacy Sebastian Flämig wodźenja po bywšim ryćerskim kuble kaž tež po hrodowym parku. Při busowym zastanišću w Koporcach witaše resp. rozžohnowaše smyčkowy kwartet Lubijskeje hudźbneje šule při- a wotjěducych hosći.
