Publikum w Pólskej zahorili
Brigadnicy so za podpěru dźakuja
Budyšin. Wróćo hladajo na zhromadny swjedźeń sobotu, 1. junija, w Budyskej „Krónje“ składnostnje 75. róčnicy 1. serbskeje kulturneje brigady so brigadnicy wšěm swojim pilnym pomocnikam, kotřiž su k poradźenemu swjedźenjej na najwšelakoriše wašnje přinošowali, wutrobnje dźakuja. Serbskemu ludowemu ansamblej słuša wosebity dźak, nic jenož za dołholětnu podpěru při organizowanju oratorijow, kaž „Wětrnik“ a „Hrodźišćo“. Tež oratorij „Žně“ je so 2023 z orchestrom SLA a z chórom brigady jenož nahrawać móhł z profesionelnej pomocu SLA. CD „Žně“ móža sej zajimcy w Smolerjec kniharni, w Serbskej kulturnej informaciji a druhdźe kupić. Tež na narodninskim programje brigady měješe SLA bytostny podźěl, wšako podpěraše brigadu z chórowymi podestami, techniku, wabjenskim materialom a předawanjom zastupnych lisćikow.
Na 3. fachowu konferencu SŠT
Wjelestronska serbska literatka a publicistka
Ze swjatočnej ceremoniju w Kamjenskej cyrkwi swj. Hany bu Jěwje-Marje Čornakec 17. smažnika Myto Zejlerja 2024 přepodate (Serbske Nowiny rozprawjachu). Wozjewjamy tu skrótšenu lawdaciju dr. Christiany Piniekoweje. Dospołny tekst čitaće nazymu w Rozhledźe.
Biblioteka je jemu „pokładowa křinja“
Budyšin (SN/BŠe). Budyska měšćanska biblioteka a staroměšćanske towarstwo sprjewineho města přeprosychu wčera zajimcow na přednošk Handrija Bjeńša, kiž je nowu knihu zestajał a wudał. Tónkróć je so wón ze stawiznami města zaběrał a w chronice z titulom „Neue Chroniken der Stadt Bautzen – Budyssin“ zjimał.
Budyšan hori so hižo z časa dźěćatstwa za stawizny, něhdźe 25 přitomnych wčera zhoni. Za čas swojeho 40lětneho skutkowanja w Ludowym nakładnistwje Domowina je wón něhdźe 1 000 knižnych titulow wobdźěłał, mjez nimi tež tajke z historiskim pozadkom. Swój zajim za stawizny dale skrući. W lěće 1993 Handrij Bjeńš swoju prěničku w nakładnistwje Lusatia wozjewił. Mnohe dalše knižki a brošurki sćěhowachu. Jako sprjewine město w lěće 2002 tysaclětny jubilej swjećeše, namjetowaše wón wobšěrnu chroniku wudać.
Lětsa Krabat, klětu zmij w srjedźišću
Stróža (SN/MiR). Z wutrobu a rozumom powěsćam připosłuchać, běše wotpohlad prěnjeho Łužiskeho powěsćoweho sympozija. Wjace hač 20 zajimcow je so zašły kónc tydźenja w Stróži zetkało, zo bychu so z Krabatom zaběrali. Na zarjadowanje je Carla Gustava Jungowa towaršnosć Sakska z.t. z podpěru Budyskeje župy „Jan Arnošt Smoler“ přeprosyła. „KRABAT – Zaplećenje a wuwiće“ rěkaše hesło, kotrež wěnowaše so psychologiskemu jadru powěsće. Psychologowka Denise Rudin z Küsnachta w Šwicarskej je wobdźělnikam wobsah zbližiła. „Wědoma zaběra z Krabatom je wosebje serbskim wobdźělnikam cyle nowy wid na bajowu kaž tež realnu postawu posrědkowała“, rjekny županka župy „Jan Arnošt Smoler“ Leńka Thomasowa. „Čitanja, spěwny wječork, molowanje kaž tež hudźbne poskitki, kotrež smy jako župa přihotowali, su wobdźělnicy přewšo nutrnje přijeli, štož běše nam wulki dźak. Tuž so wjeselu, zo budźe klětu dalše tajke zarjadowanje, potom na temu ,zmij‘“.
Sep namjetow a kritika
Serbska mytologija a teorije wo multiwersumje
Budyšin (SN/bn). Fantasy-stawizna „Łójerjo sonow“ Jěwy-Marje Čornakec słuša k rědkim přinoškam tohole žanra w serbskej literaturje. Zdobom spleće starodawnu łužisku mytologiju, načasnu fantastiku a teorije wo „multiwersumje“. „Krabat goes ‚Inception‘“ (hrajny film Christophera Nolana z lěta 2010 – přispomnjenje redakcije) je w tym zwisku dosć jakne zjimanje, kajkež njeznaty komentator online podawa.
Serbski, lěta 2018 w Ludowym nakładnistwje Domowina wušły original je awtorka sama do němčiny přełožiła a loni w nakładnistwje Donatus wudała. Wčera je nowostku z titulom „Im Netz der Schwarzen Mühle“ w Smolerjec kniharni předstajiła. Nažel jenož dźesać zajimcam zakłady tak mjenowanych jasnych sonow (Klarträume) rozłožiwši, kotrež w jednanju centralnu rólu zaběraja, předčita wona po kapitlach wurězki ze stawizny. Mjez jednotliwymi tekstowymi wotrězkami postara so Jan Cyž na klawěrje z improwizacijemi wo hodźace so hudźbne wobrubjenje.
Chutny humor połny fantazije
Wosebita wustajeńca portretuje wuměłca Otta Sandera Tischbeina
„OST w Kamjencu – Ćišćane a molerstwo na papjerje a płatnje“ rěka nowa wustajeńca w Słodownicy w Kamjencu, kotruž wuhotowa tamniši Lessingowy muzej zhromadnje z Centrumom za recepciju Lessinga na česć 75. narodnin grafikarja a molerja Otta Sandera Tischbeina. Otto Sander, kiž narodźi so 1949, potajkim w lěće załoženja wobeju němskeju statow, je we wšitkich wjetšich wustajeńcach Němskeje demokratiskeje republiki a dźensa po cyłej Němskej zastupjeny. Jeho duchapołne wobrazy, kotrež noša wosebity akronym – OST –, su połne fantazije kaž tež humora a přiwšěm chutne rozestajenja ze žiwjenskej realitu. Znaći, kiž jeho lěćne dźěłarnički wopytuja, tole tež wo jeho wosobinje powědaja. Tak stupi so wón na přikład na wotewrjenju wustajeńcy w Kamjencu w swojim molerskim kitlu a kłobuku na hečku a deklarowaše powitanski tekst z papjerjaneje rólki, ju pomału rozwiwajo.
