Zhusćeny portret serbskeje Židowki
Dóńt Hany Šěrcec bě spisowaćelej Jurjej Kochej z předłohu jeho literarneho debita. Něhdźe 50 lět po prěnim wozjewjenju nowele je so znowa stawiznje „serbskeje Židowki“ wěnował.
Słowjanske hrodźišćo bórze z nowej wobhospodarku
Wětošow/Brüssel (SN/at). Załožba Slavonic Europe z Brüssela přewozmje wobhospodarjenje Słowjanskeho hrodźišća w Radušu. To wuchadźa z nowinskeje zdźělenki załožby. Informaciju je našej nowinje Bengt Kanzler, měšćanosta Wětošowa, wobkrućił. Štwórtk, 15. awgusta, chcetaj wón a David Chmelík wužiwanske a najenske zrěčenje we Wětošowje podpisać.
Hišće na posedźenju Wětošowskeje zhromadźizny měšćanskich wotpósłancow kónc meje rěkaše, zo su dalše rozmołwy trěbne. Komuna pak steješe pod ćišćom, wšako by jeje podpěra financnych přičin dla kónc lěta wuběžała. Nimo toho chcyše David Chmelík angažement załožby Slavonic Europe w lěću zahajić, kaž je wón to Serbskim Nowinam dźensa wobkrućił.
Wo knihach a kniharni (09.08.24)
Juchej abo owjej? Nowe šulske lěto je zahajene. Wjele nowačkow je so do noweho žiwjenskeho wotrězka podało. Su hordźi, zo smědźa skónčnje wuknyć. Čitać, ličić a pisać kaž tež nowych přećelow zeznać. A hdźe móžeš lěpje swojich nowych towaršow zhromadźić hač w knižce „Moji přećeljo“, za kreatiwnych je to „Poezijowy album“. Do tutych móža so zajimy, přeća do přichoda, nalěpki, ale tež rysowanki zwěčnjować. W Ludowym nakładnistwje Domowiny je zdobom nowa kniha za BOOKii-pisak wušła z titulom „Wotkryj sej swětnišćo“. W tutej móžeš sej wjele wo planetach a swětnišću načitać kaž tež wo žiwjenju astronawtow. Předstajenje tuteje knihi běše w meji w Budyskej hwězdarni, w kotrejž su wšitcy tež hnydom přez teleskop hladali a w planetariju pohib planetow, słónca a měsačka dožiwili. Kreatiwnosć su dźěći pokazali za blidom eksperiMINT kampusa Radwor. Tam su planety paslili abo z małymi roboterami a tabletami nazhonjenja z techniku hromadźili. To běše zajimawe popołdnjo za wšěch wopytowarjow, za młódšich runje tak kaž za staršich.
Wón wostanje w dobrym pomjatku
Sobotu, 10. awgusta, zawěsće mnozy přiwuzni, přećeljo, bywši kolegojo a čitarjo knihow, kotrež bě jeho nakładnistwo Lusatia wudało, na njeho mysla – na dr. Franka Stübnera. Wón by zajutřišim swoje sydomdźesaćiny swjećił, njeby-li serbski nakładnik, pilny awtor, žortniwy składnostny dźiwadźelnik, kulturny politikar a wjelelětny radźićel Budyskeho wokrjesneho sejmika bohužel zahe a nahle 7. apryla 2017 zemrěł. Na Budyskim Mikławšku je swój posledni wotpočink namakał.
Jeho njewočakowana smjerć bě wšěm tragiska, dokelž je wón do toho hišće jara aktiwnje z interviewami a nastawkami slěborny jubilej swojeho jara produktiwneho nakładnistwa za 1. apryl 2017 přihotował. 246 edicijow je wón lektorizował a wudał. Na jubilejnym dnju pak ležeše hižo w chorowni.
Uniwerselna rěč hudźby na dobro dźěći w Ukrainje
Budyšin (SN/bn). Pod hesłom „Harmonije, kotrež zwjazuja“ zahaji so spočatk septembra lětuša Budyska chórowa akademija generacijow. Zaměr projekta je, „za čas, w kotrymž je generacije přesahowacy dialog wažniši hač hdy prjedy, ludźi kóždeježkuli staroby z uniwerselnej rěču hudźby zjednoćić. Hudźba je kmana, diferency přemosćić a mjezsobnemu zrozumjenju polěkować,“ kaž we wopisowanju Budyskeho serwisoweho kluba Rotary, kotryž je z nošerjom akademije, rěka. Na wobdźělnikow „čaka intensiwny čas hudźbneho dalekubłanja a zhromadneho dožiwjenja“. Po dohromady dwanaće probach změja składnosć, wuslědki we wobłuku beneficneho koncerta na dobro dźěsćownje-syrotownje w Lwiwje předstajić. Kursistam poboku zahudźi renoměrowany organist Johannes Krahl a zaspěwa znata solo-sopranistka Romy Petrick.
Lokalny kolorit a europska folklora
Nadal požadana přehladka
Wětošow (ChP/SN). Wustajeńca „30 lět Towarstwo za spěchowanje serbskeje rěče w cyrkwi“ je tuchwilu z hosćom we Wětošowskej Serbskej cyrkwi. Dwurěčna přehladka z wobrazami a historiskimi informacijemi wo skutkowanju zjednoćenstwa so tam na krótkodobne naprašowanje Spěchowanskeho towarstwa za Serbsko-němsku dwójnu cyrkej pokazuje. Wustajeńca po koncepciji Christiany Piniekoweje wotewri so 11. awgusta w přitomnosći předsydow towarstwow Hartmuta Leipnera a Hartmuta Botta.
Ekspoziciju spěchuja mjez druhim Załožba za serbski lud, Choćebuska Serbska kulturna informacija Lodka kaž tež Ewangelska cyrkej Berlin-Braniborska (EKBO). Město Wětošow a Serbski muzej w Choćebuzu ju tohorunja podpěratej. Na Dnju wotewrjeneho pomnika, kiž płaći jako najwjetše kulturne zarjadowanje Němskeje, wotměja so 8. septembra we Wětošowskej cyrkwi serbsko-němske kemše, lětsa z fararjom Tobiasom Pawołom Jachmannom, kiž je tež na Serbskim cyrkwinskim dnju w Gołkojcach prědował. Z tamnišeje wosady je mjeztym dalše naprašowanje za wustajeńcu dóšło.
Satira a humor njenaparatej škodu
Wšitke fasety elektroniskeje hudźby, spokenword, mytologija a ...
Miłoćicy (SN/bn). Towarstwo Meta Solis je mjeztym šesty raz po nim pomjenowany festiwal pod hołym njebjom při Miłočanskej skale wuhotowało. Dohromady něhdźe 300 wopytowarjow je minjeny kónc tydźenja k hudźbje cyłkownje 17 DJow a skupinow rejowało, so na dźěłarničkach a wodźenjach wobdźěliło kaž tež přednoškam připosłuchało.
Zazběh tworješe performance kolektiwa (L)Ost Poetas. Jessy James LaFleur, Sam Ziemeck, Jonas Pjetaš, Tabea Wels, Alina Stark a prěni raz zjawnje wustupowaca Klara Bjedrichec wobswětlichu ze swojimi po wašnju spokenword předstajenymi tekstami předewšěm prašenja kołowokoło domizny a identity. Hudźbny dźěl zahaji Kamjeničanska band Baumarkt z electro punkom. Po njej postarachu so DJjojo djnl83, Flexible Heart (wobaj z Drježdźan) a knytl (Wotrow) z technom, IDM a drum ‘n‘ bass wo pohib w publikumje. We wobłuku prěnjeho workshopa pokaza Franciska Bulankec na zwiski mjez starosłowjanskej mytologiju a křesćanstwom.
Wuměłstwowy bus lětsa na sewjeru
Projekt „Wuměłstwowy bus“ spřistupnja mjeztym dźesać lět kulturu jěducy po Hornjej Łužicy. Lětsa wopřijima čara prěni raz stacije na sewjeru regiona; serbski podźěl programa je porno minjenym lětam jasnje rozrostł.
Zhorjelc (SN/bn). Dohromady tři linije pojědu lětsa w hodźinskim rytmusu po třiróžku Slepo – Mužakow – Běła Woda. Přidatnje poskićuja tak mjenowany shuttle z Budyšina přez Wulku Dubrawu, Delni Wujězd a Hamor do Běłeje Wody.
Na zwučene wašnje prezentuje cyłkownje wosom wuměłcow resp. cyłkow swoje programy w jězdźidłach. Mjez druhim chce Duwo Hejduška sep serbskich, němskich a jendźelskich spěwow w šaće rocka, popa a jazza předstajić, duwo Konjen melanžu stilow tango, bossa nova a jazz zahrać a z bywšich čłonow Křižneho chóra zestajany wokalny ansambl VIP sadźby hitow zabawneje hudźby a cappella zaspěwać. Nimo toho wustupuja wospjet wjacori šulerjo Budyskeje wokrjesneje hudźbneje šule.
