Budyšin (SN/bn). Prěnju premjeru hrajneje doby 2024/2025, mjenujcy předstajenje musicala „The Addams Family“, ma Němsko-Serbskeho ludowe dźiwadło hižo za sobu, dalšich 22 ma slědować. Na wčerawšej nowinarskej rozmołwje připowědźichu intendant domu Lutz Hillman, dramaturgowka Eveline Günther, wyši hrajny nawoda Stefan Wolfram, nawoda klankoweje sparty Tim Heilmann a nowa dramaturgowka za serbske dźiwadło Hanka Jenčec wotměnjawy program za kóždyžkuli słód. Mjez nowymi inscenacijemi su na přikład klasikar „Tod eines Handlungsreisenden“ Arthura Millera a „biographical“ z pjera Wolframa pod hesłom „Kafka – Und daß Du mir das Liebste bist“. Heilmann wuzběhny předewšěm farsu „Mein Kampf“ Georgea Taborija, do kotrejež je „cyły ansambl klankarjow zapřijaty“, a dramu „Schlafes Bruder“ po romanje Roberta Schneidera, kotruž wuhotuja w kooperaciji z Berlinskej Wysokej šulu za dźiwadło Ernst Busch jako „hru z čłowjekami, objektami a pišćelemi“.

Budyšin (SN/bn). „Bězi woda, běži“, je hesło hrajneje doby 2024/2025 Serbskeho ludoweho ansambla. Kaž intendant domu Tomas Kreibich-Nawka na wčerawšej nowinskej rozmołwje rjekny, wotbłyšćuje moto „konkretne temowe ćežišćo hrajneho plana“, symbolizuje pak zdobom „wobstajny proces změny“. Jako prěnju z dohromady šěsć premjerow připowědźi wón inscenaciju „Powědanja wo wodźe“ po knižce Jurja Brězana, kotraž „je mjez Serbami skerje njeznata“. Prěni raz chcedźa ju kónc septembra pokazać, w oktobrje slěduja dalšej předstajeni w Budyšinje a delnjoserbska wersija w Choćebuzu. Předewšěm na dźěći měrja so nazymu z produkciju „Abrafaxy a Čorny młyn“. „Prašenje za serbskej identitu“ rozjimaja do hód z baletom „Smy!“, dalše wjerški su klětuši, „tónraz zaso trochu tradicionelniši“ wječorny ptačokwasny program, ptačokwasny musical za dźěći a přichodna „Błośańska noc powěsćow“. Smochčanski hudźbny swjedźeń wuhotuja „folklorneho festiwala Łužica dla“ klětu hakle w awgusće.