Jězby po Łužicy
Čitanski dyrdomdej na wěžach
„Konsum“ w kulturnej informaciji
Komediantiske šerjenja pod hołym njebjom na Budyskim Hrodźe
Budyšin (SN/bn). Tradicionelnje z wutřělemi pistolow resp. kanonki su intendant Němsko-Serbskeho ludoweho dźiwadła Lutz Hillmann, Budyski wyši měšćanosta Karsten Vogt a krajny rada wokrjesa Budyšin Udo Wićaz (wobaj CDU) wčera 28. Budyske lěćne dźiwadło na Budyskim Hrodźe zahajili. Premjera inscenacije „Spuk unterm Riesenrad – Jetzt ist Bautzen dran“ bě wupředata, nimale tysac přihladowarjow mytowachu wukon na jewišću a za nim skutkowacych z dołho trajacym přikleskom. Po předstajenju dźakowaše so Hillmann swojemu mustwu, wuzběhnywši předewšěm wuhotowarja jewišća Mirosława Nowotneho a rjemjeslnikow, kotřiž jeho „naročne, často překwapjace a hdys a hdys bjezmała kołwrótne ideje zwoprawdźeja“. Jako režiser spektakla pod hołym njebjom wón zjima: „Wuspěšna premjera njeby móžna była, njesměł z absolutnymi profijemi hromadźe dźěłać, na kotrychž móžu so w kóždejžkuli situaciji spušćeć. Za to dźakuju so z cyłeje wutroby.
Johannes Gerstengarbe (nalěwo) je wčera druhi tydźeń lětušeje ...
Wulki finale a potom – snano – kónc
Minjene póndźele wotmě so we wobłuku akcije „Happy monday – wjesoła póndźela“ dohromady wosom zarjadowanjow mjez druhim z koncertami, rejemi a přednoškami na wjacorych naměstach Budyšina. „Wulki finale“ wuhotuja organizowace něhdźe 50 towarstwow a iniciatiwow w „trochu rozšěrjenym formaće“.
Budyšin (SN/bn). Na Hłownym torhošću sprjewineho města předstaja přichodnu póndźelu dohromady tři skupiny „pisany program, wopřijimacy indie pop, beat, rock a serbski brass“. Po medijowej zdźělence organizatorow zahraja Šwintuchi – „młodźi hudźbnicy z Chrósćic a wokolnych wsow“ – serbske ludowe spěwy w „dospołnje nowym zwukowym šaće“. Band Die Baumschule, wurostła z dorostoweho spěchowanja towarstwa Kamjentny dom, chce publikum mjez druhim ze swojim hitom „In Bautzen wird die Mate knapp“ zahorić. Prěni raz prezentuje skupina Zynkofunk zwonka lětušeje inscenacije Němsko-Serbskeho ludoweho dźiwadła „Na tamnym boku měsačka – Hercy“ swoje adapcije w 1960ych lětach nastatych spěwow „prěnjeje serbskeje beatoweje skupiny Hercy“.
Wjedźe Nowy Casnik do přichoda
Njech so ludźo w přichodźe tak za rěč zajimuja kaž tuchwilu za drastu – to přeje sej Katalin Porackojc. 41lětna je wot najnowšeho takrjec oficielnje nowa šefredaktorka Noweho Casnika, funkciju je hižo wot lońšeho komisarisce wukonjała. Zo by so intensiwnišo lubowanej delnjoserbšćinje wěnowała, běše dźowce Martiny Golašojc najsylniši motiw, do redakcije NC zastupić. Žurnalistisce je runja maćeri hižo wjacore lěta za serbski program RBB dźěłała. Běžnje serbowała je pak hakle jako sobudźěłaćerka w běrowje Domowiny w Choćebuzu, čehoždla je tehdomnišemu zastupowacemu jednaćelej třěšneho zwjazka Haraldej Kóńcakej dźakowna, zo wón ze wšěmi konsekwentnje serbowaše.
Kocor kaž torero
Zhromadne spěwanje – přikład zhromadneho žiwjenja
Budyšin (SN/MiP). „Na wulki zjězd chórow“ běchu organizatorojo rjadu póndźelnišich zarjadowanjow „Happy Monday – wjesoła póndźela“ zajimowanych na wčerawše wudaće prosyli. Hačrunjež pochmurjene wjedro a temperatura ze 16 stopjenkami přewšo přićahliwej njebyłoj – něhdźe 300 ludźi běše najebać to na wosme, předposlednje zarjadowanje na Žitne wiki přichwatało.
„Chceš-li zhromadnje spěwać, dyrbiš druheho słyšeć a wědomje wobkedźbować, zo by spěw derje zaklinčał. Kajki to překrasny přikład za zhromadne žiwjenje w našim měsće, w našej towaršnosći“. Z tymle słowami powita Christian Tiede, farar Budyskeje ewangelskeje wosady swj. Pětra, zajimcow a přeprosy jich na zhromadne spěwanje z chórami. Za to běše spěwanska brošurka wupołožena abo digitalnje z pomocu z QR-koda na šmóratku přistupna. W serbskej rěči postrowi publikum w mjenje Rěčneho centruma WITAJ (RCW) kaž tež Domowiny Beata Brězanowa, wjednica RCW.
