Budyšin (CRM/SN). Nachilace so lětuše Budyske pišćelowe lěćo w cyrkwi swj. Pětra je dale zajimawe a překwapjace. Program koncerta minjenu srjedu so ­jako „highlight“ připowědźi. Prof. Martin Strohsäcker, skutkowacy nimale 30 lět na Wysokej šuli za cyrkwinsku hudźbu w Drježdźanach, předstaješe z orchestrom Serbskeho ludoweho ansambla pod nawodom cyrkwinskohudźbneho direktora Michaela Vettera dwě mo­dernej twórbje wulkeje hudźbneje formy, štož wopokaza so jako něšto njewšědneho.

Budyšin (SN/bn). Pod hesłom „Najdlěši tydźeń lěća“ wuhotuje towarstwo Dźěłań dźeń kóždu druhu sobotu kulturne zarjadowanje w swojej „dobrej jstwě“ na Sukelnskej w Budyšinje. Před třomi dnjemi dožiwi něhdźe 30 zajimcow njewšědnu kombinaciju dwójneho koncerta a wernisaže wustajeńcy.

Gitarist Farid Ben Miles předstaji so jako „Francoza z algeriskimi korjenjemi“. Dźěl swojich instrumentalnje předstajenych, polyrytmiskich spěwow je „měšeńca wobeju kulturow“, štož wotbłyšćuje so w titulach kaž na přikład „Traditions“ abo „Tradivan“. Nimo toho zahra wirtuoznje adapcije mjezynarodnych hitow mjez druhim Manuwa Chaowa a Johnnyja Nasha.

Smochćicy (SN/bn). We wobłuku rjadu Smochčanske jewišćo su wčera skupina Trio & kumple a spěwarka Helena Hejduškec beneficny koncert w kubłanišću swj. Bena wuhotowali. Připowědźi Symana Hejduški (bijadło, klawěr, druhi hłós) wotpowědujo předstajichu „sep spěwow z pjera Hejduškec a wubrane titule serbskich komponistow kaž tež někotružkuli jendźelsku štučku“. Mjenowanymaj hudźbnikomaj poboku běštaj pianist Jan Brězan a Klemens Mark na basgitarje. Mjez druhim zahrachu w měnjacej so zestawje swingowu wersiju hita „Kak dyrbju dale hić“, adapciju „noweje interpretacije stareho ludoweho spěwa“ band Jankahanka „Pod Kulowm we holi“ a „Do pedalow stupamoj“ Měrćina Weclicha. Mjezynarodny dźěl programa wopřijimaše na přikład znaty spěw „Lemon tree“ skupiny Fool‘s Garden a zhromadnje z publikumom zanjeseny klasikar „Hey Jude“ kwarteta The Beatles.