Wuzwolene twórby lawreatow
Anna Kaleri :
„Der Himmel ist ein Fluss. Roman.“ Graf Verlag, 2012
„Hochleben. Roman.“ Mitteldeutscher Verlag, 2006
„Es gibt diesen Mann. Prosaminiaturen.“ Luchterhand Literaturverlag, 2003
Thomas Freyer (kruchi):
„kein land. August“. Prapremjera bě 20. januara 2017 w Statnym dźiwadle Drježdźany.
„mein deutsches deutsches Land“ (2014)
„Separatisten“ (2007)
„Amoklauf mein Kinderspiel“
(2006 )
Kurt Drawert:
„Der Körper meiner Zeit. Gedicht“. Verlag C. H. Beck, 2016
„Was gewesen sein wird. Essays 2004 bis 2014“. Verlag C. H. Beck, 2015
„Spiegelland. Roman, Prosa, Material“, Luxbooks-Verlag 2015
„Ich hielt meinen Schatten für einen anderen und grüßte. Roman“, Verlag C. H. Beck 2008
Prěni raz Myto Ericha Loesta
„Swět so dźiwnje zaćěmnił“
Wot lěta 1993 wuznamjenja Swobodny stat Sakska wosobiny, čejež twórby steja w duchownej tradiciji rozswětlerja Gottholda Ephraima Lessinga. Sobotu je statny sekretar Uwe Gaul w Kamjenskej radnicy z 13 000 eurami dotěrowane Lessingowe myto spisowaćelej Kurtej Drawertej přepodał. Spěchowanskej myće w hódnoće dohromady 11 000 eurow spožčichu awtoromaj Thomasej Freyerej a Annje Kaleri.
Kamjenc (SN/CoR). „Bych-li nětko naličił, kotrych kolektiwnych złóstnistwow, politiskich wupadow, hospodarskich njeskutkow abo socialnych psychozow dla bych nablaku ... wobłudnić dyrbjał, bychmy hišće hač do přichodneho spožčenja Lessingoweho myta tule sedźeli. Skrótka tuž: Swět je so dźiwnje zaćěmnił, hačrunjež zda so swětliši być dyžli hdy prjedy.“ Z krótkej, runje tak jadriwej kaž intelektualnej naročnej analyzu je lawreat Kurt Drawert k tomu namołwił, sej rozswětlerstwo a jeho ideale humaneje towaršnosće dale wuwědomjeć. „Tamna strona krasnosće je nas docpěła – kontingenca, kotraž so z kromy zbliža, tež w formje ćěkancow tohole swěta“, zwěsći dźensa w Darmstadće bydlacy awtor.
Skupina Warnoćicy
Wjele zajima za staru techniku
Smjerć Židow planowali
Płaća w SLA zaso po tarifje
Budyšinje (SN/CoR). Čas domoweho tarifa je w Serbskim ludowym ansamblu po zdaću najprjedy nimo. „Kaž je nam Załožba za serbski lud nětko zdźěliła, njejsu přichodnje žane nowe jednanja wo domowym tarifje předwidźane. Móžemy nětko po normalnym modusu dale dźěłać, a to nadźijomnje hač do lěta 2020“, praji jednaćelka SLA Diana Wagnerec našemu wječornikej. Hač do 2020 płaći za Załožbu za serbski lud třeće financne zrěčenje ze Zwjazkom, Braniborskej a Sakskej. „Nichtó wězo njewě, hač abo kotre tarifowe zwyšenja budu, wěstota je tuž jenož nachwilna“, doda Diana Wagnerec. Loni 31. julija je lěta 2014 wobzamknjeny domowy tarif za ansamblowcow wuběžał. Tehdy běchu so dźěłarnistwa po ćežkich jednanjach z wjednistwom SLA a Załožbu za serbski lud na zniženje mzdow ansamblowcam wo 6,5 procentow dojednali.
SLA ma tuchwilu 89,75 dźěłowych městnow, z toho je 23 za hudźbnikow, 17 za spěwarjow a dwanaće za rejwarjow. K tomu přińć matej elewowej połojčnej městnje za chór a dalšej połměstnje za balet.
Nowa serbska hudźba k nowemu lětu zaklinčała
Po wutornej Berlinskej premjerje přeprosy pianistka Heidemarja Wiesnerec wčera do Choćebuskeho Serbskeho domu na wosebity koncert k nowemu lětu. Nimo nowych twórbow serbskich komponistow zaklinča tež hudźba staromištrow Johanna Sebastiana Bacha, Ludwiga van Beethovena, Sergeja Prokofjewa, Fryderyka Chopina a Felixa Mendelssohna Bartholdyja.
Choćebuz (UL/SN). Moderator, recitator a knižny awtor Detlef Seydel prócowaše so wječorej čerwjenu nitku spožčić, připowědźejo twórby hudźbnych stawiznow a (serbskeje) awantgardy. Přispomnić so ma, zo hodźa so nowe twórby lědma awantgardistiske mjenować. Prapremjery Jana Cyža, Ulricha Pogody, Hinca Roja, Detlefa Kobjele a Sebastiana Elikowskeho-Winklera – nadawki to za tónle koncert k citatam a choralam Martina Luthera – stejachu w poradźenym kontrasće k hudźbje minjenych pjeć lětstotkow. Teksty Berlinjana dr. Petera Jarchowa wo serbskich komponistach a jich twórbach na programowym łopješku njejsu publikumej bohužel pomhali, emocije a mysle w twórbach dodnić a wotpowědne zwiski začuwać.
Luther w špihelu Lessinga
Ze spožčenjom Lessingoweho myta Swobodneho stata Sakskeje 2017 zahaja přichodnu sobotu 51. Kamjenske Lessingowe dny. Pod hesłom „Luther a Lessing – 500 lět reformacija“ poskića zajimcam wot 21. januara do 3. měrca dohromady pjatnaće wšelakich zarjadowanjow.
Kamjenc (SN/CoR). Wosobinsce zeznać móže zjawnosć lětušich lawreatow Lessingoweho myta – spisowaćelow Kurta Drawerta (hłowne myto), Annu Kaleri a Thomasa Freyera (spěchowanskej myće) – na tak mjenowanym narodninskim swjedźenju Lessinga njedźelu, 22. januara, dopołdnja w Kamjenskim měšćanskim dźiwadle. Hačrunjež njebudźe rozhłosowy sćelak MDR-Kultur mjeztym tradicionalnu rozmołwu z Michaelom Hametnerom live wusyłać, su znateho kulturnika přiwšěm za zarjadowanje zdobyć móhli.
