Prěni raz schadźowachu so wčera zastupjerjo šěsć němskich dźiwadłow w Budyskim NSLDź, zo bychu festiwal „Witajće druhdźe III – hrajo so zetkawać“ přihotowali. Wot 4. do 7. meje chcedźa w Budyšinje předstajić dźiwadłowe hry z ćěkancami a domoródnymi dźěćimi a młodostnymi. Studenća z Lipšćanskeho uniwersitneho instituta Centre of competence for theatre projekt přewodźeja. Foto: SN/Maćij Bulank

Budyšin (SK/SN). Wjele přitomnych, předewšěm młodych ludźi, spožči předstajenju knihi wo bojach zachowanja španiskeje republiki před wosom lětdźesatkami wosebity raz. Tema wječora minjeny pjatk w Budyskej měšćanskej bibliotece, róla žonow w španiskej byrgarskej wójnje, njeje jenož w sprjewinym měsće lědma wobjednana tema, žněješe pak wjele zajima. Wšako wosebje młoda generacija mało wo te­hdyšim času wě.

Karla Popp a Anita Kochnowski, dźowce interbrigadistow-zakitowarjow demokratije w Španiskej přećiwo pučistam Franca, podaštej přehlad wo podawkach, mjeztym zo serbski historikar Hajko Kozel wo situaciji žonow w Němskej wot 1918- do 1930tych lět porěča, podawajo historiski kontekst prašenja runoprawosće žonow. Anita Kochnowski, wudawaćelka wobšěrneje biografiskeje dokumentacije „Žony a španiska wójna 1936–1939,“ wuzběhny, zo so z nětko wušłej knihu prěni króć na mnohe njeznate žony spomina,­ kotrež wojowachu w Španiskej a zwonka kraja za republiku. Z doku­mentaciju je jim wona pomnik stajiła. Kniha wopřijima nimale 700 stron.

Jurij Dźisławk z Haslowa dlěje hač 22 lět Serbske Nowiny roznošował

Wot septembra 1994 hač do decembra 2016 je Jurij Dźisławk w Haslowje, Wutołčicach a Sulšecach Serbske Nowiny roznošował. Tak je jedyn z tych, kotřiž su najdlěje swěrnje naš wječornik ludźom dodawali. Přez cyłe lěta bě jemu to wutrobna naležnosć. Chorosće dla pak dyrbješe nadawk złožić a jón druhemu přewostajić.

„Jónu je načasu a nětko bě tak daloko.“ Dlěje hač 22 lět je Haslowčan Jurij Dźisławk tydźeń wob tydźeń wot póndźele do pjatka Serbske Nowiny roznošował. Kónc tydźenja bě to hišće Předźenak a měsačnje kulturny časopis Rozhlad. „Štó drje by hewak nadawk činić dyrbjał, hdyž nic čitarjo wječornika a Serbja.“ Spočatnje bě hišće wjac zajimcow w Has­lowje, Sulšecach a Wutołčicach Serbske Nowiny abonowało. „Jich pak je dale a mjenje. Młodźi ludźo hižo telko nowinu nječitaja, maja dźě internet, hdźež najnowše nowinki SN hižo zahe popoł­dnju nańdu“, wón wuswětla.

Loni Wojerecy, lětsa Budyšin a w lěće 2020 Lubij: Łužiske města su Sakskej hudźbnej radźe kruta adresa, dźe-li wo naročne přewjedźenje krajneho finala we wubědźowanju „Młodźina hudźi“. Kaž jednaćel rady­ Torsten Tannenberg dźensa na nowinarskej rozmołwje rjekny, běchu přewodźacy starši loni wot Wojerowskeho stareho města jara překwapjeni. To je Zusowe město zawěsće rady přiwzało. A Tannenberg tež lětsa z toho wuchadźa, zo budu mjez přewodnikami někotři prěni raz w Budyšinje. Woni maja składnosć zeznać město, kaž je z mnohich medijowych rozprawow minjeneho lěta njeznaja. A to je wězo wyši měšćanosta Alexander Ahrens (SPD) rady słyšał. Zarjadowarjo su sej přezjedni, zo je tež zwonka wulkoměstow kaž Drježdźan abo Lipska šansa data, zo stanje so krajne wurisanje najlěpšich młodych hercow a spěwarjow z wosebitym kulturnym wjerškom. Axel Arlt