Zapósłane (02.06.21)
Jurij Nuk z Budyšina wěnuje so stawiznam a wuznamej jutřišeho swjedźenja Božeho ćěła:
We wobłuku swjatych dnjow w běhu lěta je swjedźeń Božeho ćěła jedyn z najwjetšich wjerškow katolskeho cyrkwinskeho lěta. Swjedźeń je stajnje druhi štwórtk po swjatkach. Dokelž so přiroda w tym času w swojim najrjeńšim šaće pokazuje, hdyž so wšitko zeleni a kćěje, je to zdobom prawy nalětni swjedźeń.
Wuchadźišćo Božeho ćěła saha hač do hłubokeho srjedźowěka. Awgustinska mniška Juliana – wona běše žiwa w prěnjej połojcy 13. lětstotka w dźensnišej Belgiskej – měješe wizije, kotrež so často na sakrament wołtarja poćahowachu. Na zakładźe toho je arcydiakon města Lütticha Jacques Pantaléon w swojim zamołwitym dźělu diecezy zawjedł swjedźeń k česći sakramenta wołtarja. Pantaléon je jako bamž tutón swjedźeń lěta 1264 postajił jako powšitkowny cyrkwinski swjaty dźeń, a tohodla jón katolikojo dźensa hišće wosebje swjeća.
Młodostni a šćěpjenje
Přećiwo koronje šćěpić dać je tema, kotraž tuchwilu ludźi po cyłym swěće zaběra. A nimale kóždy ma k tomu swoje měnjenje. Što pak serbscy młodostni k šćěpjenju praja? Bychu so woni šćěpić dali? Za tym je so Hana Šmitec někotrych z nich prašała.
Melinda Cyžec z Chrósćic: Měnju, zo dyrbi kóždy sam rozsudźić, hač so šćěpić da abo nic. Njemóžu cyle wěsće rjec, hač sym za to abo přećiwo tomu. Njebych pak chcyła, zo smy winowaći so šćěpić dać. Wšako tuchwilu hišće njewěmy, hač změje šćěpjenje na přikład za dźesać lět někajke sćěhi na strowotu čłowjeka. Tež hdyž bych móžnosć měła so šćěpić dać, njebych to chcyła. Přetož sym hižo koronu měła a mam antićělesa. Chcu rady hišće dočakać a najprjedy wědźeć, kak so tónle srědk na ćěło a čuwowy system wuskutkuje.
Zapósłane (28.05.21)
Bjarnat Cyž z Noweje Jaseńcy wupraja so k „zapósłanemu“ Měrćina Krawca, wozjewjenemu w SN 18. meje:
Knjez Krawc reaguje na přinošk Marje Michałkoweje z 11. meje w SN a wumjetuje jej za-nós-wodźenje čitarjow w naležnosći zastupnistwa zajimow Serbow w formje towarstwa. Wón nawjazuje na diskusiju w lětomaj 2010/2011 a wumjetuje zastupjerjam krajneju knježerstwow Sakskeje a Braniborskeje kaž tež zwjazkowemu knježerstwu, zo su rozsud wo formje zastupnistwa zajimow Serbow „jeničce gremijam Domowiny přewostajili a zo su jeje posudk jako rozsud akceptowali“, a mjenuje to „kardinalny zmylk“. Wšako je Domowina w tej naležnosći „zajata“.
Čitajo tele zwěsćenje a dalše wuwjedźenja k modelej zjawnoprawniskeje korporacije so prašam, z kajkeho kraja knjez Krawc poprawom přińdźe? Wón je přewrótowy čas a wospjetnu diskusiju k temje prawdźepodobnje zaspał, ignorujo fakty a zakonje, kotrež tež za njeho w Němskej płaća.
Njepřećel Wałdy njeje Statnik, ale demokratija
Předsyda Domowiny Dawid Statnik wupraja w diskusiji swoje mysle aktualnu debatu wo Serbskim sejmje nastupajo
Z wosobinskim stejišćom sym jako předsyda Domowiny na čitarski list dr. Měrćina Wałdy w Serbskich Nowinach 12. meje reagował. Wałda běše mi w swojim nastawku „Kak sej Serbja swoje połoženje rjane barbja“, wozjewjenym w SN 5. meje wumjetował: „Předsyda Domowiny je wjackróć wospjetował, a podobnje bu wón tež w tydźeniku Die Zeit citowany: ,Dass unsere Sprache ausstirbt, ist Fakt.‘“ W swojim znapřećiwjenju ze 7. meje na to skedźbnich, zo sym so za tónle zmylk jako nowy młody předsyda w interviewje z Die Zeit, wozjewjenym 25. awgusta 2011, zjawnje zamołwił a zo njejsym wuprajenje ženje wospjetował. Na to reaguje Wałda mjez druhim z nowymaj twjerdźenjomaj: Tak móhła wosoba, „kotraž nochce mjenowana być“, a móhło „njeoficialne zetkanje předsydy Domowiny z prof. Klawsom Thielmannom a ze mnu w Chasowje“ pozdatnje dopokazać, zo tola něšto na tym je, štož je Wałda w swojim nastawku twjerdźił.
Zapósłane (27.05.21)
Marja Michałkowa z Lichanja reaguje na list Měrćina Krawca, wozjewjeny w Serbskich Nowinach z 18. meje:
Knjez Krawc twjerdźi w mjenowanym dopisu, zo jako bywša politikarka serbsku zjawnosć „za nós wodźu“. To je sylny tobak!
Zapósłane (20.05.21)
Měrko Šołta z Budyšina so słowa jima:
W póndźelnej rozprawje Serbskich Nowin wo wustajeńcy Augusta Bergta (str. 1) nałoži so za městnosć pomjenowanje „tachantska“ cyrkej runje tak kaž, zo bě Bergt „tachantski“ organist. Wobaj razaj je to wopak. Jako „tachantsku“ mjenujemy jenož katolski dźěl cyrkwje. Bergt njebě tež katolski organist, ale přistajeny ewangelskeje němskeje měšćanskeje wosady swj. Pětra. Wustajeńcu namakaš w cyrkwi swj. Pětra, potajkim ewangelskim dźělu. A kónčnje njebě Bergt ženje kantor, kaž so na spočatku přinoška twjerdźi.
Zasadna změna politiki trěbna
Zwjazk 90/Zeleni „tuchwilu na žołmje jěchaja“, kaž w młodźinskej rěči rěka. W naprašowanjach k wólbam zwjazkoweho sejma 26. septembra žněja woni tójšto přihłosowanja. Zdźěla leža samo před etablěrowanymi dalšimi stronami. Smy so tuž mjez Serbami naprašowali, hač móhli so z knježerstwom ze „zelenej“ kanclerku spřećelić.
Cornelia Hempelowa z Konjec: Móžu sej „zelenu kanclerku“ jara derje předstajić. Trjebamy čerstwy a předewšěm młody wětřik na čole Němskeje. Swójba a dźěło w přezjednosći, digitalizacija wjesnych kónčin a zapłaćomny bydlenski rum su při tym jeno tři dypki, kotrež měli w našim kraju nuznje reformować.
Matej Korjeńk z Pančic-Kukowa: Bych z tym žiwy być dyrbjał, dokelž z toho wuchadźam, zo jenož kanclerka politiku njepostaja, ale knježerstwowe zarjady. By pak derje było, hdyž bychu Zeleni raz dopokazać dyrbjeli, zo tež zwonka opozicije něšto zdokonjeja.
Zapósłane (19.05.21)
Werner Měškank z Choćebuza piše:
We wudaću Serbskich Nowin ze 14. meje ma wječornik na 2. stronje foto z powěsću, kotraž bě takle tež w dalšich serbskich medijach wozjewjena – ze samsnym zmylkom. Tam mjenowanu ewangelsku cyrkej mjenuja němsce „Nikolai-Kirche“ abo tež „Oberkirche“. Wona pak njerěka serbsce „Hornja cyrkej“ a tež nic – kaž hižo druhdźe čitach – „Wyša cyrkej“ resp. delnjoserbsce „Wuša cerkwja“.
Mjeno „Oberkirche“ nasta, dokelž bě wona wodźaca porno tamnej, jenož něhdźe 200 metrow zdalenej, podrjadowanej Serbskej abo klóšterskej cyrkwi. „Klosterkirche“ mjenowany Boži dom w Choćebuzu bu po reformaciji tudyšej serbskej wosadźe za kemše přewostajeny. Tohodla rěka w ludźe tež „Wendische Kirche“. Tudyši Serbja praja wězo „Serbska cerkwja“ – tamnej pak „Němska cerkwja“, byrnjež ju w srjedźowěku Serbja natwarili. W njej mjenujcy předewšěm němske Bože słužby swjeća.
Zapósłane (18.05.21)
Měrćin Krawc z Delnjeho Wunjowa reaguje na „Zapósłane“ Marje Michałkoweje:
Knjeni Michałkowa twjerdźeše 11. meje w SN jako wotmołwu na diskusijny nastork dr. Měrćina Wałdy, zo njeje korporacija zjawneho prawa najbóle demokratiska forma zastupnistwa našeho ludu, ale towarstwo.
Zapósłane (12.05.21)
Měrćin Wałda z Njeswačidła wupraja so k „Zapósłanemu“, w SN ze 7. meje:
Helmut Richter a Dawid Statnik kritizujetaj, zo sym w swojim nastawku „Kak sej Serbja swoje połoženje rjane barbja“ něšto wopačne twjerdźił. Zazwonich tuž knjeza Richtera. Wón móžeše so na naju rozmołwu před wosomnaće lětami dopomnić, na kotrejž běchmoj wo sylnje woteběracej ličbje serbšćinu rěčacych debatowałoj. Powědach jemu tehdy wo swojim statistiskim naprašowanju a běchmoj sej přezjednaj, kak prekerna rěčna situacija je. Prašachmoj so, kak to dale póńdźe, jeli so ničo zasadnje njezměni. Mjez druhim wón mi rjekny, zo pruwuje tež situaciju připosłucharjow Serbskeho rozhłosa. Při telefonje mi nětko praji, zo njeměješe za to tehdy někajki nadawk, kaž běch twjerdźił. Respektuju to, tež hdyž mam to hinak w pomjatku. Na situaciji, kajkuž sym wopisał, pak to ničo njezměni, a mamy za nju retomas dalšich přikładow. Wobžaruju, zo njejsym z nim prjedy wo tym rěčał, kak so hišće na naju rozmołwu dopomina.
