Kulow (JoN/SN). Dźeń wotewrjenych duri přewjedźe Kulowska wyša šula „Korla Awgust Kocor“ zajutřišim, 23. januara. Hinak hač druhdźe zarjaduja tónle dźeń w Kulowje sobotu, tak zo maja swójby składnosć, wo wuměnjenjach dźěći na kubłanišću so informować.
W 9.30 hodź. witaja šulerjo hosći z programom w małej sportowej hali, dokelž je wulka hala za kapičkowy wječor přihotowana. Program ma spektrum šulskich a zwonkašulskich poskitkow kaž tež móžnosćow zhromadneho wuknjenja posrědkować. Z wosebitym elanom so póstniska garda 10. lětnika na to přihotuje. Za nju je to jedyn z wjerškow lětušeje karnewaloweje sezony. Po programje móža dźěći zhromadnje ze staršimi jednotliwe stacije wopytać, hdźež wo wšelakich předmjetach kaž němčinje, serbšćinje, stawiznach, biologiji a dalšich zhonja. Zdobom móža so z wučerjemi a šulerjemi rozmołwjeć.
Budyski Rěčny centrum WITAJ wabi wotnětka z nowym poskitkom na internetnej platformje Facebook. Pod hesłom „słowo tydźenja“ zaběra so tam Lubina Hajduk-Veljkovićowa z rěčnymi wosebitosćemi serbskich słowow.
Budyšin (SN/MiR). Nowy poskitk RCW měri so na zajimcow, kotřiž chcedźa swój słowoskład rozšěrić, za synonymami pytać abo wo jednotliwych wopřijećach rozmyslować. „Słowo tydźenja“ je poskitk maćernorěčnym Serbam runja tak kaž tym, kotřiž serbšćinu wuknu a chcedźa swoje znajomosće rozšěrić. Hakle před něšto dnjemi bě nawodnica RCW dr. Beata Brězanowa w rozmołwje ze Serbskimi Nowinami tónle poskitk naspomniła. „Ideju, na te wašnje za zaběru ze serbskej rěču wabić, sym ze swójskeho zajima za nawuknjenje jendźelšćiny zrodźiła“, dr. Brězanowa rozłožuje, „dóstawam wšědnje z internetneje strony ,onewordaday‘ jedne słowo z jendźelšćiny, z kotrymž móžu so rozestajeć.“
Zjawnosći so předstajić a za swoju šulu wabić – tole bě minjeny pjatk wječor hłowny zaměr dnja wotewrjenych duri na Radworskej wyšej šuli „Dr. Marja Grólmusec“. Z wothłosom móžachu spokojom być.
Radwor (SN/MKWj). Tójšto wopytowarjow móžachu minjeny pjatk na Radworskej wyšej šuli witać. Kubłanišćo bě na dźeń wotewrjenych duri přeprosyło. Při tym njeńdźeše jenož wo to, dźěći zakładneje šule za to wabić, zo bychu w Radworju wostali. Narěčeć chcychu tež staršich, zo bychu swoje dźěći, kotrež tuchwilu do druhich šulow chodźa, přichodnje sem słali, kaž nawodnica Hilža Štilerowa Serbskim Nowinam rjekny. Prěnje naprašowanja tajkeho razu tam hižo maja.
Jako přewjedźe Silwija Wjeńcyna před nimale lětomaj projekt wo serbskich rejach na Zakładnej šuli „Handrij Zejler“ we Wojerecach, běše wjeršk zjawny wustup dźěći. Poprawom měješe to być zakónčenje projekta.
Hlejće nowa wěc so stała,
słyšće, chcyli rozumić:
Sroka je sej muža wzała,
čas jej bě so woženić.
Hawron je tón nawoženja,
toho je sej zhladała,
tón ma wjele zamóženja,
za kotrymž je žadała.
Na slubje je rapak pobył,
kwas joh chcychu wotćišćeć,
wón je na wšěch druhich dobył,
kiž chcychu joh podćišćeć.
Hižo tydźenje do 25. januara wulosuje abo postaji so, štó budźe njewjesta a štó nawožeń. Potom so swjedźeń přihotuje: Dźěći zhotowjeja ptače pyski, třihaja sej křidła a je zdźěla z čwačkami płatu polěpja abo je pomoluja; dale pytaja za swojoraznosćemi a znamjenjemi wěstych ptačkow a zapletu je do wšeho swojeho dźěła, kóžde po swojim talenće a po swojich móžnosćach. Často přińdu dźěći w kompletnych ptačich kostimach, kotrež staršo a hosćo potom posudźuja.
Brošurka „Wo přiswojenju serbšćiny a němčiny“, wudata wot Serbskeho šulskeho towarstwa, swědči wo wuwiću nawuknjenja rěče w serbskich a dwurěčnych kubłanišćach Sakskeje a Braniborskeje.
Budyšin (SN/MiR). Cyle jasnje so z ličbow a diagramow wujewja, zo ličba serbšćinu wuknjacych spaduje. To rjekny předsydka Serbskeho šulskeho towarstwa Ludmila Budarjowa přitomnym žurnalistam na nowinarskej konferency. Wčera tydźenja swjećeše towarstwo w Budyskim Serbskim domje 25. róčnicu wobstaća. „Najwjetši wuspěch při nawuknjenju serbšćiny je, zo mamy cyłotny koncept“, Ludmila Budarjowa rozłoži, „naše dźěći móža započeć w žłobiku serbšćinu wuknyć, swoje znajomosće na šulskich kubłanišćach rozšěrić a so ze studijom sorabistiki dale kwalifikować.“
Skutkowanje Serbskeho šulskeho towarstwa je šěroko připóznate. Milenka Rječcyna chcyše wot hosći na přijeću 5. januara wědźeć, što z SŠT zwjazuja a što towarstwu přeja.
Drježdźany (SN/JaW). Sakske knježerstwo je wčera ponowjenju šulskeho zakonja přihłosowało. Kaž kultusowe ministerstwo zdźěla, wuchadźeja z toho, zo ličba šulerjow přichodne lěta wo dźesać procentow woteběra. Tohodla stej so knježacej stronje CDU a SPD na noworjadowanja dojednałoj. Z naćiska mjez druhim wuchadźa, zo smědźa wjesne zakładne šule z mjenje hač 15 šulerjemi na rjadownju wobstać, hdyž znajmjeńša 60 dźěći kubłanišćo wopytuje a hdyž tam lětniki přesahujo wuwučuja. Wyše šule na wsach smědźa po naćisku tež jednočarowe być, dyrbja pak znajmjeńša 25 dźěći w jednej rjadowni měć.
Politikarjo dalšich stron naćisk zakonja chětro kritisce hódnoća. Tak ma jón kubłanskopolitiska rěčnica Lěwicy Cornelia Falken za „strukturnokonserwatiwny a do přichoda njewusměrjeny“, kaž wona žurnalistam MDR rjekny. Dźěłarnistwo kubłanje a wědomosć GEW žada sej dale, pomjeńšić maksimalnu ličbu šulerjow, kotraž je tuchwilu 28 na rjadownju. Sakski krajny sejm ma zakoń hišće wobzamknyć. Najpozdźišo klětu měł wón płaćiwosće nabyć.