Wjesnjenjo so zetkali
Jawora (WB/SN). Na zhromadnu adwentničku na nawsy su młode swójby w Jaworje minjenu sobotu wšitkich wobydlerjow přeprosyli. Ći najmjeńši tam njesćerpnje na rumpodicha čakachu, wšako maja we wsy nimale 30 mjeńšich a wjetšich dźěći. Rumpodich wězo najprjedy njedostatki a chwalobne stronki kóždeho małeho Jaworčana předčita a so wjeseleše, jako wšitcy zhromadnje adwentne pěsnje zaspěwachu. Při bjesadźe z horcym winom a praženej kołbasku přijomny wječor wuklinča.
Wustawki wobzamknjene
Zdźěr (CS/SN). Tak mjenowane wujasnjowanske wustawki za Zdźěr chce Wulkodubrawska gmejna nastajić dać. Tole su čłonojo gmejnskeje rady na swojim zašłym posedźenju wobzamknyli. Tak ma so definować nutřkowny a wonkowny wobłuk, štož je wažne za twarske naležnosće we wsy. We wonkownym wobłuku su twarske projekty jenož wuwzaćnje móžne, mjenujcy hdyž jedna so wo zjawne zastaranje abo wo předewzaća ratarstwa a lěsnistwa. Naćisk wustawkow budźe wot 27. decembra hač do 19. januara we Wulkodubrawskim gmejnskim zarjedźe zjawnje wupołoženy.
Policija (20.12.17)
Widejohry kradnyć chcył
Budyšin. Na hodownu nakup trochu hinašeho razu poda so zawčerawšim młody muž do Budyskeje kupnicy při Delnjokinjanskej dróze. Tam tykny sej widejohry w hódnoće něhdźe 600 eurow do toboły a wopušći kupnicu, bjez toho zo by je zapłaćił. Swědk pak to wobkedźbowaše a zawoła policiju. Zastojnicy wzachu 23lětneho sobu na policajski rewěr. Kaž so tam wukopa, měješe młody muž při swojim njeskutku najskerje pomocnicu. Na kotre wašnje je njeznata w tymle padźe pomhała, njeje znate.
Za přichod dźěći a komuny
Gmejnje Pančicy-Kukow spěchowanske pjenjezy za přetwar horta přizwolene
Pančicy-Kukow (SN/MWj). Kaž dohodowne wobradźenje wčera bě, jako přepodachu wjesnjanosće Pančic-Kukowa Markusej Kreuzej (CDU) w Budyskim krajnoradnym zarjedźe wopismo, zo přizwola gmejnje spěchowanske srědki za přetwar bywšeje hudźbneje šule na hort. Cyłkownu inwesticiju něhdźe 525 000 eurow spěchujetej Swobodny stat Sakska a wokrjes z cyłkownje 50 procentami. W twarjenju za pěstowarnju ma něhdźe 80 hortowych městnow nastać. Mjeztym zo tam Petra Scharfowa dale swoju kuchnju wobhospodarja, dotalny młodźinski klub z domu wućehnje. Wjacore křesła su tam hižo wurumowali. W januaru chcedźa prěnje twarske dźěła wupisać. Poběhnje-li wšitko kaž předwidźane, móhli hortowe dźěći kónc lěta 2018 z tuchwilnych pinčnych rumnosćow pěstowarnje do noweho horta přećahnyć, so Markus Kreuz nadźija. Za to přichodne měsacy třěchu, wokna, fasadu, tepjenje a sanitarne rumnosće dospołnje ponowja.
Adwentne zetkanje na žurli
Prócuja so dale wo pěstowarnju
Poslednje posedźenje gmejnskich radźićelow w běhu lěta su stajnje dobra składnosć, bilancu sćahnyć a hižo raz do přichoda hladać. To činjachu wčera tohorunja delanscy radźićeljo.
Róžant (JK/SN). Minjene lěto drje gmejnskim radźićelam w Ralbicach-Róžeńće dołho w pomjatku wostanje. Dlěši čas nawjedowaštaj gmejnu a rjadowaštaj komunalne nadawki zastupowacaj wjesnjanostaj Tomaš Bjeńš a Michał Šołta (wobaj Swobodni wolerjo Delany), doniž so wot awgusta zaso hłowny wjesnjanosta Hubertus Ryćer (CDU) swojemu zamołwitemu zastojnstwu njewěnowaše.
Chcedźa stykiz regionom Kursk nawjazać
Budyšin (SN/at). Wozjewjenje wo zhromadnym dźěle mjez zarjadnistwom regiona Kursk w Ruskej federaciji a wokrjesom Budyšin móže tudyši krajny rada Michael Harig (CDU) podpisać. Budyski wokrjesny sejmik je jeho na swojim poslednim posedźenju lěta k tomu społnomócnił.
Wšitcy wokrjesni radźićeljo, kotřiž so k tomu słowa jimachu, su naležnosć podpěrali. Za předsydu frakcije SPD/Zelenych Gerharda Lemma stej dorozumjenje mjez ludami a zachowanje měra najwašnišej aspektaj, nawjaza-li Budyski wokrjes styki z ruskim partnerom. Hajko Kozel (Lěwica) móže sej derje předstajić, zo „wobydlerjo tajke zhromadne dźěło wobohaća“. Wón poruča, Budyske towarstwo Swětłownja Majak z jeho rěčnej kompetencu zapřijeć. Sven Scheidemantel (SPD/Zeleni) skedźbni na to, zo runje priwatne załožby spěchowanske srědki za tajke wuměny rozdawaja, z kotrejež maja wosebje kubłanišća lěpšinu.
Komuna spěchuje Krabatowy młyn
Wojerecy (AK/SN). Město Wojerecy so zawjazuje, hač do 2021 kóžde lěto personalne kóšty k wudźeržowanju Čornochołmčanskeho Krabatoweho młyna přewzać. K tomu je so měšćanska rada wčera wuznała. Radźićeljo z wobzamknjenjom jednohłósnje wobkrućichu, zo so po dojednanju změja a město zahajenske financowanje zaruči. Přiražka ma so přeco po wotpowědnej situaciji hospodarskeho plana přizwolić.
Krótkopowěsće (20.12.17)
Nowy Lětopis wušoł
Budyšin. W nowym dwójnym zešiwku Lětopisa wěnuja so wědomostnicy ze Sewjerneje a Južneje Ameriki, Europy a Azije prěni króć w přirunowacej perspektiwje konceptej kulturneje wěstoty. Tak přepytuja wuměnjenja, kotrež dowoleja mjeńšinam, z politiskim sobupostajowanjom wuwić začuće přisłušnosće k statej a swoju kulturnu suwerenitu zesylnić.
Dźiwadłowe myto spožčene
Rom. Na iniciatiwu EU wustajene, z cyłkownje 60 000 eurami dotěrowane Europske dźiwadłowe myto spožča lětsa francoskej dźiwadźelnicy Isabelle Huppert a britiskemu hrajerjej Jeremyjej Ironsej. Lawreataj staj tuž wotnětka čłonaj ilustreho koła, kotremuž mjez druhim tež Heiner Müller, Pina Bausch a Harold Pinter přisłušeja.
DTM wostanje na motodromje
Hober Sprjewnik sobu hrał
Po mjeztym sedmym beneficnym koncerće w Rynčec bróžni dožiwichu Jasčenjo minjenu sobotu swoju tradicionalnu adwentničku w kulturnym domje „Bjesada“. Do rjenje wupyšeneje rumnosće přichwatachu połni wočakowanja stari kaž tež młodźi wjesnjenjo. Dźěći wjeselachu so najbóle na wopyt rumpodicha a Božeho dźěsća, starši wšak na nowu hodownu hru.
Najprjedy dachu sej wšitcy kofej a wosušk zesłodźeć. Při bjesadźe so čas spěšnje miny. Hižo so wonka ćmičkaše a dojěli běchu – kaž kóžde lěto – dujerjo Njeswačanskeje wosady, zo bychu Jasčanow z dohodownymi a zymskimi melodijemi zawjeselili. Ze sylnym přikleskom a małym darom so jim dźakowachu.
Pomhaja při njezbožach
Wohnjowym wobornikam nowe hašenske jězdźidło přepodali
Sćijecy (CS/SN). Wulki wokomik bě minjeny pjatk za Sćiječanskich dobrowólnych wohnjowych wobornikow. Jim přepodachu nowe pomocne a hašenske skupinske jězdźidło HLF 10. Zastupowacy nawoda wobornikow Thomas Frenzel měješe ruce połnej dźěła, zo by mnohim zajimcam techniske wosebitostki jězdźidła rozkładł. Wone płaći 325 000 eurow, z čehož je Swobodny stat Sakska 129 000 eurow přidał.
Sćiječanska wohnjowa wobora ma za cyłkowne wobornistwo města Budyšina wulki wuznam, dokelž je za awtodróhu, Wjazońčansku dróhu a dalše wažne puće přisłušna. Techniska pomoc při wobchadnych njezbožach wučinja tuž najwjetši dźěl jeje zasadźenjow.
Nowe hašenske jězdźidło su po přećach kameradow wuhotowali. Tak su na přikład jednotliwe městna w mustwowej kabinje optiměrowali. Nimo toho stworichu zwisk k šoferowej kabinje, tak zo móža so wobornicy, kotřiž zady sedźa, lěpje z prědku sedźacym skupinskim nawodu dorozumić. Nutřkownje je jězdźidło wšudźe wuswětlene, tak zo maja wobornicy tež póćmje wšitke trěbne graty spěšnje k rukomaj.
