Do směra na Budyšin jěducy bus, wobsadźeny z 19 staršimi ...
Krótkopowěsće (19.05.16)
Wo Smolerju přednošował
Pančicy-Kukow. Dr. Fabian Kaulfürst je wčera čłonam Domowinskeje skupiny Pančicy-Kukow zajimawje a powučnje wo Janu Arnošće Smolerju přednošował. W formje puzzla znazorni wón wažne stacije Smolerjoweho žiwjenja a jeho woporliweho skutkowanja. Připosłucharjo měnjachu, zo by so přednošk tež za dalše serbske cyłki hodźał.
Přichod fondsa zawěsćeny
Praha. Kaž je čěski premier Bohuslav Sobotka informował, chce tamniše knježerstwo schwalić, zo ma so dźěławosć lěta 1997 nastateho Čěsko-němskeho fondsa přichoda dale wjesć. W lětach 2018 do 2027 chce čěska strona za fonds nałožić dźesać milionow eurow; Němska měła k njemu po dorěčenju 25 mio. eurow přinošować. Ze srědkow fondsa běchu minjeny čas tež wjacore Serbow nastupace projekty spěchowali.
Wučerjo SGB najlěpši
Budyšin. Wučerske volleyballowe mustwo Serbskeho gymnazija Budyšin je dźesaty króć wokrjesny mišter. We wčerawšej poslednjej hrě sezony 2015/2016 porazy wone pedagogow Pestalozzijoweje wyšeje šule Lubij z 2:0 (25:15, 25:22). Wobdźěliło je so na mišterstwach šěsć wučerskich mustwow.
Krótkopowěsće (18.05.16)
Protestny camp rozpušćeny
Miłoraz. Policija je dźensa rano protestne lěhwo we Łužicy wobstupiła a camp LAUtonomia rozpušćiła. Demonstrantam, kotřiž su wot spočatka měrca na štomach w bjezposrědnim susodstwje Wochožanskeje wuhloweje jamy žiworili, wumjetuja ranjenje domjaceho měra, kaž medije rozprawjeja. Dźensa bě w lěhwje něhdźe 20 ludźi, kotrychž policija wšitkich sobu wza.
Skóržby přećiwo VW zapodali
Braunschweig. W zwisku ze skandalom manipulowaneho wotpłuna dla je na Braunschweigskim krajnym sudnistwje dotal 46 skóržbow wobsedźerjow awta VW dóšło. Dźěl ludźi sej žada, zo směli swoje manipulowane wozy awtotwarcej wróćić. Tamni žadaja sej wot Volkswagena wotškódnjenje, sudnistwo zdźěli.
Nanowski dowol schwaleny
Praha. Čěske knježerstwo je naćisk zakonja schwaliło, po kotrymž móhli po narodźe dźěsća tež nanojo tydźeń doma wostać. W tym času změja woni prawo na 70 procentow mzdy. Čěska chce so tak do 23 z cyłkownje 28 krajow EU zarjadować, kotrež formu płaćeneho „nanowskeho dowola“ praktikuja. Nowelu dyrbi hišće parlament schwalić.
W Hejničanskej cyrkwi do rownišća pohladali
Předsydstwo Katolskeho zjednoćenstwa kubłarjow Sakskeje (KEG) je swojich čłonow njedawno na kóždolětnu kubłansku jězbu přeprosyło. Lětuša wuprawa wjedźeše 39 wosobow, mjez kotrymiž běše połojca serbskich kubłarkow a kubłarjow, do sewjeročěskeje hraničneje kónčiny w Jizerskich horinach. Hłownje organizował bě ekskursiju městopředsyda zjednoćenstwa Franz Josef Fischer, wučer na Drježdźanskim gymnaziju swjateho Bena.
Prěni cil dnja bě městačko Frýdlant nad rěku Smědá ze swojim jónkrótnym hrodowym arealom na bazaltowej skale. Młoda čěska historikarka wodźeše nas we wuběrnej němčinje po tymle mócnym, jara derje restawrowanym hrodźe a jeho jednotliwych, wotpowědnje wuhotowanych rumnosćach z časa žiwjenja zemjanskeje towaršnosće wosebje 18. a 19. lětstotka.
Wužadani do přichoda myslić
Wjacore wažne temy stejachu na dnjowym porjedźe wčerawšeho posedźenja Chróšćanskeje gmejnskeje rady. Spočatnje wobhonichu so w nowej pěstowarni wo tuchwilnym stawje dźěłow.
Chrósćicy (JK/SN). Po słowach wjesnjanosty Marka Klimana (CDU) wotpowěduje tuchwilny staw planej, molerske dźěła postupuja a dłóžbarjo pilnje dźěłaja. Přiwšěm wujewja so nowy problem. Zo móhli pěstowarnju z meblemi wuhotować, běchu spěchowansku próstwu stajili. Ta pak bu wotpokazana a gmejna ma nětko cyłu sumu 38 000 eurow sama zwjesć. Mobiliar wšak měješe so po połojcy spěchować. Na přichodnym posedźenju gmejnskeje rady chcedźa wobzamknyć, srědki ze spěchowanja po zakonju wo zesylnjenju inwesticiskeje mocy, kotrež běchu zwoprědka za ponowje- nje dróhi z Chrósćic do Hórkow zaplanowali, za mobiliar pěstowarnje wužić.
Policija (18.05.16)
Za wopitym hižo pytali
Pěskecy. 24lětneho wodźerja Audija su zawčerawšim w Pěskecach kontrolowali a pola njeho 1,8 promilow alkohola w kreji zwěsćili. Při přepruwowanju personalijow zwěsćichu, zo za młodym mužom hižo pytaja. Wón bu přeńdźenja přećiwo zakonjej wo winowatostnym zawěsćenju dla k 1 500 euram pokuty zasudźeny, kotrež hišće zapłaćił njebě. To wón na městnje nachwata a wuńdźe tak zajeću.
Twarja najzašo za dwě lěće
Planowany kružny wobchad w Zejicach wobydlerjam rozłožili
Zejicy/ Lejno (Žu/SN). Horstka ludźi sćěhowaše wčera wječor w Lejnje wuwjedźenja wo planowanym twarje kružneho wobchada w Zejicach. Najzašo za dwě lěće maja so tam twarske dźěła zahajić. Daniel Köhler z krajneho zarjada za dróhotwar a wobchad (LASuV) je tuchwilny staw projekta rozłožił. Wo nim rozmyslować započeli běchu lěta 2012. Přiběraca ličba njezbožow bě hłowna přičina, na městnje křižowanišća dróhow S100/S101 kružny wobchad zarjadować. Prěnjotny naćisk zwrěšći na falowacej kolesowanskej šćežce. Njedawno hakle bu nowy naćisk schwaleny, wopřijacy kružny wobchad z integrowanej kolesowanskej šćežku kaž tež separatny kolesowanski pućik mjez Zejicami a Lejnom. Nětko póńdźe wo nakup za to trěbnych ležownosćow.
Swjatki njedźelu su Worklečenjo swoju meju powalili. Program ...
Zaso raz posledni raz koncertowali
Kamjenc (SN/MWj). Jónu dospołnje a jónu nimale wupředaty bě swjatki sobotu a njedźelu teren před jewišćom na Kamjenskej Pastwinej horje. Tysacy ludźi dožiwichu tam koncert „Rocklegenden“, kotryž su zhromadnje kapały Puhdys, Karat a City wuhotowali. Tež poslednjej mjenowanej stej w zašłosći hižo na Pastwinej horje koncertowałoj, termin k swjatkam pak bě wjele lět za Puhdyjow rezerwowany. Loni wustupichu hudźbnicy wokoło Dietera Birra tule we wobłuku swojeje rozžohnowanskeje turneje, lětsa potajkim hromadźe z kolegami tamneju kapałow.
Bě to nětko woprawdźe posledni raz, zo Puhdyjojo jako kapała na Pastwinej horje hrajachu, abo wuhladamy jich klětu traš tola na někajke wašnje tule, kaž mnozy měnja? Dajmy so překwapić! Za wšitkich, kotřiž rady na znate a tež nowše spěwy třoch skupin słuchaja, běštej to na kóždy pad rjanej wječoraj. Tole tež serbscy wopytowarjo wobkrućichu, kotrychž sy na koncertomaj zetkał.
Policija (17.05.16)
Paducha lepili
Budyšin. Wosrjedź swětłeho dnja chcyše minjenu sobotu dopołdnja muž před Budyskej kupnicu Marktkauf koleso pokradnyć. Něhdźe w 9.30 hodź. swědcy wobkedźbowachu, kak je wón zamk kolesa přetřihał a koło na transporter z pólskim čisłom połožił. Runočasnje alarmowachu policiju. Zastojnicy Budyskeho policajskeho rewěra 41lětneho paducha hišće na městnje lepichu.
