Z grafitijemi město porjeńša
Štož je w Budyšinje a wšudźe druhdźe hewak kruće zakazane, smědźa tu młodostni w tymle tydźenju cyle oficialnje činić, mjenujcy jedyn grafiti za druhim pryskać.
Budyšin (UM/SN). Njewšědnje wjele ludźi bě zawčerawšim popołdnju w Budyšinje w tunlu za pěškow mjez Žitnymi wikami a Karla Marxowej. Předewšěm młodźi ludźo so tam zhromadźichu. Mjez nimi bě Julian Wulke, kiž z tyzami barby wušiknje dźěłaše a najprjedy zelene, pozdźišo tež hinakbarbne smuhi na do toho běłu přebarbjenu sćěnu pryskaše, doniž so z tychle smuhow jendźelske słowo „peace“ (měr) formowaše.
Policija (27.09.18)
W kupnicy móšeń pokradnyli
Pančicy-Kukow. 29lětnej žonje su njeznaći minjenu póndźelu popołdnju w kupnicy Netto w Pančicach-Kukowje móšeń pokradnyli. Žona drje bě swój nachribjetnik w nakupowanskim wozu krótki čas njewobkedźbowany wostajiła. Tutu składnosć njeznaći wužiwachu a za móšnju sahnychu. Nimo wupokaza a pjenježnych kartow zhubi so tohorunja dwucyfrowa suma pjenjez. Kriminalna policija pad přepytuje a radźi, wosobinske wěcy njewobkedźbowane njewostajić.
Kóń do awta zaběžał
Prěčecy. Wjacore konje so wčera rano pola Bolborc ze swojeje pastwy wudobychu. Jedyn z nich je krótko po 5 hodź. na statnej dróze S 100 pola Prěčec do wosoboweho awta zaběžał a so při tym snadnje zranił. Skótny lěkar jeho zastara. Šofer so na zbožo zranił njeje.
Na serbski wječor
Pančicy-Kukow. Zastupjerki a zastupjerjo Domowiny, Sakskeje serbskeje rady a Załožby za serbski lud přeproša wšitkich zajimcow na zhromadny diskusijny wječor. Wón wotměje so wutoru, 2. oktobra, w 19 hodź. w hosćencu „Karstenowa piwowa stwička“ w Pančicach-Kukowje. Přeprošeni njejsu jenož aktiwni čłonojo najwšelakorišich serbskich towarstwow, ale tež jednotliwcy, serbscy młodostni a starši kaž tež politisce zajimowani. Z nimi chcedźa so wo tym rozmołwjeć, hdźe derje běži, hdźe klaca a kak móhli jich skutkowanje podpěrać. W srjedźišću steja prašenja wopytowarjow. Organizatorojo wjesela so na čiłu diskusiju.
Parkowanišćo ponowja
Pjenjezy za płuwarnju a woboru
Běła Woda (AK/SN). Swoju płuwarnju chce město Běła Woda modernizować. Za twarske změny přewostaji wone 63 000 eurow. Tole su měšćanscy radźićeljo na swojim wčerawšim posedźenju z jednym wzdatym hłosom wobzamknyli.
Ponowić maja so roły za chlorowy płun. Tuchwilne su dodźeržane a płun zdźěla přepušćeja. Tele roły w płuwarni dale wužiwać, njeby jenož zakazane było, ale tež njezamołwite. „Tohodla dyrbja so wone wuměnić“, rěka w předłoze za wobzamknjenje. Za pjeć přewětrjenske připrawy dyrbja nowe regulatory zatwarić. Dale ma so za techniku płuwarnje nowe procesorowe wodźenje instalować. Wone je wažne za dodawanje chlora do wody a runje tak za rjedźenje a sćoplenje wody. Wšitke trěbne daty so wot procesoroweho wodźenja wobdźěłaja.
Dołha suchota a wobstajnje horce temperatury drje běchu w lěću ...
Přidatne srědki rozdźělili
Krótkopowěsće (27.09.18)
Złoži mandat kónc oktobra
Drježdźany. Serbski zapósłanc a bywši sakski ministerski prezident Stanisław Tilich (CDU) 31. oktobra swój mandat w krajnym sejmje złoži. Wón postupuje tak, kaž hižo dlěši čas přizjewjene, a njeje přičiny mjenował, zdźěli wčera rěčnik Sakskeho krajneho sejma. Naslědnik po krajnej lisćinje CDU móhł Jörg Markert być. Krajny wólbny nawoda je so jeho hižo prašał, hač mandat přiwozmje.
Naprašowanje nětko online
Budyšin. Wobšěrne naprašowanje Domowiny je nětko tež online pod adresu https://www.soscisurvey.de/DomowinaBefragung/ w hornjoserbskej, delnjoserbskej a němskej rěči přistupne. Wotmołwy, kotrež maja so tež po tymle puću hač do 14. oktobra zapodać, wuhódnoći agentura Methodenberatung Jahn z Lipska. Domowina nima žadyn přistup k jednotliwym wotmołwam.
Syći Via Regia přistupił
Za dźěło wobornikow so zajimowali
Po wsy z jednoho statoka k druhemu dundali
Brětnja (UH/SN). Dworowy swjedźeń je woblubowany wulětny cil „wokoło róžka“. Takle wopisa minjenu sobotu popołdnju Görnerec swójba z Wojerec swój wopyt w Brětni. „Dokelž takrjec blisko wjesneho žiwjenja bydlimy, jako měšćenjo tajkile poskitk rady přiwzamy. Tak jězdźimy tohorunja rady na swačinu při pólnej mjezy do Židźinoho, do Čornochołmčanskeho Krabatoweho młyna abo tež do Ćišćanskeho statoka. A dźensa móžemy tajku rjanu wotměnu tež swojim Berlinskim znatym skićeć“, wjeseleše so Alexander Görner. Mužojo sej rady staru ratarsku techniku wobhladachu a dźěći so dźiwachu, kak běchu něhdy žito młóćili. Porno tomu zajimowachu so žony za modowu přehladku 19. lětstotka. Při tym dundachu wšitcy zhromadnje wot jednoho dwora k druhemu a wšudźe tež kulinariske poskitki woptachu.
