Z nazhonjenjemi a wěcownje
Jako njewotwisny kandidat-jednotliwc nastupi Wolfgang Tietze 24. apryla k wólbam noweho Łazowskeho wjesnjanosty. „Njetrjebamy žane politiske tam a sam jednotliwych stron, ale fairnosć a konstruktiwnosć, wusměrjenej na zajimy wobydlerjow. Rozsudy měli so z nazhonjenjemi a wěcownje tworić“, praji 58lětny z Běłeho Chołmca.
Nawuknył je wón powołanje mechanikarja za brunicowe nastroje, pozdźišo sta so z industrijnym mištrom. Wot 1990 do 1994 bě wón wjesnjanosta tehdyšeje Běłochołmčanskeje gmejny, wot 1994 je nawoda twarskeho wotrjada Łazowskeje wulkogmejny. Jako wjesnjanosta chcył wón infrastrukturu w gmejnje dale wutwarić. K tomu słušeja kolesowanske pućiki a wobswětlenje runje tak kaž znjesliwe wopłóčkowe popłatki. Dalše ćežišćo widźi wón w hospodarskim spěchowanju. Dokelž je přemysłowa přestrjeń we Łazu wućežena, měli po jeho měnjenju dołhodobnje nowu wotkryć.
Krótkopowěsće (12.04.16)
Poćežowanje ludźi dale wulke
Berlin. Poćežowanje dźěławych wotedawkow dla je loni zaso snadnje přiběrało. Tole je wuslědk přepytowanja organizacije OECD. Po tym dyrbješe nježenjeny přistajeny z přerěznej mzdu 49,4 procenty swojeje bruttomzdy za dawki a socialne wotedawki nałožić. Němska zaběra tak třeće najwyše městno mjez 34 čłonskimi industrijnymi krajemi OECD. Lěta 2014 běchu to hišće 49,3 procenty.
Za samsnu rentu
Schwerin. Knježerstwowi šefojo wuchodoněmskich zwjazkowych krajow žadaja sej wot zwjazkoweho knježerstwa jasne wuznaće k přibliženju wuchodnych rentow runinje zapadnych. Tole rjekny ministerski prezident Mecklenburgsko-Předpomorskeje Erwin Sellering (SPD) dźensa w Schwerinje. Jutře chcedźa ze zwjazkowej kanclerku Angelu Merkel (CDU) wo tym wuradźować.
Kongres wo mobiliće přichoda
140. wustajeńca w rjedźe „Mała galerija“
Njeswačidło (LR/SN). W rjedźe „Mała galerija“ wotewrěchu zawčerawšim w Njeswačanskim hrodźe prěnju wustajeńcu lěta 2016. Prěni raz prezentuja swoje mólby seniorojo města Budyšina a cyłeho wokrjesa, zdźěla tež ze zdalenišich kónčin. Cyłkownje wustaja w hornim poschodźe hrodu 43 wuměnkarjow swoje twórby. Woni mjenuja prezentaciju „To je mój swět – moje žiwjenje“. Wopytowar wuhlada wjace hač sto wobrazow, akwarele runje tak kaž rysowanki a wolijowe twórby. Tale mnohotnosć a wšelakorosć motiwow wotbłyšćuje lubosć seniorow k molowanju. Mjez wustajerjemi staj Helena Palmanowa a Marko Bruk z Budyšina. Wopytowar Šćěpan Dej z Radworja, kotryž sam jara rady we wólnym času moluje, wustajeńcu jara chwaleše.
Při powitanju hosći předsyda Njeswačanskeho towarstwa přećelow domizny a kultury Dieter Petschel na to skedźbni, zo je so „Mała galerija“ w hrodźe 1978 zrodźiła. Njedźelu wotewrjena přehladka je mjeztym hižo 140. w tymle rjedźe.
Policija (12.04.16)
Alkohol a žadyn kónc
Budyšin. Drogi a alkohol su přičiny, kotrež wjedu w nadróžnym wobchadźe najčasćišo k njezbožam. Loni zregistrowachu we wokrjesomaj Budyšin a Zhorjelc dohromady 334 zražkow, při kotrychž běchu wodźerjo jězdźidłow pak alkohol pili abo drogi brali. Lětuša statistika drje budźe podobna. Jeničce zawčerawšim dyrbješe so policija w Hornjej Łužicy z dźewjeć tajkimi padami zaběrać. Tak stachu so wjacore wobchadne njezboža, zawinowane wot wopitych šoferow. Dalšich lepichu zastojnicy při wobchadnych kontrolach. We wšěch padach čakaja na potrjechenych čućiwa pjenježna pokuta a dypki w Flensburgu.
Plany za něhdyšu wjes
Nadźijeja so šěrokeho spektruma industrijowych firmow
Hamor (AK/SN) Na terenje něhdyšeje wotbagrowaneje wsy Pakosnica (Schadendorf) ma industrijowa přestrjeń nastać. Twarski plan k tomu schwali jednohłósnje Hamorska gmejnska rada na swojim wčerawšim posedźenju. Nětko jón měsac zjawnje wupołoža, zo móhli zarjadnišća a nošerjo zjawnych zajimow swoje stejišćo wotedać.
Z fotami do stawiznow pohladnyli
Dobru ideju měješe towarstwo Njepilic dwór, jako je sej za lětuše serbske burske blido přeprosyło fotografa Jürgena Maćija. Z nim dožiwichu wopytowarjo jara emocionalne zarjadowanje.
Rowno (JoS/SN). Wjace hač 40 wopytowarjow je minjenu sobotu na Rownjanski Njepilic dwór přichwatało, hdźež wotmě so tradicionalne serbske burske blido. Wot lěta 2008 tele zarjadowanje kóžde lěto přewjeduja, a tež tónraz móžeštaj so župan Domowinskeje župy „Jakub Lorenc-Zalěski“ Manfred Hermaš a předsyda towarstwa Njepilic dwór Manfred Nickel nad „połnym domom“ wjeselić.
Biskop Wolfgang Ipolt je zawčerawšim w Kulowje 30 młodostnym ...
Policija (11.04.16)
Mlokowe awto znjezbožiło
Žarki. Při wobchadnym njezbožu dźensa dopołdnja mjez Wósporkom a Žarkami je z dotal njeznateje přičiny mlokowe awto znjezbožiło. Při tym so jězdźidło powróći, wulki dźěl mloka wuběža na łuku a do přirowa. Šofera dyrbjachu zranjeneho do chorownje dowjezć. Rumowanja dla bě dróha dlěši čas zawrjena.
Durje jastwa wočinjene byli
Budyšin (CS/SN). Dołhe rynki čakacych ludźi tworjachu so sobotu dopołdnja před Budyskim jastwom. Mnozy chcychu na dnju wotewrjenych duri widźeć, kak to za wysokimi murjemi wupada. Awtowe čisła přeradźachu, zo njepřińdźechu wopytowarjo jeno z Budyšina a wokoliny. Na kóncu bě jich dohromady něhdźe 500 zajimcow.
Chrósćicy sobu najwěsćiše
Kriminalna statistika Budyskeho a Zhorjelskeho wokrjesa předstajena
Zhorjelc (SN/MWj). Chróšćanska gmejna je we wobłuku Zhorjelskeje policajskeje direkcije ta z najmjenje kriminalitu. „Faktisce je tale kónčina bjez kriminality“, rjekny minjeny pjatk w Zhorjelcu nawoda policajskeje direkcije Conny Stiehl, kiž předstaji kriminalnu statistiku lěta 2015. Mjez pjeć komunami z najmjenje kriminality je tohorunja Worklečanska. Z wotstawkom najwjace kriminality maja w Zhorjelcu a w dalšich kónčinach při pólskej hranicy.
Kriminalita w Budyskim a Zhorjelskim wokrjesu je loni něhdźe wo pjeć procentow wotewzała. Cyłkownje zwěsćichu tule nimale 39 000 padow. Trochu wjace hač kóždy druhi z nich zamó policija wujasnić, štož je procentualnje nad sakskim přerězkom. Při tym zwěsćichu wjace hač 14 500 njeskutka podhladnych.
