Policija (23.10.15)
Wjazońca. Z dotal njeznateje přičiny su so wčera popołdnju we Wjazońčanskej cwibakowej fabrice smaženske kachle zapalili. Kaž policija zdźěla, móžachu wšitcy sobudźěłaćerjo twornju dźěłarnje njezranjeni wopušćić. Wohnjowa wobora płomjenja spěšnje zhaša. Tež te, kotrež běchu so hižo do hale předrěli. Kriminalna policija je swoje slědźenja za přičinu wohenja na městnje zahajiła. Za čas hašenja wosta zwjazkowa dróha přez wjes zawrjena. Po prěnich trochowanjach wučinja škoda wjacore stotysac eurow.
Twar so dliji
Wujězd. Wjele dešća zašłych dnjow dla dyrbjachu planowane twarske dźěła na přijězdce na awtodróhu A 4 w Hornim Wujězdźe do směra na Drježdźany přetorhnyć. Kaž zdźěla Krajny zarjad za dróhotwar a wobchad, njemóža zamołwići planowany termin ponowjenja a zhotowjenja jězdnjow dodźeržeć. Přijězdka na A 4 do směra na saksku stolicu w hornim Wujězdźe wostanje tuž hišće znajmjeńša hač do 30. oktobra zawrjena.
Dale wobchadne poćeženja
Wojerecy. Byrnjež hasa Alberta Einsteina we Wojerecach hižo tři tydźenje zaso za wobchad wotewrjena była, dońdźe tam dale k poćeženjam. Kaž Wojerowske měšćanske zarjadnistwo zdźěla, ponowjeja tuchwilu ležownosće při telej hasy. Tuž je Einsteinowa połojčnje zaraćena a do směra na Budyski móst stej zdobom kolesowarska šćežka a chódnik zawrjenej. Dospołnje zjawnemu wobchadej přepodać budu Wojerowsku Einsteinowu hasu najzašo srjedź nowembra. Tole pak wotwisuje hłownje tež wot wjedra, rěka k tomu z měšćanskeho zarjada.
Chcedźa wobchad při šuli změrować
Dalše nadawki přepodali
Chróšćanska gmejnska rada wjacore zarjadniske naležnosće zrjadowała
Chrósćicy (SN/JaW). Wjacore zarjadniske naležnosće dyrbjachu wčera na gmejnskej radźe w Chrósćicach zrjadować. Spočatnje spřisahachu Tomaša Dučmana za noweho gmejnskeho radźićela. Wón zabjerje městno Marka Klimana, kiž wšak bu za wjesnjanostu wuzwoleny.
Z noworjadowanjom dyrbjachu tež městna we hłownym, techniskim a wuběrku za kulturu, sport, šulu a socialne naležnosće kaž tež městno w zhomadźiznje zaměroweho zwjazka za wopłóčki, hdźež běše dotal Marko Kliman skutkował, znowa wobsadźić. Wotnětka budźe we hłownym wuběrku Katharina Jurkowa sobu dźěłać, w techniskim Hannes Bulank a do kulturneho wuběrka wolichu Tomaša Dučmana. Konrad Vcelich zastupuje nětko gmejnu sobu na zhromadźiznach wopłóčkoweho zwjazka.
Wočakuja 400 ćěkancow
Wojerecy (AK/SN). Město Wojerecy zaměstni hač do kónca lěta 400 ćěkancow w bywšim internaće wučomnikow płunoweho kombinata Čorna Pumpa. Wone pochaźeja zwjetša ze Syriskeje, z Iraka a Afghanistana. „Zwjetša budu to swójby. Jako prěnje wočakujemy 50 wosobow, z nich je dwanaće dźěći. Mamy wulki respekt před nadawkom, tola žadyn strach“, podšmórnje jednaćel Dźěłaćerskeho dobroćelstwa (AWO) Łužica Torsten Ruban-Zeh na wčerawšim dnju wotewrjenych duri. Wokrjesny zwjazk AWO Łužica budźe dom ćěkancow wobhospodarjeć. Za to přistaji zwjazk nimo nawody domu dalšich štyrjoch sobudźěłaćerjow.
Zběhanku su wčera dopołdnja we Wojerecach za nowy bydlenski park ...
Z temu azyl so zaběrali
W gmejnje Ralbicy-Róžant chcedźa wobydlerjow informować
Róžant (AR/SN). Pod wosebitym dnjowym dypkom zaběrachu so delanscy gmejnscy radźićeljo na wčerawšej zjawnej zhromadźiznje w jara wěcownej dis- kusiji z azylowymi wužadanjemi.
Krótkopowěsće (23.10.15)
Na rěčnym atlasu dźěłali
Łužnica. W chorwatskej Lužnicy njedaloko stolicy Zagreba wotmě tutón tydźeń konferenca komisije za Słowjanski rěčny atlas. Mjezynarodna skupina slawistow zaběraše so ze zwobraznjenjom słowjanskich dialektow w formje rěčnogeografiskich kartow. Njedawno je wušoł w Moskwje dalši zwjazk atlasa, w kotrymž su tež štyri serbske narěče zapřijate.
UNO kritizuje Čěsku
Praha/Genf. Zjednoćene narody wumjetuja Čěskej systematiske ranjenje čłowjeskich prawow migrantow. Knježerstwo w Praze prawdźepodobnje spyta, ćěkancow wottrašić, zo njebychu do kraja přišli, UNO wčera zdźěli. Mjez druhim kritizuja, zo Čěska ćěkancow hač do 90 dnjow pod ponižowacymi wuměnjenjemi interněruje, mjez nimi tež dźěći.
Nowosće wokoło liškow
Z kontaktowym běrowom
Budyšin (SN). Zwjakarstwo „Budyšin wostanje pisany“ je nětko w Kamjentnym domje sprjewineho města kontaktowy běrow zarjadowało. Rěčne hodźiny su stajnje štwórtk wot 15 do 17 hodź. Docpějomny je běrow telefonisce pod čisłom 0171-9792101 abo přez e-mailku .
Kontaktowy běrow organizuje čěstnohamtske dźěło z ćěkancami w Budyšinje. Wón je wšitkim zajimowanym wobydlerjam města a jeho wokoliny přistupny, kotřiž so wo lěpšu integraciju ćěkancow prócuja abo jim pomoc poskićeja.
Kaž w nowinskej informaciji rěka, koordinuje zarjadnišćo tež pomocne poskitki měšćanow z potrjebu we wulkich kwartěrach požadarjow azyla abo tu w bydlenjach zaměstnjenych ćěkancow. Tuchwilu pytaja za kmótrami za ćěkancow, kaž tež wosoby, kotrež chcyli jim znajomosće w němčinje sposrědkować.
W kontaktowym běrowje dźěłaja čestnohamtscy pomocnicy, kotřiž maja hižo tójšto nazhonjenjow w praktiskim dźěle z ćěkancami.
Njeměr a blady přiběraja
Kubšiska gmejna měła 64 čěkancow zaměstnić. To postara so na wsach komuny wo njeměr, předewšem dokelž njeje dotal wjac znate hač jenož ličba.
Kubšicy (CK/SN). Wobydlerjo Krakec a Poršic su jara znjeměrnjeni. Woni maja strach, zo w jich wsach ćěkancow zaměstnja, bjez toho, zo jich do toho informuja. „Dale a wjac bladow so šeri“, rozłoži gmejnski radźićel Jens Löser (Wolerske zjednoćenstwo Kubšicy) na wčerawšim wuradźowanju gmejnskeje rady. Wo njeměr na wsach postara kónc tydźenja wozjewjeny přehlad Budyskeho wokrjesa z kotrehož wuchadźa, kelko požadarjow azyla a ćěkancow chcył wokrjes wotnětka na gmejny a města rozdźělić. Bjezdwěla zaleži to tež na tym, „zo gmejnscy radźićeljo k tomu ničo rjec njemóža“, Jens Löser kritizuje. A tež wjesnjanosta Olaf Reichert (njestronjan) bě wo postajenej ličbje 64 požadarjow azyla za Kubšicy z nowin zhonił.
