Transporteraj pokradnyli

Nadźanecy. W času wot minjeneho pjatka popołdnja hač do soboty dopołdnja zadobychu so njeznaći na teren rjemjeslniskeho zawoda w Nadźanecach pola Budyšina, hdźež garažowe wrota namócnje wočinichu. Z garaže su zamknjenej běłej transporteraj typa Ford Transit z čisłom BZ-MB 1408 resp. BZ-MB 1607 sobu wzali. Cyłkownu hódnotu awtow trochuje jeju wobsedźer na něhdźe 30 000 eurow. Hač su z firmy hewak hišće něšto pokradnyli a kelko škody je při zadobywanju nastało, njemóže policija hišće rjec. Kriminalni technikarjo wjacore slědy zawěsćichu.­ Za jězdźidłomaj nětko mjezynarodnje pytaja.

Kamjenc. Přichodne stajne blido Kamjenskeho regionalneho Zwjazka 90/Zelenych wotměje so jutře, wutoru, w 19 hodź. w Kamjenskim hosćencu „La Piazza“ na Zwingerowej. Jako hosća wočakuja předsydu personalneje rady sakskeho statistiskeho zarjada Thila Börnera. Wón porěči mjez druhim wo statistice jako wažnym instrumenće za politiku a towaršnosć.

Wopominaja Hanku Šěrcec

Hórki. Na Hanku Šěrcec, katolsku Serbowku židowskeho pochada, spominaja štwórtk, 9. nowembra, w 17 hodź. z wopomnjenskej nutrnosću w Hórkach při kopolaku-plesternaku. Wšitcy su wu­trobnje přeprošeni.

Přednošuje wo stawiznopisu

Budyšin. Stawizniska sekcija Maćicy Serbskeje přeproša štwórtk, 16. nowembra, w 19.30 hodź. na dalše zarjadowanje do Budyskeho hosćenca „Wjelbik“. Tam přednošuje Alexander Pólk na temu „Wuwiće serbskeho stawiznopisa w NDR-skim času“. Młody serbski stawiznar, bydlacy w Budyšinje, předstaji wuslědki swojeho masterskeho dźěła, kotrež je lětsa na Techniskej uniwersiće Drježdźany wotzamknył. Přednošk budźe w serbskej rěči, zastup darmotny.

Tři nowe čakanske budki za busowe zastanišća­ Hodźijska gmejna za klětu planuje. Za Nowe Błohašecy tajka předwidźana njeje. Runje tam pak by wona nuznje trěbna była.

Hodźij (CK/SN). W Čornecach a Čěškecach chce Hodźijska gmejna klětu nowu busowu čakarnju natwarić a tu w Spytecach ponowić. Tole předwidźi naćisk hospodarskeho plana, z kotrymž so gmejnscy radźićeljo na swojim zašłym posedźenju zaběrachu. Gmejna tak swój zaměr dale wjedźe, po móžnosći w kóždej ze swojich 32 wsow čakansku budku stajić­. „To pak njewoznamjenja, zo kóžde zastanišćo tež třěchu dóstanje“, rozłoži André Laue z techniskeho zarjada gmejny na naprašowanje SN. Dotal maja 31 čakarnjow w 26 wjeskach. „Je twarić a hladać je naš stajny nadawk“, praji sobudźěłaćer zarjadnistwa. Nowe budki płaća zwjetša z gmejnskeje kasy. Za tu w Spytecach dóstanu w zwisku z nowej kolesowanskej šćežku podłu statneje dróhi S 111 přiražku Sakskeje.

Hospodarski plan zaměroweho zwjazka za wopłóčki při Klóšterskej wodźe bě w druhej połojcy oktobra zjawnje wupołoženy. W nim je tójšto ličbow a faktow, kotrež móhli zajimować.

Wudwor (AK/SN). Zaměrowy zwjazk za wopłóčki Při Klóšterskej wodźe (AZV) ma za hospodarske lěto 2018 dwě ćežišći. „Jónu ma so hladanje wobstejacych připrawow zaručić. Zdruha matej so wjesnej syći w Sernjanach a Porchowje rozšěrić. Tak so runočasnje dołhodobne wućeženje wodočisćernjow w Ralbicach a Porchowje polěpši.“ Takle rěka w hospodarskim planje, kotryž bě wot 16. hač do 24. oktobra zjawnje wupołoženy. Po wšěm zdaću 14. nowembra chcedźa jón zastupjerjo AZV přisłušacych gmejnow wobzamknyć.

Zaměrowy zwjazk liči klětu z minimalnym dobytkom 2 350 eurow. Riziko při planowanju su wotwožowanje wopłóčkoweho błóta, staroba techniskich připrawow a stupace energijowe kóšty. „Tele rizika dyrbimy pomjenować. Zdobom pak smy winowaći ze srědkami zlutniwje wobchadźeć“, praji sobudźěłaćer AZV Jan Mikel. Wot wobstejacych kreditow chcedźa klětu 214 000 eurow wotpłaćić.