Štož hewak widźeć njeje
Wulka ličba wotewrjenych pomnikow wabi njedźelu na wopyt
Budyšin (SN/MWj). „Móc a pycha“ je hesło lětušeho dnja wotewrjeneho pomnika, w kotrehož wobłuku budu zajutřišim, njedźelu, najwšelakoriše cyrkwje, wěže a dalše twarjenja wotewrjene, do kotrychž hewak njepřińdźeš. W Budyšinje na přikład budu krajnostawske domy na Hrodowskej přistupne, žurla přisažneho sudnistwa w Serbskim muzeju, stukowa žurla na susodnym Hrodźe, něhdyši krajnostawski seminar, hdźež je dźensa powołanskošulski centrum zaměstnjeny, Britzec zahroda za Serbskim institutom a dalše městnosće. W něhdyšim stasijastwje rozprawjeja něhdyši politiscy jeći, kak běchu woni móc a namóc dožiwili. Cyłkowny přehlad wšitkich wotewrjenych pomnikow sprjewineho města je zapřijaty we wosebitej brošurce, kotruž dóstanu zajimcy w měšćanskej informaciji a w mnohich wobchodach. Powotpočnyć móža so wopytowarjo cyły dźeń na Hłownym torhošću před radnicu. Tam změja gastronomiske zastaranje, hudźbu a wjele zaběrow za dźěći.
Žadaja sej přetwar křižowanišća
Křižowanišćo na statnej dróze S 94 pola Jěžowa je po wospjetnym njezbožu znowa w diskusiji. Zjawne zarjadnistwa pak njewidźa trěbnosć, tam něšto změnić.
Kamjenc (UM/SN). Wjele lět płaćeše křižowanišćo Kamjenskeje wobjězdki pola Jěžowa jako „katastrofowe“. Lěta 2005 běchu je zjawnosći přepodali, hižo lěto pozdźišo pak přijězd z Jěžowa zawrěchu. Přičina bě přewjele njezbožow w krótkim času. Z maksimalnje lěto planowaneho zawrjenja bu sydom lět. Hakle w juniju 2013 křižowanišćo wotewrěchu, po tym zo běchu tam swobodny wid zaraćili a šoferow tak k pomałšemu jězdźenju nuzowali.
Kulowska młodźinska wohnjowa wobora wobdźěli so zajutřišim, ...
Krótkopowěsće (08.09.17)
Přeprošeja na swjedźeń
Raduš. Błótowska wjes Raduš, dźěl města Wětošowa, wuhotuje jutře a njedźelu 14. braniborski wjesny a žnjowodźakny swjedźeń. Sobotu wustupi Serbski ludowy ansambl, Sarah Gwiszcz prezentuje swoju modu labela Wurlawy. Serbski program ze sćelakom RBB chce hosći njedźelu runje tak zawjeselić kaž spěwytwórc Bernd Pittkunings.
Ćežke zemjerženje
Podstupim. Zemjerženje sylnosće 8,4 je dźensa rano mexiski přibrjóh Pacifika trjechiło. Střasenje zemje bě samo w 700 kilometrow zdalenej stolicy Mexiku-city čuć. Konkretne informacije wo škodach abo woporach dotal hišće žane njepředleža. Nětko warnuja tam zarjady před tsunamijom.
Zawěranske pasmo zarjadowali
Na zahrodniskej wustajeńcy byli
Čłonojo towarstwa Němčanski wětrnik podachu so tele dny na Mjezynarodnu zahrodnisku wustajeńcu IGA w Berlinje. Bě to dźakna jězba za aktiwne dźěło na lětušim dnju młynow kaž tež za dobrowólne dźěło w młynje a wokoło njeho. W dwěmaj skupinomaj dachmy so po wulkim wustajenišću wodźić. Mjez druhim zhonichmy, kak běchu „zahrody swěta“ nastali a što wone woznamjenjeja.
Wulce spodobała je so nam tohorunja kwětkowa hala. Wjeršk pak bě jězba z powjaznicu. Z wěže na horje mějachmy wulkotny wuhlad na teren zahrodniskeje wustajeńcy a na Berlin. Dokładnišo wobhladachmy sej němsku stolicu pozdźišo na kołojězbje po měsće. Wjetšina z nas hižo dlěši čas tam była njebě a so dźiwaše, što wšo je so změniło. Wo tym tež hišće na zakónčenju w Němčanskim hosćencu bjesadowachmy. Achim Nowak
Policija (07.09.17)
Radšo kradnyć šli hač do šule
Budyšin. Mjeztym zo druzy w šuli sedźa a wuknu, su třo młodostni w Budyšinje zawčerawšim dopołdnja kradnyć šli. Swědk lepi padušnu trójku w starobje 14 do 17 lět, jako woni z podlěšenskim kablom a z grilowanskim wuhlom přez płót zahrodnišća při Nowoměšćanskej dróze zalězechu. Muž zawoła policiju, kotraž młodostnych w bliskosći dosahny. Po tym zo běchu zastojnicy jich personalije zwěsćili, přepodachu hólcow staršim. Kotre konsekwency to doma měješe, bohužel znate njeje. Policija pad dale přepytuje.
Wodźa po kapałce
Worklecy. Do regionalneje parlički přeproša njedźelu, 10. septembra, składnostnje dnja wotewrjeneho pomnika. Jónkrótna Worklečanska kapałka Marije maćerje Božeje je jedna z mało cyrkwjow po cyłej Němskej, w kotrejž su mólby w formje Beuronskeho stila hač do dźensnišeho zdźeržane. Towarstwo Worklečanskeje kapałki chce zajimcow tón dźeń hodźinsce mjez 12 a 16 hodź. wodźić. Organizatorojo wjesela so na mnohich hosći a poskića jim tohorunja kofej a tykanc.
Ekskursija k wjelkam
Rěčicy. Na přednošk wo wjelkach přeproša kontaktny běrow „Wjelki w Sakskej“ jutře, pjatk, w 15.30 hodź. na Rěčičanski Erlichtec dwór. Z mnohimi wobrazami informuja tam wo žiwjenskim wašnju wjelkow a jich wuwiću. Přizamknje so ekskursija na slědy wjelkow, kotraž traje něhdźe hač do 18.30 hodź. Přednošk a ekskursija stej darmotnej.
Wotkryja wosebity model města
Papjercownju chcedźa rozšěrić
Malešecy (CS/SN). Wjacore twarske nadawki za ponowjenje pěstowarnje w Budyšinku je Malešanska gmejnska rada na swojim zašłym posedźenju rozdawała. Jednotliwe twarske naprawy dóstanje komuna z programa „Mosty do přichoda“ spěchowane. Tak móže nětko Kubšiska firma cyłu elektrisku připrawu za něhdźe 25 000 eurow ponowić. Izolowace naprawy přećiwo harje ma firma z Radworskeje gmejny zwoprawdźić.
Dale radźićeljo wobzamknychu, zo předadźa staru šulu w Nowej Wsy nad Sprjewju pólskej swójbje, kotraž w Zhorjelcu bydli. Po tym zo zarjadnistwo biosferoweho rezerwata Hornjołužiska hola a haty šulu za swoje zaměry hižo wužiwało njebě, je twarjenje na kóncu prózdne stało. Swójba chce je hospodarsce wužiwać, mjez druhim za rozpósłanje tobakowych tworow a za posrědkowanje hospodarskich kontaktow mjez němskimi a pólskimi firmami. Zdobom chce twarjenje saněrować. W nim stej tohorunja dwě bydleni, z kotrejuž je jedne wobydlene. Podružnica dóstanje bydlenske prawo na čas žiwjenja.
Nowy inwestor přińdźe
Pola Słoneje Boršće nastanje 60 nowych dźěłowych městnow
Budyšin (CK/SN). Na industrijnišću pola Słoneje Boršće maja so dźěle z kumštneje maćizny za medicinsku techniku produkować. Měšćanska rada je nětko přihłosowała, zo město 62 480 kwadratnych metrow wulku ležownosć firmje Yellow Tec Holding předa. Inwestor njebě zwólniwy předwidźanu płaćiznu 6,14 eurow na kwadratny meter zapłaćić. Po směrnicy Europskeje unije pak je móžno ju wo pjeć procentow a tuž na šěsć eurow znižić, štož wučinja tuž cyłkownu sumu 374 880 eurow.
Jednanja běchu so dlijili, dokelž bě płonina hižo belgiskej firmje předata. Yellow Tec pak chcyše na kóždy pad runje tule płoninu, dokelž chcedźa ze susodnej firmu hromadźe dźěłać, kotraž za to tohorunja inwestuje. Skónčnje móžachu belgiske předewzaće tola přerěčeć, płoninu wróćić a za to tamny swobodny areal kupić. Yellow Tec je na wjacorych městnach probowe točenja přewjedł, dokelž chcychu za chłódźenje swojich mašinow dnownu wodu wužiwać. Tale nadźija pak so njespjelni.
